Read Chimborazo Highland Quichua 2 CORINTIOS 8 Bible Online

2 CORINTIOS 8 - Chimborazo Highland Quichua bible

2 CORINTIOS 8

¹Macedoniapi tandanacushca crijcunaman Dios mana c'uyaipajta c'uyashpa, imallata cushcatami huauquicunapish yachaj chayachun nipanchij.

²Paicunaca crijtaj cashcata ricuchij jatun llaqui shamujpipish, achcatami cushicurcacuna. Ashtahuanpish imata mana charishpapish, mana llaquishpa achcata cujcuna carca.

³Paicuna cui tucushca shina, chaita yalli yallitapish cushicushpa cushcataca, ñucallataj ricushcamanta huillajmi cani.

⁴Jucha illaj cajcunamanca ñucanchijpish cushun nipanchijca nishpa cutin cutin nicujllapimi, cuchun saquircanchij.

⁵Mana ñucanchij yuyashca shinallachu, ashtahuanpish yallitamari curcacuna. Dios munashca shinami paicunallataj Mandaj Jesusmanraj curircacuna, chai q'uipaca ñucanchijmanpishmi curircacuna.

⁶Chashnami Titotaca, pai ña callarishca shinallataj cancunapurapipish, cancuna c'uyashpa imalla cushcacunataca tucuringacama tandachichun animachircanchij.

⁷Cancunaca alli crijcuna, alli yachachijcuna, alli yuyaiyujcuna, imatapish cushicushpa rurana yuyaiyujcuna, ñucanchijta c'uyajcunapishmi canguichij. Chashnallataj cancunaca yallitaj cujcuna caichij.

⁸Chashna nishpaca, mana mandanichu. Ashtahuanpish shujtajcuna achcata cushicushpa cushcata yachachun, tucui shunguhuan cancuna c'uyashcata ricuchingapajpishmi chashnaca nini.

⁹Ñucanchijta Mandaj Jesucristo, mana c'uyaipajta c'uyaj cashcataca yachanguichijmi. Paica achcata charij cashpapish, cancunata c'uyashcamantami imata mana charij huajcha tucurca. Pai huajcha tucushcamantami, cancunaca achcata charij tucushcanguichij.

¹⁰Cancunapaj allipajmi, caitaca yuyachigrini: Cancunaca, sarun huatamanmi cullquita tandachinataca callarircanguichij. Mana chaita rurashun nircanguichijllachu, ashtahuanpish rurana munaitatajmi charircanguichij.

¹¹Cunanca, cancuna callarichishcataca rurashpa catichijlla. Imallata cui tucushca shina tucui munaihuan pajtachichijlla.

¹²Maijanpish tucui shunguhuan ima charishcata cujpica, Diosca chasquinllami. Diosca imata mana charishcataca mana mañanchu.

¹³Caita nishpaca shujtajcunaca charijyachun, cancunaca imapish illajlla tucuchun mana chashna ninichu.

¹⁴Ashtahuanpish cancunapish caishujcuna shinallataj cachun nishpami, chashnaca nini. Cunan cancuna paicunapaj ima illashcata cujpica, paicunapish cancunapaj ima illashcataca cungallami. Chashna rurashpami, cancunapish paicuna shinallataj canguichij.

¹⁵Cashnami quillcashca tiyacun: “Achcata tandajpish, mana yallitaj charircachu. Shinallataj ashallata tandajpish, mana ashallata charircachu” ninmi.

¹⁶Cancuna yuyailla ñuca cashca shinallataj, Titomanpish yuyaita cushcamantami, Diostaca pagui nini.

¹⁷Titotaca ripai nishpa ñuca cunajpica, ari rishallami nircami. Paica cancunata ricugrina munaihuan cashcamantaca, tucui shunguhuanmi cancunapajmanca shamucun.

¹⁸Alli huillaita huillacushcamanta, tucui llajtacunapi tandanacushca crijcuna alli nishca huauquitapishmi paihuan cachanchij.

¹⁹Mana chaillapishchu, ashtahuanpish cushca cullquita apashpa ñucanchijhuan purichunmi, tucui llajtapi tandanacushca crijcunaca paitaca agllarcacuna. Ñucanchijca Mandaj Jesusta jatunyachingapaj, cancuna alli shunguhuan cushcata ricuchingapajpishmi chashna alli cuidashpa apacunchij.

²⁰Cai achca cullquita cushcacunata tandashcataca, pipish ama yanga juchachichun nishpami, chashna alli cuidashpa apacunchij.

²¹Ñucanchijca mana Mandaj Jesuspaj ñaupajllapi ashtahuanpish, runacunapaj ñaupajpipish, pi mana juchachishca cangapajmi alli apana yuyailla ruracunchij.

²²Paicunahuanca, shujtaj huauquitapishmi cachanchij. Paica, imapipish chai yuyailla pajtachij cashcatami tauca cutin ricurcanchij. Cancunapi shunguta churashcamantaca cunancarin ashtahuan chai yuyaillami tucun.

²³Titoca ñucahuan purij cashcamanta, cancunapaj allicunata rurajmi. Caishuj huauquicunaca Cristota jatunyachingapaj tandanacushca crijcuna cachashca huillajcunami.

²⁴Maipipish caj tandanacushca crijcunamanca, c'uyaj cashcata ricuchichij. Chashna cajpimi, ñucanchij cancunata allicunami nishcamantaca jatunyarishun.