Read Chimborazo Highland Quichua FILIPENSES 4 Bible Online

FILIPENSES 4 - Chimborazo Highland Quichua bible

FILIPENSES 4

¹Chaimanta ñuca c'uyashca, ñuca munashca huauquicunalla. Ñuca cushicuna coronami canguichij. C'uyashcacuna, Mandaj Jesuspi sinchicuna caichij.

²Evodiata, Sintiquetapish Mandaj Jesuspi shujlla cashcamantaca shuj yuyailla tucuchunmi rogani.

³Shinallatajmi ñucahuan tandalla pajtachij, cantapish rogani. Chai panicunata ayudangui. Paicunaca Clementendij, shujtaj huauquicunandij alli huillaita ñucahuan tandalla macanacuj shina huillajcunami. Paicunapaj shuticunaca, causaipaj libropimi.

⁴Mandaj Jesuspi shujlla cashcamanta yallitaj cushicucuichijlla. Cutinmi nini: ¡Yallitaj cushicucuichijlla!

⁵Cancuna c'uyaj cashcataca, tucuicuna yachashca cachun. Mandaj Jesús shamunaca c'uchullapimi.

⁶Imamantapish ama llaquilla canguichij. Ashtahuanpish Diosta mañacushpaca paiman tucuita huillaichij. Tucui imamantapish Diosta mañashpaca pagui nichij.

⁷Chashna rurajpimi pipish mana yachaipaj Diospaj sumaj causaica, cancunapaj shungucunata, cancunapaj yuyaicunatapish Cristo Jesuspi huaquichinga.

⁸Caillahuanmi nisha nini huauquicuna, tucui imapipish mana llulla canata, tucuipi alli canata, tucuipi cashcata ruraj canata, tucuipi chuya canata, tucuipi c'uyashca canata, tucuipi allimi nishca canata yuyaichij. Chashna imapipish alli nishca, alabashca cashca cashpaca, chashna cana yuyailla caichij.

⁹Imatami ñucamanta yacharcanguichij, chasquircanguichij, uyarcanguichij, ricurcanguichij chaita ruraichij. Chashna cajpica sumaj causaita cuj Diosca, cancunahuanmi canga.

¹⁰Cancuna ñucata cutin yuyarishcamantaca, Mandaj Jesuspimi jatunta cushicurcani. Cancunaca chai yuyaillatajmi carcanguichij, ashtahuanpish ima shina mana cui tucurcanguichijllami.

¹¹Ashallata charishcamantaca mana chashna ninichu. Ima shina cashpapish, chaillahuan cushicuna cashcatami yachani.

¹²Ima illajlla causanatapish, yallitaj charij canatapish yachanimi. Tucui laya causaipi causanatami yachani. Mana nijta micushca canatapish, yaricaihuan canatapish, yallitaj charij canatapish, ima illajpi llaquita apanatapish yachanimi.

¹³Ñucata sinchiyachij Cristohuanca, tucui imatapish rurai tucunimi.

¹⁴Shina cajpipish ñuca llaquipi cajpi, ñucata ayudashpaca allitami rurarcanguichij.

¹⁵Filipos crijcuna cancunallataj yachanguichijmi. Alli huillaita huillai callarijpi, Macedoniamanta rigrijpipish shujtaj llajtapi tandanacushca crijcunaca, paicuna chasquishcamanta ñucaman cuna cashcataca mana curcacunachu. Ashtahuanpish cancunallami curcanguichij.

¹⁶Tesalonicapi cajpipish, ñucapaj ima illashcacunataca cutin cutinmi cacharcanguichij.

¹⁷Imatapish cuchun mashcashpa mana chashna ninichu. Ashtahuanpish jahua pachapi yallijta cancuna charijyachunmi munani.

¹⁸Cunanca tucuitami chasquircani. Yallijtami charini. Epafroditoman cancuna cachashcata chasquishpacarin, achcatami charini. Chaicunaca Diosman cushpa rupachijpi mishquiman ashnacuj shina, Dios chasquinallami.

¹⁹Ñuca Diosmi, Cristo Jesusmanta sumaj llajtapi paipaj charishcacunamanta, cancunapaj tucui ima illashcacunatapish cunga.

²⁰Chaimanta Dios ñucanchij Yayataca, huiñai huiñaita jatunyachishca cachun. Chashna cachun.

²¹Cristo Jesuspi caj tucui jucha illajcunata allilla canguichij nipanguichij. Ñucahuan caj huauquicunapish alli cashca cachun nincunami.

²²Tucui jucha illajcunami cancunataca alli cashca cachun nincuna. Ashtahuantajca Cesarpaj huasipi cajcunami, alli cashca cachun nincuna.

²³Ñucanchijta Mandaj Jesucristopaj mana c'uyaipajta c'uyaj canaca, tucui cancunahuan cashca cachun. Chashna cachun.