Read Chimborazo Highland Quichua 1 CORINTIOS 1 Bible Online

1 CORINTIOS 1 - Chimborazo Highland Quichua bible

1 CORINTIOS 1

¹Jesucristopaj apóstol cachun Taita Dios munashpa cayashca Pablomi cani. Huauqui Sostenesdijmi,

²Corintopi caj Diospaj tandanacushca crijcunaman quillcanchij. Cristo Jesuspi shujlla tucujpi jucha illajta rurashca, jucha illaj cachun cayashcacunami canguichij. Ñucanchijta Mandaj Jesucristopaj shutipi, maipipish tucui mañajcunandijmi chashna canguichij. Paicunapajpish, ñucanchijpajpish Mandaj Jesusmi.

³Ñucanchij Dios Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninchijmi.

⁴Mana c'uyaipajta c'uyaj canata Cristo Jesuspi cancunaman Dios cushcamantami, ñuca Diostaca pagui nicunilla.

⁵Cristomantami tucui huillanapi, tucui yachanapi, tucuipi charijyashcanguichij.

⁶Cristomanta ima shina cashcatataj huillashcamantami, cancunapurapica chashnaca tucushcanguichij.

⁷Chashnallatajmi ñucanchijta Mandaj Jesucristo shamunata shuyacujcunaca, Taita Dios cushca rurai tucuna illajca mana canguichij.

⁸Ñucanchijta Mandaj Jesucristo shamui punllapi, pi mana juchachipaj cachunmi, tucuri punllacama paillataj sinchita charinga.

⁹Pai rurasha nishcataca pajtachij Taita Diosmi. Paipaj Churi, ñucanchijta Mandaj Jesucristohuan shujlla cachun cayashcacunami canguichij.

¹⁰Huauquicuna, cancunataca ñucanchijta Mandaj Jesucristopaj shutipimi rogani. Cancunapurapi chaupirinacui ama tiyachun, tucuicuna chai shinallataj rimaichij. Yuyanapi, ruranapipish tucuicuna tandalla chai shinataj caichij.

¹¹Ñuca huauquicuna, cancunapurapi p'iñanacushpa rimanacui tiyashcataca, Cloepajpuramanta huillajpimi yacharcani.

¹²Cancunaca: “Ñucaca Pablopajmi cani”, “Ñucaca Apolospajmi cani”, “Ñucaca Cefaspajmi cani”, “Ñucaca Cristopajmi cani” nishpami tucuicuna ninacucun ninmi. Chaitaca cashnami nisha nini:

¹³¿Cristoca chaupishcachari? ¿Cancunamantaca Pablotachu chacatarca? ¿Pablopaj shutipichu bautizarircanguichij?

¹⁴Cancunataca maijantapish mana bautizashcamantaca, Diostami pagui nini. Crispota, Gayollatami bautizarcani.

¹⁵Chaimanta Pablopaj shutipimi bautizarircanchij nishpa, pi mana ni tucunguichijchu.

¹⁶Estefanaspaj familiatapishmi bautizarcani. Maijan shujtajta bautizashcataca mana yuyarinichu.

¹⁷Cristoca ñucataca bautizachunca mana cacharcachu, ashtahuanpish alli huillaita huillachunmi cacharca. Chaimantami Cristopaj cruz ama yanga cachun, mana jatun yachaj shina rimashcahuan huillani.

¹⁸Chingarijcunapajca, cruzmanta huillashcaca musparishca shinallami. Ashtahuanpish ñucanchij quishpirijcunapajca, Diospaj podermi.

¹⁹Cashnami quillcashca tiyacun: “Yachaisapacunapaj yachaitaca chingachishami. Yuyaisapacunapaj yuyaitaca muspachishami” ninmi.

²⁰¿Maipitaj yachaisapaca? ¿Maipitaj quillcajca? ¿Maipitaj cai pachallamanta imatapish rimanacujca? ¿Manachu Diosca, cai pachapaj yachaitaca muspachishca?

²¹Dios rurashcacunaca, pai yachaj cashcatami ricuchin. Cai pachapi causajcunaca paicunapaj yachashcallahuan Dios tiyashcata crishun nishpami Dios tiyashcataca mana crircacuna. Chaimantami Diosca musparishpa huillacushca shina huillashcata crijpi, quishpichinata munarca.

²²Judiocunaca ricuchinacunata ricuchichunmi mañancuna, griegocunaca yachaitami mashcancuna.

²³Ashtahuanpish ñucanchijca, Cristota chacatashcatami huillacunchij. Chaica judiocunapajca ñitcanapajmi, mana judiocunapajca musparishca huillashca shinallami.

²⁴Shina cajpipish Dios cayashcacunapajca, judiocunapaj cashpa, griegocunapaj cashpapish, Cristoca Diospaj podermi, paipaj yachaipishmi.

²⁵Diosca yuyai illaj shina cashpapish, gentecunataca yalli yachajmari. Diosca irqui shina cashpapish, gentecunata yalli poderyujmari.

²⁶Huauquicuna, ima shina cajpi cancunata Dios cayashcata yuyarichigari. Aichapajllata yachajcunahuan ricujpica, achca yachajcuna, achca poderyujcuna, alli nishcacunapish cancunapurapica mana achcacuna tiyanchu.

²⁷Yachaisapacunata pingachingapajmi, cai pachapaj cajcuna imata mana yachajmi nishcacunataraj Diosca agllarca. Sinchicunata pingachingapajmi, cai pachapaj cajcuna irquimi nishcacunataraj Diosca agllarca.

²⁸Diosca cai pachapi imapish mana caj p'iñashcacunatami agllarca. Allimi canchij nijcunata yanganchingapajmi, imapish mana cajcunataraj agllarca.

²⁹Paipaj ñaupajpi pi ama jatun tucuchunmi chashna rurarca.

³⁰Diosmi cancunataca, Cristo Jesushuan shujllata rurarca. Cristotamantami Diosca yachaj cachun, justificashca cachun, jucha illajta rurashca cachun, randishpa quishpichishca cachun churarca.

³¹Chashna cana cashcamantaca, cashnami quillcashca tiyacun: “Maijanpish allimi cani nirijca, Jatun Diospi allimi cani nirichun” ninmi.