Read Chimborazo Highland Quichua 2 CORINTIOS 2 Bible Online

2 CORINTIOS 2 - Chimborazo Highland Quichua bible

2 CORINTIOS 2

¹Chaimanta ama llaquirinacungapaj nishpami, cutin cancunapajman mana shamunata yuyarircani.

²Cancunahuan ñuca llaquirinacujpica, ¿pitaj ñucataca cushichingari? Ñucahuan llaquirinacushcacunallatajmari ñucataca cushichingacuna.

³Chaimanta ña quillcashca shinallatajmi quillcarcani. Cushicuna cashcacunallahuantaj llaquirinacui ama tiyachun nishpami, mana shamurcani. Ñuca cushijlla cajpica, tucui cancunapish cushijlla cana cashcataca allimi yacharcani.

⁴Shungupi achca llaquihuan cashpami, achca huiqui ñahui cancunamanca quillcarcani. Mana llaquichingapajchu, ashtahuanpish ñuca cancunata jatunta c'uyashcata yachachunmi chashna quillcarcani.

⁵Maijanpish ñucata llaquichishpaca, mana ñucallatachu llaquichishca, ashtahuanpish shuj yuyaipica (cancunata ama yalli llaquichingapajmi cashnalla nini) tucui cancunatapishmi llaquichishca.

⁶Chai mana allita rurajtaca, taucacuna sinchita rimacushcaca, ña chailla cachun.

⁷Ashtahuanpish yallitaj llaquihuan ama tucuricuchun paitaca perdonashpa cushichinami canguichij.

⁸Chaimantami cancuna cutin paita c'uyashcata ricuchipaichij nini.

⁹Ñuca tucui ima nishcata cazuj cashcata, mana cazuj cashcatapish ricungapajmi sarunca chashna quillcarcani.

¹⁰Maijanta cancuna perdonajpica, ñucapish perdonarcanimi. Imata perdonana tiyashca cajpica, cancunapaj allipajmi Cristo ricucujpi ña perdonarcani.

¹¹Satanasca, ñucanchijmanta imata ama cushicuchunmi perdonarcani. Paica ima shinapish millaita ruranata yachaj cashcataca yachanchijmi.

¹²Troas pueblopi Cristomanta alli huillaita huillangapaj chayajpica, Mandaj Jesusmi punguta pascarca.

¹³Shina cajpipish ñuca huauqui Titota mana japishpaca, ñuca espiritupica llaquillami carcani. Chaimantami chaipi cajcunata, cayacama nishpaca Macedoniaman rircanilla.

¹⁴Paipaj mishquiman ashnajlla yachaitaca tucuipi huillachunmi, ñucanchijtaca tucui imapipish mishachishpa pushacunlla. Chaimantami Diostaca pagui nicunchij.

¹⁵Quishpichishcacunapurapipish, chingarinaman ricujcunapurapipish Cristomantami Diospajca mishquiman ashnajlla canchij.

¹⁶Chingarinaman ricujcunataca chai ashnaica huañuiman chayachijmi, ashtahuanpish quishpichishcacunataca causaiman chayachijmi. Chashna cajpica ¿pitaj chai shinaca rurai tucungari?

¹⁷Ñucanchijca, mana shujtaj achcacuna shina imata japingaraiculla chagrushpa Diospaj Shimita huillajcunachu canchij. Ashtahuanpish Dios cachashca cashpami mana nij tucushpalla Cristohuanca Diospaj ñaupajpi huillacunchij.