Read Chimborazo Highland Quichua 1 CORINTIOS 14 Bible Online

1 CORINTIOS 14 - Chimborazo Highland Quichua bible

1 CORINTIOS 14

¹C'uyaj canata catichij, Diospajta rurachun cushca rurai tucunata munaichij. Tucuimanta yallica, Dios ima nishcata huillana yuyailla caichij.

²Maijanpish rimaicunapi rimajca mana gentecunamanchu riman, ashtahuanpish Dioshuanmi riman. Pi mana yachashcacunata Espíritu rimachijpipish, pi mana entendinchu.

³Ashtahuanpish Dios ima nishcata huillajca, sinchiyachingapaj, yuyachishpa rimangapaj, cushichingapajpishmi gencunamanca huillan.

⁴Mana rijsishca rimaipi rimajca, paillatajmi sinchiyarin. Ashtahuanpish Dios ima nishcata huillajca, tandanacushca crijcunatami sinchiyachin.

⁵Ñucaca, tucui cancuna shujtaj rimaicunata rimachun munaimanchari. Shujtaj rimaicunata rimaj canata yallica Dios huillachishcata huillanami ashtahuan alli. Shujtaj rimaicunata rimashca ima nisha nishcata huillaj tiyajpimi, tandanacushca crijcuna sinchiyanapajca Dios huillachishcata huillashca shinallataj.

⁶Cunanca huauquicuna, cancunapajman ñuca rishpaca, Dios imata ricuchishcahuan, alli yachashcahuan, Dios imata huillachishcahuan, alli yachachinahuan mana yachachishpa, rimaicunallapi rimajpica ¿imatataj japinguichigari?

⁷Shinallataj ima tocanacuna uyarijpipish, flautaca flauta shina, arpaca arpa shina mana uyarijpica ¿ima shinataj flautapi tocacushcata, mana cashpaca arpapi tocacushcataca yachangacunari?

⁸Macanacuiman rinataj shina tono trompetapi mana uyarijpica ¿pitaj macanacunapajca allichiringari?

⁹Cancuna rimashpapish, entendinalla shimipi mana rimajpica, ¿ima shinataj imata nicushcataca entendingacuna? Chaica huairapi rimarishca shinallami canman.

¹⁰Cai pachapica, tucui laya rimaicunatajmari tiyan. Chaicunamantaca, shujllapish ima nisha nishca illajlla mana canchu.

¹¹Ashtahuanpish chai shimicuna ima nisha nishcata ñuca mana yachaj cajpica, chaita rimacujpajca shujtaj llajtamanta caj shinami ñucaca caiman. Chaita rimajpish ñucapajca, shujtaj llajtamanta caj shinallatajmi canman.

¹²Diospajta rurachun cushca rurai tucunata ñaqui munanguichij. Chashna munashpaca tandanacushca crijcunata sinchiyanapaj caj rurai tucunata yallitaj munaichij.

¹³Chashna cashcamanta maijanpish mana rijsishca rimaipi rimajca, chai imata nisha nishcata huillai tucungapajca Diosta mañachun.

¹⁴Mana rijsishca rimaipi ñuca mañajpica, ñuca espiritullami mañan. Ashtahuanpish ñuca yuyaica chushajllami saquirin.

¹⁵Shinashpaca ¿imatataj rurana cani? Espiritupi mañashpapish, entendishpami mañasha. Espiritupi cantashpapish, entendishpami cantasha.

¹⁶Espiritullapi Diosta alli nijpica, manaraj yachajca can ima nishcata mana yachashcamantaca, Diosta can pagui nijpipish ¿ima shinataj “Chashna cachun” ningari?

¹⁷Canca sumajtami Diosta pagui ninguitaj, ashtahuanpish caishujca mana sinchiyanchu.

¹⁸Ñucaca rimaicunapica tucui cancunata yallimi rimani. Chaimantami Diostaca pagui nini.

¹⁹Ñucaca tandanacushca crijcunahuan cashpa chunga huaranga shimicunata shujtaj rimaipi rimanapaj randica, shujtajcunata yachachingapajca pichca shimicunallatami alli yuyarishpa rimasha nini.

²⁰Huauquicuna, yuyanapajca ama huahuacuna shina caichijchu, ashtahuanpish yuyajcuna shina yuyaichij. Ima mana allipajca, huahuacuna shina caichij.

²¹Mandashcapica, cashnami quillcashca tiyacun: “Cai llajtapi causajcunataca shujtaj rimaita rimajcunahuan, caru llajtamanta shamujcunahuanmi rimasha. Chashna rimajpipish, ñucataca manataj uyangacunachu ninmi Jatun Diosca”.

²²Rimaicunapi rimanaca crijcunapajca mana ima ricuchina canchu, chaica mana crijcunapajllami. Ashtahuanpish Dios ima nishcata huillanaca, mana crijcunapajca mana canchu, crijcunapajllami.

²³Crijcuna tandanacunapi tandanacushpa, tucuicuna rimaicunapi rimacujpi, manaraj yachajcuna, mana cashpaca mana crijcuna yaicushpaca ¿manachu lococunamari canguichij ningacuna?

²⁴Shinallataj tucuicuna Dios ima nishcata huillacujpi maijan mana crij, mana cashpaca manaraj yachajpish yaicushpa, tucuicuna imalla huillajta uyashpaca, pai juchayuj cashcatami yuyaringa.

²⁵Paipaj shungupi ima pacalla cashcacunami ricuringa. Chaipimi pambaman tupajta cumurishpa, Diosca cancunapurapitajmari cashca nishpa Diosta adoranga.

²⁶Shina cajpica huauquicuna, ¿imatataj nishun? Cancuna tandanacushcapica, cada quiquinmi Salmota, yachachinata, rimaipi rimanata, Dios ricuchishcata huillanata, imata nisha nishcata huillanata charinguichij. Chai tucuicunataca sinchiyangapaj ruraichij.

²⁷Mana rijsishca rimaipi maijan rimashpaca, ishqui cashpa, quimsa cashpapish chaicunalla shuyanacushpa rimachun. Shujca ima nisha nishcata huillachun.

²⁸Ima nishcata huillaj mana tiyajpica, crijcuna tandanacushcapica upalla cachun, paipajlla Diospajlla rimachun.

²⁹Chashnallataj profetacunapish ishqui cashpa, quimsa cashpapish chaicunalla rimachun. Caishujcunaca paicuna ima nishca alli cashcata, mana alli cashcata ricujcuna cachun.

³⁰Maijan chaipi tiyacujman Dios imata ricuchishcata huillasha nijpica, caishuj rimacujca upallachun.

³¹Dios ima nishcata huillajcunaca tucuicunami shuj shujlla huillana canguichij. Chashna huillajpimi, tucuicunallatataj yachachishca tucuicunallatataj yuyachishpa cunashca cangacuna.

³²Profetacunapaj espiritucunaca, profetacunataca cazunmi.

³³Diosca mana muspachij Dioschu, ashtahuanpish sumaj causaita cujmi. Jucha illajlla tandanacushca crijcunapi maipi cashpapish caj shinallataj,

³⁴cancunapaj huarmicunaca tandanacuicunapica, mana rimana cashcamanta upalla cachun. Ashtahuanpish cazuj cachun, Mandashcapipish chashnallatajmi nin.

³⁵Imata yachasha nishpaca, paicunapaj cusacunata huasipi tapuchun. Tandanacuipi huarmicuna rimanaca mana alli ricurinchu.

³⁶¿Diospaj Shimica cancunamantachari callarirca, cancunapajllamanchari chayarca?

³⁷Maijanpish profetami cani nij cashpapish, mana cashpaca Taita Diospaj Espíritu yuyaita cujpi huillajmi cani nij cashpapish, cancunaman ñuca quillcashcacunaca, Mandaj Jesús mandashcacuna cashcata yachachun.

³⁸Maijanpish mana chaichu nijtaca, paitapish mana chasquishcami canga.

³⁹Chashna cajpica huauquicuna, Dios ima nishcata huillana yuyailla caichij, rimaicunapi rimajtaca ama jarcaichijchu.

⁴⁰Ashtahuanpish tucui imatapish rurana cashca shina allita ruraichij, ama maipish cachun ruraichijchu.