Read Chimborazo Highland Quichua 1 CORINTIOS 2 Bible Online

1 CORINTIOS 2 - Chimborazo Highland Quichua bible

1 CORINTIOS 2

¹Huauquicuna, cancunaman Dios huillachishcata huillagrishpaca, manamari yalli sumaj shimicunahuan, yachaisapa tucushpa rircanichu.

²Cancunapurapi cashpaca, ima shujtajta mana yuyashpami, ashtahuanca Jesucristota, paita chacatashcata huillana yuyailla carcani.

³Cancunapurapi cashpaca irqui shina, achca manchaihuan chujchucujmi carcani.

⁴Ñuca rimashpapish, ñuca huillashpapish mana gentecunapaj yachashca uyananqui shimicunahuanchu huillarcani. Ashtahuanpish Espíritu ricuchishcahuan, poderhuanmi huillarcani.

⁵Cancunapaj crishcaca, ama gentecuna yachaj cashcahuan callarichishca cachun, ashtahuanpish Diospaj poderhuan callarichishca cachunmi chashna huillarcani.

⁶Shina cajpipish sinchi crij canaman chayashcacunamanmi Diospaj yachaitaca rimacunchij. Cai pachapaj yachanacunamanta, cai pachata mandajcunapaj yachanacunamantaca mana rimacunchijchu. Chaicunaca chingarijllacunami.

⁷Ashtahuanpish Diospaj pacallapi tiyacuj yachaimantami huillacunchij. Paipaj pacallapi caj yachaitaca, ñucanchijta sumajyachingapajmi cai pacha manaraj tiyajpi ña charicushca.

⁸Diospaj yachaitaca, cai pachata maijan mandajpish mana rijsircachu. Rijsishca cashpaca, sumaj achij nicujmanta Mandajtaca manataj chacatanmanchu carcacuna.

⁹Shina cajpipish cashnami quillcashca tiyacun: “Ñahui mana ricushcata, rinrin mana uyashcata, pi mana shungupi yuyashcatapishmi, Diosca, paita c'uyajcunapajca allichishca” ninmi.

¹⁰Ashtahuanpish Diosca, paipaj Espirituhuanmi chaicunataca ñucanchijmanca ricuchishca. Espirituca, Diospaj tucui imalla yachaitaca tucuitami alli yachan.

¹¹Pi cashpapish shujtaj imata yuyacushcataca mana yachanchu. Paipaj espiritullami yachan. Shinallataj Diospaj yuyaitapish pi mana yachanchu. Paipaj Espiritullami yachan.

¹²Ñucanchijca mana cai pachapaj espiritutachu chasquircanchij, ashtahuanpish Diosmanta shamuj Espiritutamari, Dios cushcacunata yachangapaj chasquircanchij.

¹³Caicunataca mana gentecunapaj yachaita yachachishca shimicunahuanchu rimanchij. Ashtahuanpish Espíritu yachachishca shina, allichishpami Diospajllata rimanchij.

¹⁴Ashtahuanpish aichallamanta huacharishca cajca, Diospaj Espiritupajtaca mana yachasha ninchu. Chaicunaca paipajca musparishca shina cajpimi, mana entendi tucun. Espíritu yuyachijllapimi agllai tucun.

¹⁵Ashtahuanpish Espiritupajlla cajca, alli cashcata mana alli cashcatapish tucuitami yachan. Paitaca pi mana imata ni tucunchu.

¹⁶Jatun Diospaj yuyaitaca ¿pitaj yacharcari? Paitaca ¿Pitaj yachachingari? Ñucanchijca, Cristopaj yuyaitami charinchij.