Read Chimborazo Highland Quichua 2 CORINTIOS 4 Bible Online

2 CORINTIOS 4 - Chimborazo Highland Quichua bible

2 CORINTIOS 4

¹Chaimantami cai ruranataca, Dios ñucanchijta llaquishpa cushcata chasquishcamantaca mana shaicurinchij.

²Ashtahuanpish tucui ima pacalla pinganayaj ruranataca saquircanchijmi. Mana umashpa purishpami, Diospaj Shimitaca mana chagrushpa ashtahuanpish tucuita mana llullashpa huillarcanchij. Diospaj ñaupajpi ñucanchij ima shina cashcata, cancunapaj yuyaillapitaj ricuchunmi mingarinchij.

³Ashtahuanpish ñucanchij alli huillaica tapashca shinaraj cashpaca, chingarinaman rijcunapajllami chashna tapashca shinaca.

⁴Cristopaj sumaj alli huillai luz ama achijyachichunmi, cai pachapaj diosca mana crijcunapaj yuyaicunataca tapashca. Cristoca, Dios ima shina cajta ricuchijmi.

⁵Ñucanchijca mana ñucanchij quiquinmantachu huillacunchij, ashtahuanpish Jesucristoca Mandaj cashcata, ñucanchijca Jesuspaj c'uyaihuan cancunapajta rurajcuna cashcatami huillacunchij.

⁶Amsata achijyachi nishpa luzta mandaj Diosmi, ñucanchij shungupica achijyachij luzta churarca. Jesucristopaj ñahuipi Dios sumaj cashca ricurishcata alli yachashpa shujtajcunaman yachaj chayachichunmi chashna rurarca.

⁷Tucuita rurai tucunaca Diosmanta shamuj cashcata, mana ñucanchijmanta cashcata ricuchingapajmi, cai sumaj allitaca allpa vasocuna shinalla ñucanchij cuerpopi charicunchij.

⁸Tucuipi llaquichishcacunami canchij, shina cashpapish mana yallitaj llaquirinchijchu. Musparishca shina cashpapish, mana llaquirishcalla canchijchu.

⁹Catirashpa llaquichishcacunami canchij, ashtahuanpish mana shitashcatajchu canchij. Urmachishcacunami canchij, ashtahuanpish ñutuchishcacunaca mana canchijchu.

¹⁰Ñucanchij cuerpopi Jesusca causacushcata ricuchingapajmi, maita rishpapish ñucanchij cuerpopi llaquita apashpa, Jesús huañushcataca ricuchicunchijlla.

¹¹Jesús causarishcapish ñucanchij huañunalla cuerpopi ricurichunmi Jesusmantaca, cai causaipica huañunalla puricunchij.

¹²Chashnami huañuica ñucanchijtaca catiracun, ashtahuanpish cancunaca causaiyujmari canguichij.

¹³Quillcachishcapica: “Crircanimi, chaitami huillarcani” ninmi. Ñucanchijpish crishpami, chaita huillacunchij.

¹⁴Mandaj Jesusta causachij Taita Diosllataj ñucanchijtapish, Jesusta shinallataj causachishpa, cancunandij paipaj ñaupajman pushana cashcataca yachanchijmi.

¹⁵Taita Dios mana c'uyaipajta c'uyashcata achcacuna chasquishpa, achcacunallataj paita jatunmari cangui nishpa pagui nichunmi, cancunata c'uyashcamanta cai tucui llaquicunataca apacunchij.

¹⁶Chaimantami saquishalla mana ninchij. Ashtahuanpish ñucanchij jahua aicha maucayacujpipish, ucu yuyaica punllantami ashtahuan ashtahuan mushujyashpa caticun.

¹⁷Cunan caipi tucurijlla llaquicunata apanaca, tucuimanta yalli valij huiñai causayuj cashcatami ricuchicun.

¹⁸Ñucanchijca imapish ricunallacunataca, mana ricuracunchijchu. Ashtahuanpish mana ricushcacunapi yuyaimi canchij. Imapish ricunallacunaca ashacamallami, shina cajpipish mana ricushcacunaca huiñaipajmi.