Read Chimborazo Highland Quichua ROMANOS 9 Bible Online

ROMANOS 9 - Chimborazo Highland Quichua bible

ROMANOS 9

¹Cristomantami ima shina cashcatataj mana llullashpa, ñuca yuyaipi jucha illaj Espíritu yuyachishca shina huillagrini.

²Ñucaca jatun llaquitami charini. Chai nanaica ñuca shungupi caticunllami.

³Aichamanta ñuca familia huauquicunata c'uyashcamantaca, ñucallataj Cristomanta anchushpa, paicunapaj randi llaquichishca caimanchari.

⁴Paicunaca israelcunami. Paicunataca Diosca quiquin huahuacunatami rurarca. Paicunapurapimi sumaj cashcahuan ricurirca, paicunahuanmi ari ninacurca. Paicunamanmi Mandashcatapish curca, paillata adoranatapish yachachirca, cusha nishcapish paicunapajmi.

⁵Paicunaca callari yayacunapaj huahua huahuacunami. Aichamantaca paicunapurapimi Cristoca shamurca. Paica tucui ima tiyajcunapaj jahuapi caj Diosmi. Paitaca, huiñai huiñaita alli nishca cachun. Chaica chashnatajmi.

⁶¿Israelcunaman Dios cusha nishcachu mana pajtashca? Manataj chashnachu, ashtahuanpish israelcunapaj huahua huahuacunamari mana tucuicuna israelcunataj cashca.

⁷Abrahampaj huahua huahuacuna cashpapish, manamari tucuicuna paipaj huahuacunatajchu. Ashtahuanpish: “Isaacmantami cambaj huahua huahuacunatajca canga” ninmi.

⁸Cashnami nisha nin: Aicha munaillamanta huahuacunaca, mana Diospaj huahuacunatajchu. Ashtahuanpish Dios cushami nishcamanta huahua huahuacunami, paipaj huahuacunatajca.

⁹Cushami nishca shimica cashnami: “Shamuj huata cunan shina punllallapitajmi tigramusha. Chaipajca Saraca, shuj churitami charinga” nishcami carca.

¹⁰Ashtahuanpish mana chaillachu, Rebecapish ñucanchij yaya Isaacpajtaca, shuj cutinllapimi ishqui churita chichurca.

¹¹Paicuna manaraj huacharijpi allitapish, mana allitapish manaraj rurajpimi, Diosca pai agllasha nishca shina agllarca. (Dios agllanaca mana rurashcacunamanta cashcata ricuchingapaj, ashtahuanpish pai agllasha nishca shina agllana catichunmi chashna rurarca).

¹²Chaimi Diosca Rebecamanca: “Punta churimi q'uipa churipajta ruranga” nirca.

¹³Quillcachishcapipish: “Jacobtami c'uyarcani, Esautaca p'iñarcanimi” ninmi.

¹⁴Shina cajpica ¿imatataj nishun? ¿Diosca cashcata mana rurajchari? ¡Manataj chashnachu!

¹⁵Diosca Moisesmanca: “Ñuca llaquisha nishcatami llaquisha, ñuca alli casha nishcahuanmi alli casha” ninmi.

¹⁶Chashna cajpica maijanpish mana pai munashcamantachu, mana pai ima allita rurashcamantachu agllan, ashtahuanpish Dios llaquij cashcallamantami agllan.

¹⁷Quillcachishcapica Faraonmanca: “Ñuca poderta canpi ricuchingapaj, ñuca shutipish tucui cai pachapi huillashca cachunmi, cantaca jatun mandajta churarcani” ninmi.

¹⁸Chashna cashpami Diosca, maijanta llaquisha nishcataca llaquin, maijanpaj shunguta sinchiyachisha nishpaca sinchiyachin.

¹⁹Ashtahuanpish canca: “Shinashpaca ¿ima nishpataj Diosca runacunata juchachin? ¿Pitaj paipaj munaitaca jarcai tucunman carcari?” ninguichari.

²⁰Riqui canca, ¿pitaj canguiyari Diosta chashna rimangapajca? Allpamanta vasoca, paita rurajtaca: “¿Ima nishpataj ñucataca cashna rurarcanguiyari”? ningachu.

²¹Allpamanta vasota rurajca ¿manachu chai masallamantataj shujtaca allipaj, caishujtaca ima yangapajlla rurai tucun?

²²Diospish pai p'iña cashcata, paipaj poderta ricuchisha nicushpapish, p'iñarishpa chingachingapaj rurashca vasocunataca ¿ima nishpataj mana utca chingachishpa shuyacunlla?

²³Diosca, pai sumaj canahuan charij cashcataca pai llaquingapaj rurashca vasocunamanmi ricuchisha nirca. Paicunapish paipaj sumaj canapi cachunmi, ñaupaman chashna allichirca.

²⁴Chai allichishca vasocunallatami cayarca. Judiocunapurallamantaca mana cayarcachu, ashtahuanpish mana judiocunapuramantapishmi cayarca. Chaicunaca ñucanchijllatajmi canchij.

²⁵Chashnallatajmi Oseas libropipish nin: “Mana ñucapaj cajcunataca, ñucapajmi canguichij nishami. Mana c'uyashcatapish, ñuca c'uyashcami nishami.

²⁶Maipimi Diosca: “Cancunaca mana ñucapaj cajcunachu canguichij” nirca, chaillapitajmi: “Causaj Diospaj huahuacuna” nishcacunami canguichij” ninmi.

²⁷Shinallataj Isaiaspish, israelcunamanta huillashpaca: “Israelpaj huahua huahuacunaca, mama cuchapi tiyaj allpa shina achcacuna cashpapish, saquirijcunallami quishpichishca canga.

²⁸Jatun Diosmi cai pachapica, pai llaquichisha nishcataca cashcata rurashcahuan utca tucuchinga” nishcami.

²⁹Isaías ñaupaman nishca shinallatajmi: “Tucuita Mandaj Jatun Diosca mirarinapaj mana puchuchishca cajpica, Sodoma shinami tucunchijman carca. Gomorramanpish rijchajmi tucunchijman carca” nishcami.

³⁰Shina cajpica ¿imatataj nishun? Mana judiocunaca justificachun mana mashcajcuna cashpapish, justificashca canamanmi chayashca. Chaica crijpimi justifican nisha ninmi.

³¹Ashtahuanpish israelcunaca, Mandashcapi nishcata rurashpa justificashca canaman chayashun nishpapish mana chayarcacunachu.

³²¿Ima nishpashi chashna tucurca? Paicunaca Mandashcapi nishcacunata rurashpalla, justificashca canata mashcashpami, mana crishpa chashna tucurcacuna. Chaimantami paicunaca, ñitcana rumipi ñitcarcacuna.

³³Cashnami quillcashca tiyacun: “Riquichij, ñucaca Sionpimi ñitcachij rumitaca, urmachij jatun rumitaca churani. Maijanpish paipi crijtaca, mana pingachishcachu canga” ninmi.