Read Chimborazo Highland Quichua 1 CORINTIOS 10 Bible Online

1 CORINTIOS 10 - Chimborazo Highland Quichua bible

1 CORINTIOS 10

¹Huauquicuna, ñucanchij yayacunaca tucuicuna p'uyu pacashca cashcata, mama cuchatapish tucuicuna ch'imbashcataca mana yachashca shina cachunca mana munanichu.

²Moiseshuan tandalla cangapajca tucuicunami p'uyupi, mama cuchapipish bautizarircacuna.

³Tucuicunami Dios cachashca micunallatataj micurcacuna.

⁴Tucuicunami Dios cachashca ubyanallatataj ubyarcacuna. Dios cachashca paicunahuan puricuj rumimantami ubyarcacuna. Chai rumica Cristomi carca.

⁵Ashtahuanpish paicunamanta chaupi yallica, Dios munashcataca mana rurarcacunachu. Chaimantami paicunaca shitashca pambapi huañurcacuna.

⁶Tucui caicunaca ñucanchij ricushpa, paicuna ima mana allicunata munashca shina, ñucanchijpish ama munachunmi chashna tucurca.

⁷Paicunamanta maijancuna shina, rurashcalla dioscunata ama adorajcuna caichijchu. Cashnami quillcashca tiyacun: “Tucuicunami micungapaj, ubyangapaj tiyarircacuna, pugllangapajpishmi jatarircacuna” ninmi.

⁸Paicunamanta maijancuna shina ama huainayajcuna cashunchijchu. Chashnacunaca shuj punllallapimi, 23.000 huañurcacuna.

⁹Paicunamanta maijancuna Jatun Diosta rimashca shinapish ama rimashunchij. Chashnacunaca culebracuna canishcami huañurcacuna.

¹⁰Paicunamanta maijancuna shina ama huashalla rimajcuna caichijchu. Chashnacunataca tucuchijpaj maquimi huañuchirca.

¹¹Tucui caicunaca ñucanchij ricuchunmi chashna tucurca. Cai tucuri punllacunapi ñucanchij causacujcunata sinchita cunangapajmi, chashna quillcashca tiyacun.

¹²Maijanpish sinchi cashcata yuyajca, ama urmangapajca alli ricurangui.

¹³Shujtajcunata japij millai munaicunallatajmi cancunatapish japirca, ashtahuan yallica mana japircachu. Ashtahuanpish Diosca pajtachij cashcamantami, chai millai munaicunataca cancuna apai tucunallata saquinga. Paillatajmi chai millai munaimanta llujshichun mishachinga.

¹⁴Chaimanta ñuca c'uyashcacuna, rurashcalla diosta adorajcunamanta caruyaichij.

¹⁵Cancunataca alli yuyaiyujcuna cajpimi rimani. Cancunallataj ñuca nishcataca alli yuyarichij.

¹⁶Dios cushca copamanta pagui nishpaca ¿manachu Cristopaj yahuarmanta shujlla canchij? Tandata chaupishpaca ¿manachu Cristopaj cuerpomanta shujlla canchij?

¹⁷Shujlla tanda cajpipish, ñucanchijca achcacuna cashpapish, tucuicuna chai tandallamantataj micushpaca, shujlla cuerpomi canchij.

¹⁸Israelcuna ima shina ruraj cashcata ricuichij: Diosman cushpa rupachinapaj cushcacunata micujcunaca ¿manachu altarmanta japijcunahuan shujlla?

¹⁹Caihuanca ¿imatataj nisha nini? ¿Rurashcalla diosca imallapish canchu, mana cashpaca rurashcalla dioscunaman rupachinapaj cushcaca imallapish canchu?

²⁰Diosta mana rijsijcunaca supaicunamanmi cuncuna, Diosmanca mana cuncunachu. Cancunataca supaicunahuan tandanacujcuna cachunca mana munanichu.

²¹Mandaj Jesuspaj copamantapish, supaicunapaj copamantapish mana ubyai tucunguichijchu. Mandaj Jesuspaj mezamantapish, supaicunapaj mezamantapish mana micui tucunguichijchu.

²²¿Mandaj Jesús p'iñarishpa llaquichingacamatajchu chashna rurashun? ¿Ñucanchijca paita yalli poderyujchari canchij?

²³Tucui imatapish rurai tucunimi, ashtahuanpish chaica mana tucui allichu. Tucui imatapish rurai tucunimi, ashtahuanpish chaica mana tucui sinchiyachinchu.

²⁴Pipish quiquinpaj allipajllaca ama mashcachun, ashtahuanpish shujtajpaj allipaj mashcachun.

²⁵Aicha c'atupica yuyai mapayanata ama yuyashpa, ama imata tapushpa, tucui c'atushcata micunguichijlla.

²⁶Cai pachapish, chaipi tucui ima tiyajcunapish Jatun Diospajmi.

²⁷Maijan mana crij cancunata cayajpi rishpaca, cancunaman tucui ima carashcataca yuyai mapayanata ama yuyashpa, ama imata tapushpa micunguichijlla.

²⁸Ashtahuanpish cancunaman maijan: “Caica rurashcalla dioscunaman rupachinapaj cushcami carca” nijpica, ama micunguichijchu. Huillajmantapish, yuyai mapayanamantapish ama micunguichijchu. Cai pachapish, chaipi tucui imalla tiyajcunapish Jatun Diospajmi.

²⁹Caishujpaj yuyai mapayanamantami chashna nini, mana canmantachu chashna nini. Shujtajpaj yuyai chashna tucunallamantaca, ñuca imatapish rurai tucuipajtaca ¿ima nishpataj jarcashca casha?

³⁰Diosta pagui nishpami micurcani. ¿Imamantataj chashna pagui nishpa micushcamantaca, juchachishpa rimashca casha ningachari?

³¹Micushpapish, ubyashpapish, tucui imata rurashpapish, Diosta jatunyachingapaj ruraichij.

³²Judiocunapajpish, mana judiocunapajpish, Diospaj tandanacushca crijcunapajpish ama ñitcana caichijchu.

³³Ñucapish chashnallatajmi tucui imapipish tucuicunata cushichini. Achcacuna quishpirishca cachunmi, mana ñucapajlla mashcashpa, ashtahuanpish paicunapaj allipaj mashcani.