Read Chimborazo Highland Quichua EFESIOS 3 Bible Online

EFESIOS 3 - Chimborazo Highland Quichua bible

EFESIOS 3

¹Ñucaca Cristo Jesusmanta mana judiocunapaj allipaj huillacushcamanta prezupi caj Pablomi cani.

²Dios mana c'uyaipajta c'uyashcata, cancunapurapi apachun ñucaman mingashcataca uyashcanguichijmi.

³Pi mana yachashcata ñucaman ricuchishcatami, ñaupaman ashata ña quillcarcani.

⁴Chaita rezashpami, Cristomanta pi mana yachashcata ñuca yachashca ima cashcataca, entendi tucunguichij.

⁵Pi mana yachashcata ñaupaca piman mana yachaj chayachishcata cunanca, paipaj jucha illaj apostolcunaman, profetacunaman paipaj Espirituhuanmi ricuchirca.

⁶Chaica cashnami: Alli huillaimantaca mana judiocunaca, judiocunahuan herenciata japijcuna, ishquindijtaj chai cuerpopajlla miembrocuna, Cristo Jesusmanta Dios cusha nishcatapish paicunahuan japijcuna canami.

⁷Chaita huillaj cachunmi, mana c'uyaipajta c'uyaj canata cushpa, paipaj poderhuan rurachingapaj ñucataca Diospajta rurajta rurashca cani.

⁸Ñucaca tucui jucha illajcunamanta ashtahuan uchillami cani. Chashna cajpipish mana judiocunaman Cristopaj mana yupaipaj achcata charishca alli huillaita huillachunmi, cai mana c'uyaipajta c'uyaj canataca ñucaman curca.

⁹Imalla rurana cashcata ña allichishcataca, pi mana yachashcata allitaj tucuicunaman huillachunpishmi curca. Chaitaca tucui imatapish ruraj Diosmi, huiñaimanta pacha pacalla charicurca.

¹⁰Shinallataj Diospaj tucui laya yachaitaca jahua pacha llajtacunapi poderyujcunaman, mandanata charijcunamanpish tandanacushca crijcunapi ricuchingapajmi curca.

¹¹Pai ima shina ruranata huiñaimanta yuyarishca shinallatajmi, ñucanchijta Mandaj, Cristo Jesuspi pajtachirca.

¹²Ñucanchijca paipi crishcamantami, shuj yuyai yaicunatataj charinchij.

¹³Chaimi cancunamanta llaquicunata ñuca apacujpipish, ama llaquirichun rogani. Chaicunaca cancunapaj allipajmi.

¹⁴Chaimantami ñucanchijta Mandaj Jesucristopaj Yayapaj ñaupajpica, cungurini.

¹⁵(Paimantami jahua pachapi, cai pachapipish tucuicuna paipaj shutita chasquincuna).

¹⁶Diosca sumajyaita achcata charij cashcamantaca, paipaj Espirituhuan poderta cushpa cancunapaj shungupi sinchiyachichunmi mañacuni.

¹⁷Crishcamantaca cancunapaj shungucunapi Cristo causachun, c'uyaipi sapiyashpa sinchiyachun,

¹⁸Cristopaj c'uyaica chainijta, cainijta, ucujta, jahuajta cashcataca, tucui jucha illajcuna entedi tucuipaj cachunmi mañacuni.

¹⁹Shinallataj Cristopaj c'uyaita rijsinaca tucui yachaitapish yalli jatunmari. Chaita rijsishpaca, Dios ima shina cashcahuan yallitaj junda cachunmi mañacuni.

²⁰Diosca tucui imatapish rurai tucuj cashcamantaca, ñucanchijpi rurachicuj poderhuanmi ñucanchij imata mañashcatapish, yuyashcatapish ashtahuan yallita ruran.

²¹Chaimanta Cristo Jesuspi tandanacushca crijcunapica, tucui huahua huahuacuna paitaca, huiñai huiñaita jatunyachishca cachun. Chashna cachun.