Read Chimborazo Highland Quichua 2 CORINTIOS 11 Bible Online

2 CORINTIOS 11 - Chimborazo Highland Quichua bible

2 CORINTIOS 11

¹¡Loco shina ñuca rimarishcata uyai tucunguichijpishchari! Ima shinapish uyapaichigari.

²Cancuna shujtajpaj ama tucuchun ninaca, Diosmantami shamun. Cancunataca shujlla cusahuan cazarachingapajmi ari nishcata charini, paica Cristomi. C'arihuan manaraj chayarinacushca chuyatami, paipajman chayachina cani.

³Chashna cajpipish culebra achca yachaj cashpa Evata umashca shinallataj, cancunatapish tucui shunguhuan mana nij tucushpalla Cristota c'uyacushca yuyaicunata ima shinapish umashpa cungachinatami manchacuni.

⁴Ñucanchij huillashca q'uipa, maijanpish Jesusmanta shujtaj shina huillaj shamujtaca sumajta uyanguichijllami. Espirituta chasquishca jahuamari, shujtaj espirituta chasquinguichij. Alli huillaita uyashca jahuamari, shujtaj shina huillashcatapish sumajta uyanguichij.

⁵Apostolcunami canchij nij jatun tucushcacunamantaca ñucaca imapi paicunamanta yalli uchilla cashcataca mana yuyanichu.

⁶Ñucaca maipish cachun rimashpapish, yachaipica mana chashna canichu. Chaitaca ima shinapish tucuipi rurashcahuanmi, cancunamanca ricuchircanchij.

⁷Ñucaca mana jatun tucushpa Diospaj alli huillaita, imata mana mañashpa huillashpaca cancunata jatunyachingapajmi chashna huillarcani. ¿Chashna rurashpachu juchallircani?

⁸Cancunapajta rurangapajca tandanacushca shujtaj crijcunapajtami, paicuna cullquita cujpica, shuhuaj shina tucurcani.

⁹Cancunapajpi cashpaca ñuca causanapajca pita mana mañarcanichu. Macedoniamanta shamuj huauquicunami, ñuca causanapajca curca. Paicuna cujpimi, cancunataca imata mana p'iñachircani, chashnalla catinatami munani.

¹⁰Cristopaj mana llulla shimica ñucapimi. Chaimanta ñuca sumajyarinataca Acaya llajtacunapi pi mana jarcangachu.

¹¹¿Ima nishpataj chashna rimani? ¿Cancunatachu mana c'uyani? Diospish chaitaca yachanmi.

¹²Ñucanchij shina huillashpa cushicushun nijcuna ama cushicuchunmi, ñuca ima shina ruracushcataca chashnallataj ruracushalla.

¹³Chaicunaca nij tucushcalla apostolcunami, umashpa purijcunallami, Cristopaj apostolcuna shina tucujcunallami.

¹⁴Chaicunataca, imata mana manchachinchu. Satanasllatajpish, achij nicuj ángel shina tucunllami.

¹⁵Chashna cajpica, Satanaspajta rurajcunapish cashcata rurajcuna shina tucujpica, ima mushuj mana canchu. Chaicunaca, paicuna ima shina rurashca shinallatajmi tucuringacuna.

¹⁶Ñucataca pi ama locomi yuyachunmi cutinllataj cashna nigrini: Chashna yuyacushpapish, ñuca ashata jatun tucungapaj loco shina rimashcata uyapaichij.

¹⁷Chashna rimashpaca, mana Mandaj Jesús munashca shina rimanichu, ashtahuanpish jatun tucusha nishpatajmi loco shina rimarini.

¹⁸Achcacuna aicha yuyashca shina jatun tucucujpica, ñucapish chashnallatajmi jatun tucusha.

¹⁹Cancunaca yachajcuna cashpami, rumi shungucunataraj uyanguichijlla.

²⁰Cancunata maijan huatashcata shina charijpipish, maijan millpusha nicujpipish, maijan cancunapajta quichujpipish, maijan jatun tucushca cajpipish, maijan ch'ajyachijpipish chaicunatarajmi ahuantanguichijlla.

²¹Caitaca pinganacujpipishmi nisha nini. Ñucanchijca paicuna rurashca shina ruranapajca irqui shinami carcanchij. Shina cashpapish shujtajcuna imapipish jatun tucujpimi, (ñucapish loco shina rimarini).

²²¿Paicunaca hebreocunachu? Ñucapish chaillatajmi cani. ¿Israelcunachu? Ñucapish chaillatajmi cani. ¿Abrahampaj huahua huahuacunachu? Ñucapish chaillatajmi cani.

²³¿Paicunaca Cristopajta rurajcunachu? (Loco shina rimarij cashpapish ñucamari paicunamanta yalli trabajani). Mana yupaipajta azotishcami carcani, carcelpi churashcami carcani, tauca cutinmi huañunallapi carcani.

²⁴Judiocuna pichca cutin, quimsa chunga iscunta azotishcami carcani.

²⁵Quimsa cutinca caspihuan macashcami carcani, shuj cutinca rumicunahuan shitashcami carcani. Ñuca ricun barco quimsa cutin yacupi huashicujpimi cazi ahogarircani, shuj cutinca shuj punlla shuj tutatami, mama cucha yacupi carcani.

²⁶Tauca cutinmi ñancunapi, jatun yacucunapi, shuhuacuna manchai, ñuca llajtapi causajcuna manchai, mana judiocuna manchai, pueblocunapipish, shitashca pambacunapipish huañuchina manchai, mama cucha yacupi huañuna manchai, crij canchij nij tucujllacuna manchaipishmi carcani.

²⁷Shaicuitami trabajarcani, tauca cutinmi mana dormishca carcani. Yaricaihuan, yacunaihuanmi carcani, tauca cutinmi ayunarcani, churana illajlla achca chirihuanpishmi carcani.

²⁸Ima shujtajcunamantapish yallica punllantami, maipipish tandanacushca crijcuna yuyailla cani.

²⁹Maijan ungushca shina cajpica, ñuca chashna cashca shinatami yuyani. Maijanta pandachijpica yallitajmi llaquirini.

³⁰Imamanta jatun tucuna cajpica, ñucaca imata mana rurai tucuj shina cashcamantami, jatun tucusha.

³¹Ñuca mana llullacushcataca, ñucanchijta Mandaj Jesucristopaj Yaya, Taita Diosmi yachan. Paica huiñai huiñaita alli nishcami.

³²Damascopi ñuca cajpica, chai llajtata mandachun jatun mandaj Aretas churashca mandajmi, ñucata japingapaj chai pueblomanta llujshina pungucunapi chapajcunata churarca.

³³Chashna cajpipish, pueblo muyundij pirca shuj ventanata shuj canastapi cacharijpimi, paicunapaj maquimantaca quishpirircani.