Read Chimborazo Highland Quichua EFESIOS 6 Bible Online

EFESIOS 6 - Chimborazo Highland Quichua bible

EFESIOS 6

¹Huahuacuna, Mandaj Jesuspi shujlla cashcamantaca cancunapaj yaya mamata cazuichij, chashna cashpami cashcata rurajtaj cana.

²(Cazujpimi cusha nishca punta mandashcapica) “Cambaj yaya mamata alli ningui” ninmi.

³Chashna rurashpaca, tucui imapipish allimi cangui. Cai allpapipish unitami causangui.

⁴Shinallataj yaya mamacuna, cancunapaj huahuacunata ama p'iñachichijchu. Chaipaj randica, ima shinapish llaquichishpa, cunashpa Mandaj Jesús munashca shina huiñachichij.

⁵Amopajta rurajcuna, cai pachapaj cancunapaj amocunata, Cristota shinallataj manchaihuan, chujchuihuan, cancunapaj alli shunguhuan cazuichij.

⁶Amopi ricuringa raiculla rurajcuna shina, pai ricucujllapi ama ruraichijchu. Ashtahuanpish Cristopajta ruracujcuna shina, Diospaj munaita shungumanta ruraichij.

⁷Runacunapajta shinallaca ama ruraichijchu. Mandaj Jesuspajta shina, shungumanta ruraichij.

⁸Amopajta ruraj cashpa, amopajta mana ruraj cashpapish, cada quiquin allita rurashcamanta, Mandaj Jesuspajta chasquina cashcataca yachanguichijmi.

⁹Amocuna cancunapish paicunataca imata ama manchachishpa paicunapaj allita ruraichij. Paicunata mandajpish cancunata mandajpish jahua pachapi cashcata yachashcamanta chashna ruraichij. Paica pita ñahuita ricushpalla allimi mana ninchu.

¹⁰Ñuca huauquicunalla caillahuanmi nisha nini, paipaj poderyuj fuerzahuan Mandaj Jesuspi sinchiyaichij.

¹¹Diablo ima shinapish umashpa urmachisha nijpi, sinchi cangapajca, Dios cushca tucui macanacunata churarichij.

¹²Ñucanchijca yahuaryuj, aichayujhuanca mana macanacucunchijchu. Ashtahuanpish jahua huairapi purishpa mandacuj millai supaicunahuanmi macanacucunchij. Chaicunami cai pacha amsapaj cajcunata mandashpa mana allita rurachicun.

¹³Chaimanta mana alli punllapi sinchita shayaringapajca, Taita Dios cushca tucui macanacunata churarichij. Chashna tucuita allichishca cashpami sinchi catishun.

¹⁴Chaimanta mana llullahuan alli chumbillirishca sinchi caichij. Pechopi fierro churanata churarishca shinaca cashcata ruranata churarichij.

¹⁵Chaquicunapi zapatosta churarishca shinaca, sumaj causai alli huillaita huillanaihuan caichij.

¹⁶Tucuimanta yallica, escudota shinaca crishcata chariraichij. Chashna cashpami nina shina millaipaj tucui yuyaicunataca huañuchi tucunguichij.

¹⁷Cascota churarishca shinaca, quishpichishca cashcata yuyaichij. Espiritupaj espadatapish chariraichij. Chaica Diospaj shimimi.

¹⁸Chaipajca, punllanta Diosta mañaichij. Espíritu yuyachishca shina tucuimanta mañashpa rogaichij. Chai yuyai chaparaichij. Jucha illajcunamantapish tucuicunamanta mañaichij.

¹⁹Pi mana yachashca alli huillaita mana manchashpa yachaj chayachingapaj, ñuca shimita pascajpi rimanata ñucaman cuchun, ñucamantapish mañaichij.

²⁰Paipaj randi huillachun cachashcamantami cadenacunapi huatashca cani. Paimanta ima shina rimana cashcataca, mana manchashpa rimangapaj mañaichij.

²¹Mandaj Jesusmanta Diospajta rurashpa alli pajtachij c'uyashca huauqui Tiquicomi, ñuca ima shina cashcata cancunapish yachachun, tucuita alli huillanga.

²²Ñucanchij ima shina cashcata yachaj chayashpa, cancunapaj shungucuna cushicuchunmi paitaca cachani.

²³Dios Yayapaj, Mandaj Jesucristopaj sumaj causaipish, c'uyaj canapish, alli crij canapish huauquicunahuan cashca cachun.

²⁴Ñucanchijta Mandaj Jesucristota, mana chingarij c'uyaihuan tucui c'uyajcunamanca, mana c'uyaipajta c'uyaj canata cushca cachun. Chashna cachun.