Read Chimborazo Highland Quichua FILIPENSES 1 Bible Online

FILIPENSES 1 - Chimborazo Highland Quichua bible

FILIPENSES 1

¹Pablopish, Timoteopish Jesucristopajta rurajcunami canchij. Filipospi caj obispocunahuan, diaconocunahuan Cristo Jesushuan shujlla caj tucui jucha illajcunahuanca:

²Dios ñucanchij Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninchijmi.

³Cancunamantaca maipi yuyarishcapimi, ñuca Diostaca pagui nicunilla.

⁴Diosta ñuca mañanapica, tucui cancunamantaca cushicuihuanmi rogacunilla.

⁵Callari punllamanta cunancama alli huillaipaj ayudacujpimi cancunamantaca mañacunilla.

⁶Alli ruranata cancunapi callarichij Diosca, Jesucristo shamuna punllacamami ashtahuan alli rurachicungalla. Chaitaca allitajmi yachani.

⁷Tucui cancunamanta ñuca chashna yuyanaca allitajmari. Prezupi ñuca cashpa, alli huillaimanta shayarishpa chashnataj cashcata huillacushpaca, cancuna rurashcatami shungupi yuyarini. Tucui cancunapish mana c'uyaipajta c'uyaipimi ñucahuan canguichij.

⁸Jesucristopaj c'uyaihuan ñuca tucui shunguhuan, tucui cancunata ñuca ima shina c'uyacushcataca, Diosca ricucunmi.

⁹Diosta mañacushpaca caitami mañani: Cancunapaj c'uyaica yachaipi, entendinapipish ashtahuan ashtahuan yallitaj mirarichun,

¹⁰imapish alli cajllata agllachun, Cristo shamuna punllapajca mana nij tucuj, pi mana juchachipaj cachunpish,

¹¹Diosta alabashpa sumajyachichun, Jesucristomanta cashcata rurashpa granota p'ucuj shina junda cachunpishmi mañacuni.

¹²Huauquicuna, caita yachachunmi munani. Ñucapi imalla tucushcacunaca, alli huillai ashtahuan miranapajmi chashna tucushca.

¹³Chaimantami mandana huasipi guardiajcuna, tucui shujtajcunapish Cristomanta prezupi ñuca cashcataca, allitaj yachaj chayancuna.

¹⁴Chaupi yalli huauquicunami prezupi ñuca cajpipish, Mandaj Jesuspi sinchiyashpa Diospaj shimitaca ashtahuan mana manchashpa huillancuna.

¹⁵Maijancunaca ñucata mishasha nishpami, envidiallamanta Cristomantaca huillancuna. Ashtahuanpish shujtajcunaca alli shunguhuanmi huillancuna.

¹⁶Shujcunaca ñucata mishashun nishpa, prezupi ñuca cajtapish ashtahuan llaquichishun nishpallami, Cristomanta huillaj tucucuncuna.

¹⁷Ashtahuanpish alli huillaitaca chashnataj cashcata huillaj cachun Dios ñucata churashca cashcata yachashpami, shujtajcunaca c'uyaihuan huillancuna.

¹⁸Chashna llaquichishun nishpa huillashcapish ñucataca imata mana llaquichinchu. Jarcangapaj huillashpapish, ima shina cashpapish, nij tucushpallapish, huillanamantataj huillashpapish, Cristomantaca huillashcacunami. Chaimi ñucaca cushicuni. Chaimantaca cushicucushallami.

¹⁹Cancuna Diosta mañashcamanta, Jesucristopaj Espíritu ayudashcamanta alli cana cashcataca yachanimi.

²⁰Ñuca munashca, ñuca yuyacushca shinallataj imapi mana pingachishca cashachu. Chaitaca chashnataj cana cashcatami yuyani. Ñucapi ricuchij cashca shinallatajmi causajpipish huañujpipish Cristo jatun cashcataca, ñuca cuerpopi ricuchishca canga.

²¹Chaimanta ñucapaj causaica Cristomi. Huañunapish tucuita mishanami.

²²Ashtahuanpish Cristopajta rurangapajca aichapi causanami ñucapajca alli. Chaimantami maijanta mana agllai tucuni:

²³Chai ishquindij yuyaicunami ñucataca llapiracun. Shina cajpipish, Cristohuan cangapaj huañushpa rinami ñucapajca yallitaj alli.

²⁴Ashtahuanpish cancunapaj allipajca, aichapi saquirinarajmi yallitaj alli.

²⁵Cancuna crishcapi cushicuchun ayudangapaj, tucui cancunahuan catinaraj cashcataca, allimi yachani.

²⁶Cutinllataj cancunapurapi ñuca cajpimi, ñucamantaca Cristo Jesuspi yallitaj cushicunguichij.

²⁷Cancunataca Cristopaj alli huillaipi nishca shinataj purichunllami rogani. Ricunaman rijpipish, mana rijpipish shujlla Espiritupi sinchiyarishpa, alli huillaita crishcapi shuj shinalla macanacucujtami uyasha nini.

²⁸Jarcajcuna manchachichunca, ama saquinguichijchu. Chashna rurashpaca, paicuna chingarinaman ricushcata, cancunaca quishpichishca cashcatami ricuchicunguichij. Chaica Diosmantami shamun.

²⁹Cancunamanca Cristota crinallataca mana curcachu. Ashtahuanpish paimanta llaquita apanatapishmi curca.

³⁰Llaquita ñuca apajta ricushca shinallatajmi, llaquita apacunguichij. Cunanpish ñuca llaquipi cajtaca ñami uyashcanguichij.