Read Chimborazo Highland Quichua GÁLATAS 1 Bible Online

GÁLATAS 1 - Chimborazo Highland Quichua bible

GÁLATAS 1

¹Pabloca (mana runacuna mandashcamanta, mana runacuna agllashcamantachu, ashtahuanpish huañushcacunapaj chaupimanta Dios Yaya causachishca Jesucristomantami) apóstol cani.

²Ñucahuan caj tucui huauquicunandijmi, Galaciapi tandanacushca crijcunamanca:

³Dios Yayapaj, ñucanchijta Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninchij.

⁴Ñucanchij Dios Yayapaj munaita rurashpami, cai millai pachamanta llujshichingapaj ñucanchij juchacunamanta paillataj curirca.

⁵Chaimanta Diostaca, huiñai huiñaita jatunyachishca cachun. Chashna cachun.

⁶Mana c'uyaipajta c'uyaj Cristomanta Dios cayashcamantaca, ña maita anchurishpa alli huillaitaca shujtaj shina caticujpimi mancharini.

⁷Shujtaj alli huillaica mana tiyanchu. Ashtahuanpish maijancunaca, Cristopaj alli huillaitami shujtajyachishpa pandachisha nicuncuna.

⁸Ashtahuanpish cancunaman alli huillaita ñucanchij huillashca shina mana huillashpa, alli huillaita shujtaj shina huillajpica ñucanchijllatataj cashpa, jahua pachamanta angelta cashpapish llaquichinapaj cachun.

⁹Ñaupaman ña nishca shinallatajmi, cunanpish cutin nini: Cancuna chasquishca alli huillaita mana huillashpa, alli huillaita shujtaj shina huillajca llaquichinapaj cachun.

¹⁰Chashna nishpaca ¿runacuna alli nishcata, mana cashpaca Dios alli nishca canatachu mashcacuni? Mana cashpaca ¿runacunatachu cushichisha nicuni? Runacunallata cushichicushpaca, mana Cristopajta rurajchu caiman.

¹¹Ashtahuanpish huauquicuna, cancunamanca caitami yachaj chayachini. Ñuca huillashca alli huillaica, mana runacunapaj yuyaimantachu.

¹²Caitaca mana maijan runamanta ñucaca chasquircanichu, yacharcanichu. Ashtahuanpish Jesucristo ricuchijpimi chasquircani.

¹³Judiocuna yachachishcata caticushpa, ñaupa ñuca ima shina cashcataca, ñami uyashcanguichij. Ñucaca Diospaj tandanacushca crijcunata chingachisha nishpami, yallitaj catirashpa llaquichij carcani.

¹⁴Ñuca mama llajtapi judiocuna yachachishcata yachacushpaca, ñuca huiñaicunatapish achcacunata yallimi yachaj carcani. Ñucanchij yayacunapaj ruraicunatapish pajtachina yuyailla tucushpa pajtachijtajmi carcani.

¹⁵Ashtahuanpish mamapaj huijsapi cajpirajmi, Diosca pai munashcamanta ch'icanchirca. Paipaj mana c'uyaipajta c'uyaihuanmi ñucataca cayarca.

¹⁶Mana judiocunapurapi huillachunmi, paipaj Churita ñucaman ricuchirca. Chaimi pita mana tapurcani.

¹⁷Ñucapaj ñaupa apostolcunata ricungapajllapish Jerusalenmanca mana huichiyarcanichu. Chaipaj randica Arabiaman rishpami, Damascoman cutin tigrarcani.

¹⁸Quimsa huata q'uipami, Pedrota ricungapaj Jerusalenman huichiyarcani. Paihuanca chunga pichca punllacunatami chaipi carcani.

¹⁹Apostolcunamanta pi shujtajtaca mana ricurcanichu. Mandaj Jesuspaj huauqui Jacobollatami ricurcani.

²⁰Caipi cancunaman quillcashpaca, Diospaj ñaupajpi manataj llullanichu.

²¹Chai q'uipaca Siriapi, Ciliciapi caj llajtacunamanmi rircani.

²²Ashtahuanpish Cristohuan shujlla tucushca Judeapi tandanacushca crijcunaca, ñucatatajca mana rijsircacunachu.

²³Paicunaca: “Ñaupa punllacuna ñucanchijta catirashpa llaquichijpish, pai chingachisha nicushca crinallatatajmi cunanca huillacun” nijllatami uyashcacuna carca.

²⁴Chaimi ñucamantaca, Diosta jatunyachircacuna.