Read Chimborazo Highland Quichua COLOSENSES 1 Bible Online

COLOSENSES 1 - Chimborazo Highland Quichua bible

COLOSENSES 1

¹Dios munashcamanta, Jesucristopaj apóstol Pablomi, huauqui Timoteondij quillcanchij.

²Cristohuan shujlla tucushpa Colosapi alli caticuj jucha illaj huauquicunahuanca: Dios ñucanchij Yayapaj, Mandaj Jesucristopaj mana c'uyajpajta c'uyaj canapish, sumaj causaipish cancunahuan cashca cachun ninchijmi.

³Cancunamanta Diosta mañacushpaca, ñucanchijta Mandaj Jesucristopaj Yaya Diostaca pagui nicunchijllami.

⁴Cancuna Cristo Jesusta crishcatapish, tucui jucha illajcunata c'uyacun nijtapish uyarcanchijmi.

⁵Cancunaca jahua pachapi huaquichishcata japina yuyailla cashpami, chashna c'uyacunguichij. Chai japinataca mana llulla, alli huillai shimita,

⁶cancunamanpish huillajpimi yacharcanguichij. Chai alli huillaimi tucui cai pachapi grano p'ucuj shina miraricun. Taita Diostaca mana c'uyaipajta c'uyajtaj cashcata uyashca, rijsishca punllamantami cancunapurapipish chashna mirachicun.

⁷Chaitaca Cristopajta alli huillaj c'uyashca Epafras yachachijpimi yacharcanguichij. Paica Cristopajta ñucanchijhuan rurajmi.

⁸Espíritu yuyaita cushca shina cancuna c'uyanacucujtaca, paillatajmi ñucanchijmanca huillarca.

⁹Chaita uyashca punllamantami, cancunamanta Taita Diosta mañanataca ñucanchijca mana shaicunchij. Taita Diospaj munaita allitaj yachajcanahuan, yachaisapa canahuan, Taita Diosmanta yuyaisapa canahuan cachunpishmi mañacunchijlla.

¹⁰Mandaj Jesuspaj cashca shinataj causashpa pai munashcata tucuipi rurashpa, tucui alli ruranapi, alli granota p'ucuj shina, Taita Diosta rijsinapipish ashtahuan huiñashpa catichunmi mañacunchijlla.

¹¹Tucuipi paipaj sumaj poderhuan sinchiyachijpi mana p'iñarij, sinchi cachunpishmi mañacunchijlla.

¹²Ñucanchij jucha illajcuna achij llajtapi herenciata japijcunata ruraj ñucanchij Yayataca, cushicushpa pagui nijcuna cachunmi mañacunchijlla.

¹³Diosmi ñucanchijtaca amsapaj podermanta cacharichishpa, paipaj c'uyashca Churipaj mandacunpi churarca.

¹⁴Paipaj Churi yahuarta jichashpa cutin randishpa quishpichijpimi, juchacunata perdonashca canchij.

¹⁵Cristoca mana ricuipaj Dios ima shina cashcata ricuchijmi. Paica cai pachata manaraj rurajpi ña tiyajmi.

¹⁶Diosca jahua pachapi, cai pachapi tucui imalla tiyajta, mana ricuipajcunata, ricuipajcunatapish paipaj Churihuanmi rurarca. Shinallataj jatun mandajcunata, uchilla mandajcunata, ñahuihuan mana ricuipaj mandajcunata, poderyujcunata, tucuicunatami paipaj Churipaj cachun paillahuantaj rurarca.

¹⁷Tucui imalla tiyajcunapaj ñaupami Cristoca ña tiyarca. Tucuimi paipaj maquipi, maillapi canapimi tiyacun.

¹⁸Tandanacushca crijcunaca Cristopaj cuerpomi, paica umami. Paica callarinapaj ña tiyajmi. Huañushcacunapaj chaupimanta punta causarijmi. Tucuipi punta cangapajmi chashna tucurca.

¹⁹Dios pai ima shina cashcaca, Cristopi junda causachunmi munarca.

²⁰Diosca Cristomantami tucui imalla tiyajcunahuan cutin alli tucurca. Cai pachapi cajcunahuanpish, jahua pachapi cajcunahuanpishmi alli tucurca. Cristo cruzpi yahuarta jichashcahuanmi Diosca chashna alli tucurca.

²¹Cancunapish sarunmanca cancunapaj yuyaicunamanta, cancunapaj mana alli ruraicunamanta Diosmanta caruyashcacuna, Diosta p'iñajcunami carcanguichij. Cunanca paihuan alli tucushcacunami canguichij.

²²Diosca, Cristo paipaj aichayuj cuerpopi, jatun llaquita apashpa huañushcamanta, pi mana juchachipaj, mapa illajta, jucha illajcunata paipaj ñaupajpi ricuchingapajmi chashna rurarca.

²³Chaimanta cancunaca crishcapi, sapiyashpa sinchi catichij. Alli huillaita huillajpi cancuna imata japina cashcataca uyarcanguichijmi. Chaimantaca ama anchurishpa chai yuyailla caichij. Chaitaca tucui cai pachapi causajcunamanmi huillashca. Ñucapish chaita huillachun churashca Pablomi cani.

²⁴Ñucaca, cancunamanta llaquita apacushpapish, cunanca cushicunimi. Chashna rurashpami Cristo paipaj cuerpo caj tandanacushca crijcunamanta, llaquita apashca shinallataj ñucapish ñuca cuerpopi paimanta llaquita apashpa pajtachicuni.

²⁵Tandanacushca crijcunapaj Dios rurasha nishca shina, cancunapaj allipaj Diospajta rurajta rurashcami cani. Diospaj Shimita chaitataj huillachun churashcami cani.

²⁶Patsaj patsaj huatacuna ñaupaman causajcunapajca, pi mana yachashca pacallami cashca. Chaitaca cunan paipaj jucha illajcunamanmi ricuchishca.

²⁷Diosca pi mana yachaipaj sumaj charinacunataca jucha illajcunaman cushpami, tucui mana judiocunamanpish ricuchisha nirca. Chaica Cristo cancunapi cashcami, paimantami sumaj cashca ricurina yuyailla canguichij.

²⁸Ñucanchijca Cristomantami huillanchij. Tucuicunata cunashpa, tucuicuna imapipish alli yachaj cachunmi yachachinchij. Allitaj cajcunata Cristo Jesusman ricuchingapajmi chashna yachachinchij.

²⁹Chaipajca Cristo ima shina fuerzata cushcahuanmi macanacucuj shina trabajacuni. Chai fuerzami ñucapica poderhuan rurachicun.