Read Chimborazo Highland Quichua COLOSENSES 3 Bible Online

COLOSENSES 3 - Chimborazo Highland Quichua bible

COLOSENSES 3

¹Cancuna Cristohuan causarishca cashpaca, jahua pachapi tiyajcunallata mashcaichij. Chaipica Cristomi Diospaj alli ladopi tiyacun.

²Jahua pachapi tiyajcunallata yuyaichij. Cai pachapi tiyajcunataca ama yuyaichijchu.

³Cristohuan huañushcami carcanguichij. Cancunapaj causaica, Cristohuanmi Diospi pacashca tiyacun.

⁴Cancunaman causaita cuj Cristo ricurijpica, cancunapish pai sumaj cashca shinallatajmi ricuringuichij.

⁵Chaimanta cancunapi tiyaj cai pachapaj yuyaicunataca: Apanacushpa causanata, mapa causaita, mana alli ruraicunata, millai munaicunata, quiquinpajlla ashtahuan charij canatapish huañuchichij. Chaicunaca rurashcalla Diosta adorashca shinallatajmi.

⁶Chaicunamantami mana cazujcunata Dios p'iñarishpa jatunta llaquichinaca shamunga.

⁷Ñaupaca, cancunapish chashnallataj rurashpa causajcunami carcanguichij.

⁸Ashtahuanpish cunanca, cancunaca: P'iñarinata, p'iña canata, millai yuyailla canata, p'iñashpa c'aminata, mapa shimita rimanata, tucui chaicunata saquichij.

⁹Caishuj, chaishuj ama llullanacuichijchu. Cancunapaj mauca causaitaca, rurashcacunandij anchuchishpa,

¹⁰mushuj runata rurashcami canguichij. Dios shina cachun mushujyachishcami canguichij. Paica paita alli rijsichun mushujyachicunllami.

¹¹Chaimanta griegopish, judiopish, circunsicionta rurachishcapish, mana rurachishcapish, urcu runapish, shujtaj llajtamanta cajpish, amopajta rurajpish, amopajta mana rurajpish mana tiyanchu. Ashtahuanpish Cristoca tucuicunapajmi, tucui paipi crijcunapimi.

¹²Dios agllashca jucha illajcuna, pai c'uyashcacuna cashcamanta shungumanta llaquij canata, cuj canata, mana jatun tucushca canata, manso shungu canata, mana p'iñarij canata churarichij.

¹³Maijan caishujta p'iñashpa juchachijpica, caishuj chaishuj ahuantanacushpa, ima shinami cancunata Cristo perdonarca, chai shinallataj caishuj chaishuj perdonanacuichij.

¹⁴Tucuimanta yallica c'uyaj canata churarichij. C'uyaimi tucuicunata shujllata rurajtajca.

¹⁵Cristomanta Dioshuan sumaj causaica cancunapaj shungucunapi mandachun. Chashna cachun cayashpa shujlla cuerpota rurashcacunami carcanguichij. Chaimanta pagui nijcuna caichij.

¹⁶Cancunapaj shungupica, Cristo rimashca shimicuna junda tiyachun. Tucui yachashcahuan, caishuj chaishuj yachachinacuichij animachinacuichij. Cancunaca shungumanta salmocunata, himnocunata, Diospaj cantocunata Mandaj Jesusta pagui nishpa cantaichij.

¹⁷Tucui imata rimashpapish, rurashpapish Mandaj Jesuspaj shutipi tucuita ruraichij. Paillamantataj Dios Yayataca pagui nichij.

¹⁸Cazadacuna Mandaj Jesús munashca shina, cancunapaj cusacunata cazuichij.

¹⁹Cusacuna, cancunapaj huarmicunata c'uyaichij. Paicunahuanca ama millaicuna caichijchu.

²⁰Huahuacuna, cancunapaj yaya mamacunata tucuipi cazuichij. Mandaj Jesusca chaitami munan.

²¹Yaya mamacuna, cancunapaj huahuacuna ama mana uyasha nichunca, ama p'iñachichijchu.

²²Amopajta rurajcuna cai pacha cancunapaj amocunata tucuipi cazuichij. Ama paicuna ricucujllapi, alli ricuringaraiculla alli ruraj tucuichijchu. Ashtahuanpish Diosta manchashpa, tucui shunguhuan alli ruraichij.

²³Tucui imata rurashpapish, runacunapajta shinallaca ama ruraichijchu. Ashtahuanpish Mandaj Jesuspajta shina shungumanta ruraichij.

²⁴Chashna rurashcamantaca Mandaj Jesús cushca herenciata chasquina cashcataca yachanguichijmi. Cancunapaj Mandaj Jesusca Cristomi paipajtami ruracunguichij.

²⁵Ashtahuanpish mana cashcata rurajca, pai rurashca shinallatajmi chasquinga. Diosca mana ñahuita ricushpalla alli ninchu.