Read Chimborazo Highland Quichua EFESIOS 2 Bible Online

EFESIOS 2 - Chimborazo Highland Quichua bible

EFESIOS 2

¹Cancunapaj millai juchacunapi huañushcacuna cajpipish, Diosmi cancunaman causaita curca.

²Ñaupa punllacunaca cai pacha munaicunata catishpami, huairapi mandaj munashcata rurashpa, chaipi purircanguichij. Cunanca mana cazujcunapimi, chai espirituca millaita rurachicun.

³Ñaupa punllacunaca tucui ñucanchijpish aicha munaicunapi purishpami, aichapaj munaita rurashpa, yuyashcata rurashpa, millaita rurajcunapurapi causarcanchij. Shujtajcuna shinallatajmi ñucanchijpish huachari pachamanta, Dios p'iñarishpa llaquichina huahuacuna carcanchij.

⁴Ashtahuanpish Diosca llaquij canapi charij cashpami, paipaj jatun c'uyaihuan ñucanchijtaca c'uyarca.

⁵Juchapi ñucanchij huañushca cajpipish, Cristohuan shujllata rurashpami, ñucanchijtaca causachirca. (Mana c'uyaipaj cajpipish c'uyashpa quishpichishcacunami canguichij).

⁶Paihuan shujllata rurashpami ñucanchijtaca causachirca. Chashnallatajmi ñucanchijtaca, Cristo Jesushuan jahua pachapi tiyachirca.

⁷Paipaj mana c'uyaipajta c'uyaj canahuan yallitaj charij cashcata shamuj punllacuna, Cristo Jesusmanta ñucanchijman ricuchingapajmi chaipi tiyachirca.

⁸Crishcamantami mana c'uyaipajta c'uyashpa quishpichishcacuna canguichij. Mana cancunallatajchu quishpirircanguichij. Ashtahuanpish chaica, Dios cushcallami.

⁹Pi ama jatun tucuchunmi, rurashcacunamantaca mana quishpichishca.

¹⁰Ñucanchijca Dios rurashcami canchij. Allicunata rurachun Cristo Jesuspi mushujyachishcacunami canchij. Chashna allicunata rurashpa purichunmi, Diosca ñaupaman allichirca.

¹¹Chaimanta cancunaca, ñaupa ima shina cashcata yuyarichij. Circuncisionta aichapi maquihuan rurachishcacunaca, mana judiocunataca, aichapi mana circuncisionta rurachishcacuna nishcami carcanguichij.

¹²Ñaupaca Cristo illajcuna, Israel canamantapish carupi, Dios cusha nishpa ari nishcatapish imata mana charijcuna, cai pachapica shuyana illaj, Dios illajcunami carcanguichij.

¹³Ashtahuanpish cancunaca ñaupa punllacuna carupi cashca cashpapish, cunanca Cristopaj yahuarmanta, Cristo Jesushuan shujllata rurashpa Diosman c'uchuyachishcacunami canguichij.

¹⁴Cristomi ñucanchijpaj sumaj causai. Judiocunahuan, mana judiocunahuan ch'icanchij patata urmachishpami, paica shujllata rurarca.

¹⁵Cristomi p'iñanacushcataca paipaj aichapi chingachirca. (Mandashcacunapaj mandashcata pajtachichun nishcata chingachishpami) ishquindijmanta shujllata rurashpa, mushuj runata paillapitaj callarichirca. Chashnami sumajta causajcunata rurarca.

¹⁶Shinallataj cruzmanta Dioshuan alli tucuchunmi, p'iñanacushcacunata paillapitaj chingachishpa, ishquindij llajtacunata shujlla cuerpota rurarca.

¹⁷Pai shamushpami cancuna Diosmanta carupi cajcunaman, c'uchullapi cajcunamanpish, sumaj causaipaj alli huillaita huillarca.

¹⁸Paimantami caishujpish, chaishujpish shuj Espiritullamanta Yayapajman yaicunata charinchij.

¹⁹Chaimantami cancunaca ña mana shujtaj llajtamanta shamushcacunalla, pasacujcuna shinallapish mana canguichij. Ashtahuanpish jucha illaj llajtapurataj, Diospaj familiapuratajmi canguichij.

²⁰Apostolcunahuan, profetacunahuan callarichishca jahuapi sinchita huasichishcacunami canguichij. Chai callaripi churashca rumica Jesucristomi.

²¹Cristopi huasichicushcacunaca alli yuyarishpa shayachishca cashpami, Diospaj jucha illaj huasi tucungacama, Mandaj Jesuspi huiñashpa catin.

²²Cancunapish Espiritupi Dios causana huasi cangapajmi, chaipi tandalla huasichicushcacuna canguichij.