Read Chimborazo Highland Quichua 2 CORINTIOS 13 Bible Online

2 CORINTIOS 13 - Chimborazo Highland Quichua bible

2 CORINTIOS 13

¹Cunan cai cutinhuanca, ña quimsa cutinmi cancunataca ricuj shamugrini. Ishqui cashpa, quimsa cashpa ricujcunahuanmi imatapish allichina canga.

²Sarunman nishca shinallatajmi carupi cashpapish cancunahuan cashca shina ñaupaman juchallijcunamanta tucui shujtajcunamantapish cashna quillcani. Cancunapajman shamushpaca chaicunataca manataj llaquishpami anchuchisha.

³Cristo ñucapi rimacushcata mashcajcunaca caipimi ricunguichij. Paica cancunahuanca mana irquichu, ashtahuanpish cancunapica poderyujmi.

⁴Irqui shina cajpi chacatashca cashca cashpapish Diospaj podermantami causacun. Ñucanchijpish Cristopica irquicunami canchij, ashtahuanpish Diospaj poderhuan Cristohuanca cancunapajca causacunchijmi.

⁵Crijtaj cashcataca cancunallataj alli ricurichigari. ¿Ima shina cashcataca cancunallataj ricurichigari? ¿Manachu cancunallataj rijsiri tucunguichij? Jesucristo cancunapi cashcata mana yachashpaca, mana alli crijcunami ricuringuichij.

⁶Ñucanchijtaca crijtaj cashcata ricucujpi mana urmashcataca yachanami canguichij.

⁷Shinallataj ima millaita cancuna ama rurachunmi, Diostaca mañaracunchij. Ñucanchijtaca paicunaca crij cashcata ricucujpica, urmashcami nicujpipish mana ñucanchijllataj alli ricuringapajchu, ashtahuanpish cancuna allita rurachun nishpami mañacunchij.

⁸Ñucanchijca mana llullata mana allichu nijcunaca mana canchijchu, ashtahuanpish mana llullata alli nijcunami canchij.

⁹Chaimi ñucanchij irquicuna shina cajpipish, cancunaca sinchicuna cashcamanta cushicunchij. Cancuna allitaj crij canaman chayachunmi Diostaca mañaracunchijlla.

¹⁰Cancunapajman rishpaca, ama sinchita rimashpa mandangapajmi manaraj chaipi cashpa quillcani. Mandaj Jesusca ñucataca mana cancunata chingachichunchu cai ruranataca curca, ashtahuanpish allitaj crij canaman chayachichunmi curca.

¹¹Tucuimanta yallica huauquicuna cushicuita charichij, allitaj crij canaman chayaichij, caishuj chaishuj cushichinacuichij, shuj shinalla yuyaichij, sumajta causaichij. Chashna cajpica sumaj causaitapish, c'uyaitapish cuj Diosca cancunahuanmi canga.

¹²Jucha illaj muchahuan caishuj chaishuj alli canguichij ninacuichij.

¹³Tucui jucha illajcunami cancunataca alli cashca cachun nincuna.

¹⁴Mandaj Jesucristopaj mana c'uyaipajta c'uyaj canapish, Taita Diospaj c'uyaipish, jucha illaj Espiritumanta shujlla canapish tucui cancunahuan cashca cachun. Chashna cachun.