Read Chimborazo Highland Quichua 2 CORINTIOS 12 Bible Online

2 CORINTIOS 12 - Chimborazo Highland Quichua bible

2 CORINTIOS 12

¹Ñucallamantataj jatun tucushpaca imata mana surcushachu. Ashtahuanpish muscuipi shina Mandaj Jesusmanta ricushcata pai ricuchishcacunamantami rimasha nini.

²Cristota crij shuj runata rijsinimi. Chai runataca, quimsa jahua pachacamami apashca carca. Chaica ñami chunga chuscu huata tucun. (Chai runataca cuerpondijtachu, cuerpo illajllatachu apashca carca imachari, mana yachanichu. Diosllami yachan.

³Chai runataca cuerpondijtachu, mana cashpaca cuerpo illajllatachu apashca carca, imachari, mana yachanichu. Diosllami yachan). Chai runataca rijsinimi.

⁴Chai runataca, paraíso sumaj llajtamanmi apashca carca. Chaipimi pi manaraj uyashca, pi mana parlaipaj rimashcata uyarca.

⁵Chai runamantami jatun tucusha. Ñucallamantatajca mana jatun tucushachu, ashtahuanpish ñucaca imata mana rurai tucuj shina cashcallamantami jatun tucusha.

⁶Shina cajpipish jatun tucuiman yuyanimi. Cashcallata rimajpica, mana upa shina rimashca canmanchu. Ashtahuanpish ñucata ricushcamanta, ñuca rimashcata uyashcamanta, ama yallihuan imata yuyachunca saquinillami.

⁷Dios ricuchishcacunahuan ama jatun tucuchunca Satanás cachashcamari. Garrochahuan tujsij shina ñuca aichapi jatun nanaita curca. Chaimi ñuca ama yalli jatun tucuchun, ñucataca huajtashpa llaquichicunlla.

⁸Chaimantami ñucamanta cai jatun nanaitaca anchuchipai nishpa, Mandaj Jesusta quimsa cutin mañarcani.

⁹Chashna mañajpipish, paica: “Ñuca mana c'uyaipajta c'uyashcahuan cushicui. Irquilla cajpimi ñuca poderca ashtahuan alli jundanga” nircami. Chaimanta ñucaca Cristopaj poder ñucapi causachunca, tucui munaihuanmi ashtahuanpish irquilla cashpaca jatun tucusha.

¹⁰Cristota c'uyashcamantaca irquilla cashpapish, c'amishpa rimajpipish, ima illajlla cashpapish, catirashpa llaquichijpipish, ima llaquicunapi cashpapish cushicuihuanmi cani. Chashna irquilla cashcapimi, ashtahuan sinchi tucuni.

¹¹Ñucaca jatun tucushpa rimarishpaca, ch'ahuan shinami tucushcani. Cancunamantamari chashnaca tucuni. Cancunami ñucataca, paica allimari nina carcanguichij. Ñucaca ima mana cashpapish, apostolcunami canchij nij jatun tucushcacunamantaca imapi paicunamanta yalli uchilla cashcataca mana yuyanichu.

¹²Apostoltaj cashcata ricuchingapajca cancunapurapica ricuchinacunata, mancharinacunata, milagrocunatapish mana p'iñarishpami rurarcani.

¹³Shujtajpi caj tandanacushca crijcunamantaca ¿imapitaj uchilla carcanguichij? Ñucallatajmi cancunataca mana mañarcani. ¡Chashna llaquichishca cajpica, perdonanguichij!

¹⁴Cai cutinhuanca quimsa cutinmi cancunata ricuj shamungapajca, allichirishca cani. Cancunata yalli p'iñachingapajca mana shamushachu, cancunamanta imata japinallataca mana munanichu. Ashtahuanca cancuna alli cachunmi munani. Mana huahuacunachu yaya mamapajca mashcarina, ashtahuanpish yaya mamamari huahuacunapajca mashcarina.

¹⁵Ñucapaj imalla tiyashcacunataca, cushicuihuan tucuchishallami. Cancunapaj almacunata c'uyashcamantaca ñucallatajpish tucurishallami. Chashna ashtahuan ñuca c'uyajpipish, cancunaca ashtahuan ashtahuanmi mana c'uyanguichij.

¹⁶Cancunamanta imata mana japishcata yachashpapish maijancunaca, paica yachaj cashcahuanca ima shinapish umashcallatajmi canga nincunami.

¹⁷¿Ñucaca maijancunata cancunapajman cachashpachu, cancunataca chashna umarcani imatagari?

¹⁸Titotami ripai nishpa, caishuj huauquindij cacharcani. ¿Titochu cancunapajta umashpa aparca? ¿Manachu ñucanchijca ishquindijtaj chai espiritullahuantaj ruranchij, chai shinallataj purinchij?

¹⁹¿Cancunaca ñucanchijta ama imata nichunmi chashna nicun yuyanguichijchu? Yallitaj c'uyashcacuna, Dios ricucunpimi Cristomanta cancuna sinchiyachun chashna rimanchij.

²⁰Ñuca chayanapajca cancunaca mana ñuca munashca shina canata, ñucapish cancuna munashca shina mana canatami manchani. Cancunapurapica p'iñanacushpa rimanacui, envidianacui, p'iñarinacui, chaupirinacui, imapish tucushca canman ninacui, huashalla parlanacui, jatun tucunacui, imapish maipish cachun cajta japinatami manchani.

²¹Ñuca cutin ricuj shamujpica, cancunapurapi Dios ñucata pingachinatami manchani. Cancunapuramanta achcacuna millaita sarunman rurashcata, huainayashcata, aicha munaita mana jarcari tucushcamanta Diospajman mana cutirishca cajpica, achcata huacanapish cangachari.