Read Chimborazo Highland Quichua 1 CORINTIOS 12 Bible Online

1 CORINTIOS 12 - Chimborazo Highland Quichua bible

1 CORINTIOS 12

¹Huauquicuna, Diospajta rurachun cushca rurai tucunamantaca mana yachajcuna shina cachunca mana munanichu.

²Diosta manaraj rijsijcuna cashpa, ima shina cashcataca yachanguichijmi. Cancunaca rurashcalla, upa dioscunapajman apajpimi chingarishca carcanguichij.

³Chaimantami caitaca yachaj chayachini. Pipish Diospaj Espiritumanta rimashpaca: “¡Jesustaca imapish tucunman!” mana ningachu. Chashnallataj jucha illaj Espiritullamantami pipish: “¡Jesusca Mandajmi!” ni tucun.

⁴Diospajta rurachun cushca rurai tucunaca ch'ican ch'icanmi tiyan, ashtahuanpish chai rurai tucunata cuj Espirituca shujllami.

⁵Diospajta ruranacunaca ch'ican ch'icanmi tiyan, ashtahuanpish Mandaj Jesusca shujllami.

⁶Ruraicunaca ch'ican ch'icanmi tiyan, ashtahuanpish tucuita tucuicunapi rurachij Diosca shujllami.

⁷Ashtahuanpish Espíritu rurachishcacuna ricurichunmi, tucuicunapaj allipaj cada quiquinman cushca.

⁸Diosca paipaj Espirituhuanmi shujmanca alli yachaihuan rimachun, caishujmanpish chai Espiritullahuantaj alli yuyaihuan rimachun cushca.

⁹Shujtajmanca chai Espiritullahuantajmi crinata, caishujmanca chai Espiritullahuantajmi alliyachi tucunata cushca.

¹⁰Shujtajmanca milagrocunata rurajta, caishujmanca profeciata, chaishujmanca ima espíritu rimachicushcata agllajta, caishujmanca ch'ican ch'ican rimaicunata rimajta, caishujmanca chai rimaicuna imata nisha nishcata huillaj cachunpishmi cushca.

¹¹Ashtahuanpish tucui cai ruraicunataca, shujlla Espiritullatajmi rurachicun. Cada quiquinmanmi, pai munashca shinallataj chaupin.

¹²Cuerpoca shujlla cashpapish, achca miembrocunatami charin. Cuerpopaj miembrocunaca achcacuna cashpapish, tucuicunami chai cuerpopajlla, chashnallatajmi Cristopaj cuerpopish.

¹³Shuj cuerpolla canapajmi tucuicuna shuj Espiritullapi bautizashca carcanchij. Judiocuna cajpi, griegocuna cajpi, amopajta ruraj cajpi, amopajta mana ruraj cajpipish, tucuicunamanmi chai Espiritullamantataj ubyachirca.

¹⁴Cuerpoca mana shuj miembrollatachu charin, ashtahuanpish achca miembrocunami.

¹⁵Chaquica: “Mana maqui cashcamantaca, mana cuerpopajchu cani” ningachari. Chashna nishpapish ¿manachu cuerpopajllataj?

¹⁶Rinrinpish: “Mana ñahui cashcamantaca, mana cuerpopajchu cani” ningachari. Chashna nishpapish ¿manachu cuerpopajllataj?

¹⁷Tucui cuerpo ñahui cajpica ¿rinrinca maipishi canman? Tucui cuerpo rinrin cajpica ¿singaca maipishi canman?

¹⁸Ashtahuanpish cunanca Diosmi cada miembrota cuerpopica, pai ima shina churasha nishcapi churashca.

¹⁹Tucuicuna shuj miembrolla cajpica ¿maipishi cuerpoca canman?

²⁰Ashtahuanpish cuerpo shujlla cajpipish, miembrocunaca achcacunami.

²¹Chaimanta ñahuica maquitaca: “Cantaca mana minishtinichu” mana ni tucunchu. Umapish chaquicunataca: “Cancunataca mana minishtinichu” mana ni tucunchu.

²²Shina cashpapish cuerpopaj miembrocunaca, imapaj mana caj shinacunami ashtahuan minishtirin.

²³Cuerpopi manapish alli nipaj miembrocunapirajmi, ashtahuan alli churarinchij. Ñucanchijpi caj manapish allichirinacunatarajmi, ashtahuan allichirinchij.

²⁴Ñucanchijpaj allipaj cajcunaca, ashtahuan allichishca canataca mana minishtinchu. Ashtahuanpish ñucanchij mana alli nishcacunataca, Diosmi ashtahuan alli nishpa churashca.

²⁵Cuerpopica ch'icanyarinacui ama tiyachun, tucui miembrocuna caishujmanta chaishujmanta yuyarinacuchunmi chashna allichishca.

²⁶Chaimantami shuj miembro llaqui tucujpica, tucuicuna paihuan llaquirin. Chashnallatajmi shuj miembrota alli nijpica, tucuicuna paihuan cushicun.

²⁷Cancunaca Cristopaj cuerpomi canguichij. Cada quiquin chai cuerpopaj miembrocunami canguichij.

²⁸Diosca, tandanacushca crijcunapica puntaca apostolcunata, chai q'uipaca profetacunata, ishquipaj q'uipaca yachachijcunata, chaipaj q'uipaca milagrocunata rurajcunata, chaipaj q'uipaca alliyachijcunata, ayudajcunata, mingashcata alli apajcunata, shujtaj rimaita rimai tucujcunatapishmi churarca.

²⁹¿Tucuicunachu apostolcuna? ¿Tucuicunachu profetacuna? ¿Tucuicunachu yachachijcuna? ¿Tucuicunachu milagrocunata rurancuna?

³⁰¿Tucuicunachu alliyachi tucuchun cushcata charincuna? ¿Tucuicunachu rimaicunata rimancuna? ¿Tucuicunachu chai rimaicuna imata nisha nishcata huillancuna?

³¹Chashna cajpipish Dios cushca rurai tucunataca, ashtahuan allita munaichij. Cunan ñucaca, cancunamanca ashtahuan alli ñantami ricuchigrini.