Read Chimborazo Highland Quichua GÁLATAS 3 Bible Online

GÁLATAS 3 - Chimborazo Highland Quichua bible

GÁLATAS 3

¹¡Yuyai illaj galatacunalla! Mana llullata ama cazuchunca ¿pitaj umarcari? Jesucristotaca chacatashcata cancunapaj ñaupajpi ricuchij shinami, ña huillarcani.

²Cancunamantaca caillatami yachasha nini: ¿Mandashcapi nishcata rurashcamantachu, mana cashpaca uyashpa crishcamantachu Espiritutaca chasquircanguichij?

³¿Yallitaj yuyai illajcunachu canguichij? Espirituhuan callarishca jahuachu ¿cunanca aichapi rurashcahuan ashtahuan alli cashun ninguichij?

⁴¿Chai tucui llaquicunataca yangallachu aparcanguichij? Chashnataj cajpica, yangallami canga.

⁵Diosca cancunaman Espirituta cushpami, cancunapurapica mancharinacunata ruracun. ¿Mandashcapi nishcata rurashcamantachu, mana cashpaca uyashpa crishcamantachu chashnaca ruracun?

⁶Abrahamca Diostami crirca. Chaimantami cashcata rurajta shina chasquirca.

⁷Chaimanta caita yachaichij. Maijanpish crijmi Abrahampaj huahuacunatajca.

⁸Diosca, mana judiocunapish crijpi justificana cashpami, Quillcachishcapica ñaupaman ricuchirca. Chaimantami Abrahammanca: “Canmantaca tucui mama llajtacunami alli nishca canga” nishpa alli huillaitaca ñaupaman huillarca.

⁹Chaimantami crishpa causajcunaca, crij Abrahamhuan allicunata chasquijcuna tucun.

¹⁰Mandashcapi nishcata rurashpa alli ricurishun nijcunaca, tucuicunami llaquichishca canapaj. Cashnami quillcashca tiyacun: “Mandashcata quillcashca libropi imalla tiyacujta tucuita mana pajtachijcunaca, llaquichinapajllatajmi” ninmi.

¹¹Caitaca ricunallami. Diospaj ñaupajpica, Mandashcata rurashcamantaca pi mana justificashca tucunchu. Ashtahuanpish: “Cashcata rurajca crishcamantami causanga”.

¹²Mandashcaca crishcamantaca mana shamunchu, ashtahuanpish: “Mandashcapi nishcacunata pajtachijcunallami causanga” ninmi.

¹³Mandashca llaquiman cachacujpimi, Cristoca randishpa cacharichirca. Ñucanchijmantami llaquichishca tucurca. Quillcachishcapipish cashnami: (“Caspipi tucui huarcushcacunaca, llaquichishcacunami” ninmi).

¹⁴Abrahamman cushca allicunaca, Cristo Jesusmanta mana judiocunapajman chayachun, cusha nishca Espirituta, ñucanchijpish crishpa chasquichunmi chashna tucurca.

¹⁵Huauquicuna, gentecuna ruraj cashcahuanmi yuyachishpa rimani: Shuj runa ari ninacushcallatapish, shuj cutin allimi ninacushpa quillcashpaca, pi mana yanganchinchu, mana mirachinchu.

¹⁶Chai shinallatajmi Abrahamman, paipaj huahua huahuaman Diosca cusha nirca. Achcacunaman nij shinaca, mana: “Huahua huahuaman” ninchu. Ashtahuanpish shujta nij shinallami: “Quiquinpaj huahuaman” nin. Chaica Cristomi.

¹⁷Chaimi caita nini: Cristopi Dios ñaupaman allichishpa ari nishcataca, Mandashcaca mana chingachircachu. Mandashcaca 430 huatacuna q'uipami shamurca. Chaica Dios cusha nishcataca, mana yangata rurarcachu.

¹⁸Mandashcata rurashcamanta herenciata japina cana cajpica, ña mana Dios cushallami nishcamantachu canman. Ashtahuanpish Diosca, cushallami nishcatami Abrahammanca curca.

¹⁹Shinashpaca ¿Mandashcaca imapajtaj alli? Mandashcaca mana cazujcuna cashcata ricuchichunllami, Dios cusha nishca huahua shamungacama q'uipata mirachishca carca. Chaitaca gentecunamanta rimaj Moisespaj maquipimi, angelcunata cuchirca.

²⁰Runacunamanta Dioshuan rimajca, mana shujllamanta rimanchu. Ashtahuanpish Diosca shujllami.

²¹Shinashpaca ¿Mandashcaca, Dios cusha nishcacunataca jarcanchu? ¡Manataj chashnachu! Mandashcata cushca causachi tucujpica, Mandashcapi nishcata rurashpami cashcata rurajtaj caiman.

²²Ashtahuanpish Jesucristopi crijpi, Dios cusha nishcata crijcunaman cushca cachunmi, Mandashcaca jucha ucupi tucuicunata huichcarca.

²³Crina manaraj chayamujpica, Mandashca ucupimari huatashcacuna carcanchij. Chai crinata ricuchingacamaca, huichcashcacunami carcanchij.

²⁴Crishcamanta justificashca cachunmi, Mandashcaca Cristopajman chayangacamalla ñucanchijman ricuchij cashca.

²⁵Ashtahuanpish cunanca, crina shamushcamantaca ña mana ricuchishpa pushajpaj ucupichu canchij.

²⁶Cristo Jesuspi crishcamantaca, tucuicunami Diospaj huahuacuna canguichij.

²⁷Cristopi bautizarishcacunaca, tucuicunami Cristota churarishcacuna canguichij.

²⁸Chaimanta judiopish, griegopish, esclavopish, mana esclavopish, c'aripish, huarmipish ña mana tiyanchu. Cancunaca tucuicunami Cristo Jesuspi shujlla canguichij.

²⁹Cancuna Cristopaj cashpaca, Abrahampaj huahua huahuacunatajmi canguichij. Dios cusha nishcatapish japijcunami canguichij.