Read Chimborazo Highland Quichua GÁLATAS 5 Bible Online

GÁLATAS 5 - Chimborazo Highland Quichua bible

GÁLATAS 5

¹Cristo cacharichishcamanta, quishpichishcapi sinchi caichij. Esclavota rurajpaj yugopica ama cutin huatashca caichijchu.

²Ñuca, Pablotajmi cancunamanca cashna nini. Circuncisionta rurachijcunaca, Cristomantaca imata mana japingacunachu.

³Maijanpish circuncisionta rurachijmanca, tucuicunamanmi cutin huillani. Paica tucui Mandashcatami pajtachinataj tucun.

⁴Mandashcata rurashcamanta justificashca tucusha nijcunaca Cristomanta anchurishpami, mana c'uyaipajta c'uyashca canamanta anchurishcanguichij.

⁵Ñucanchijca Espiritumanta crishcamantami, cashcata rurajta rurashca canchij. Chaimantami chai yuyailla canchij.

⁶Cristo Jesushuan shujlla tucushca cajpica, circuncisionta rurachishca cashpapish, mana rurachishca cashpapish ima mana canchu. Ashtahuanpish crishcamanta c'uyaihuan ruranami alli.

⁷Cancunaca allitami ruracurcanguichij. Mana llullata ama cazuchunca ¿pitaj jarcarcari?

⁸Mana cazunaca, cancunata cayaj Diosmantaca mana shamunchu.

⁹“Ashalla levadurami tucui masata p'unguillichin”.

¹⁰Cancuna shujtaj shina yuyanataca, Mandaj Jesusmantami mana manchani. Ashtahuanpish cancunata pandachijca, maijan cashpapish llaquitami apanga.

¹¹Huauquicuna, circuncisionta ruranallatataj ñuca huillacushca cashpaca, mana chashna p'iñashpa llaquichishca caiman carcanichu. Chaita huillacushca cashpaca, cruzpi Cristo llaquita apashcatami yanganchiman carcani.

¹²¡Cancunata pandachijcunaca paicunallataj tucui p'itirishpachari alli canman!

¹³Cancunaca huauquicuna, ama huatashca cachun Dios agllashcacunami canguichij. Cacharichishcami canchij nishpaca, ñataj aicha munaita ruranguichijman. Ashtahuanpish c'uyaimantaca, caishujpaj chaishujpaj allita ruraichij.

¹⁴Tucui Mandashcami: “Quiquin c'uyarij shinallataj shujtajcunatapish c'uyangui” nishca shimipi pajtan.

¹⁵Ashtahuanpish caishuj chaishuj caninacushpa micunacushpaca, ricungui cancunallatajmi caishuj chaishuj chingaringuichij.

¹⁶Cashnami nini: Espíritu nishca shina purichij. Aicha munaicunapica, ama cushicuichijchu.

¹⁷Aichapaj munaica, Espirituta p'iñanmi. Espiritupish, aicha munaitaca p'iñanmi. Chaicunaca quiquin munashcata, ama rurachunmi caishuj chaishuj macanacun.

¹⁸Ashtahuanpish cancunaca, Espíritu pushashcacuna cashpaca, Mandashca ucupica ña mana canguichijchu.

¹⁹Aichapaj ruraicunaca ricunalla, caicunami: Huainayana, apanacushpa causana, imapish millananata rurana, aicha munaita mana jarcarina,

²⁰rurashcalla dioscunata adorana, brujiana, p'iñanacushcalla causana, c'amina, huañurina, jahualla p'iñarina, p'iñanacuicuna, ch'icanyarinacuna, panda yachachicuna,

²¹envidiaicuna, huañuchicuna, machaicuna, maipish cachun fiestacuna, imapish chai shina ruraicunapishmi tiyan. Chaicunamantaca ñaupaman ña huillashca shinallatajmi, cancunataca mandani. Chaicunata rurajcunaca, Dios mandacujpi cana cajca mana cai tucunchu.

²²Ashtahuanpish Espiritupaj granoca c'uyaimi, cushimi, sumaj causaimi, mana utca p'iñarinami, alli shungumi, alli cajmi, crijmi,

²³manso shungumi, quiquinllataj jarcarijpishmi. Chaicunataca, Mandashcaca mana imata ni tucunchu.

²⁴Ashtahuanpish Cristopaj cajcunaca paicunapaj aichataca ruraicunandij, munaicunandijmi chacatashca.

²⁵Espiritumanta causacushpaca, Espiritullahuantaj purishunchij.

²⁶Caishuj chaishuj p'iñachinacushpa, caishuj chaishuj envidianacushpa yanga jatunyarinataca, ama mashcashunchij.