Read Chimborazo Highland Quichua 1 TESALONICENSES 2 Bible Online

1 TESALONICENSES 2 - Chimborazo Highland Quichua bible

1 TESALONICENSES 2

¹Huauquicuna, ñucanchij cancunata ricunaman rishcaca, mana yanga cashcataca cancunallataj yachanguichijmi.

²Ñaupaman Filipospi cajpi ima shina c'amishpa llaquichishcataca, cancunallataj yachanguichijmi. Chaipica sinchi llaquicuna chaupipi cajpipish, Taita Diosmi paipaj alli huillaita huillachun ñucanchijmanca fuerzata curca.

³Ñucanchijca pandachingaraiculla, mapa yuyaihuan umangaraicullaca mana huillarcanchijchu.

⁴Ashtahuanpish Taita Diosmari ñucanchijtaca, ima shina cajta ricushpa alli huillaita huillachun churarca. Chaimantami runacunataca mana cushichishun ninchij, ñucanchij shunguta yachaj Taita Diosllatami cushichishun ninchij.

⁵Catinanqui shimicunahuan, ñucanchij ashtahuan charij tucungapajca manataj huillashcanchijchu. Chaitaca yachanguichijmi, Taita Diospish ricucunmi.

⁶Runacuna alli nishca canataca cancunamantapish, shujtajcunamantapish mana mashcarcanchijchu. Cristopaj apostolcuna cashcamantaca, japinataj cashca cashpapish mana p'iñachircanchijchu.

⁷Ashtahuanpish shuj mama paipaj quiquin huahuacunata c'uyashpa cuidaj shinami, cancunahuan cashpaca c'uyaihuan sumajta charircanchij.

⁸Cancunata ñucanchij yallitaj c'uyashcamantaca, Taita Diospaj alli huillaillataca mana huillashun nircanchijchu. Ashtahuanpish ñucanchij causaitapishmari cushun nircanchij. Chashnami ñucanchijpajca yallitaj c'uyashca tucushcanguichij.

⁹Huauquicuna, ñucanchij shaicuita trabajashcataca yuyaringuichijmi. Cancunamanta maijanta ama yalli p'iñachingapajca tutapish, punllapish trabajashpami Taita Diospaj alli huillaitaca cancunaman huillarcanchij.

¹⁰Huauquicuna, ñucanchijca cancunahuan ima shina jucha illajlla, cashcata rurashpa, mana juchachipaj cashcataca cancunapish yachanguichijmi, Taita Diospish yachanmi.

¹¹Caitapish yachanguichijmi, yaya paipaj quiquin huahuacunata ima shinami charin, chai shinallatajmi cada quiquinta yuyachishpa rimaj, cushichij carcanchij.

¹²Paipaj sumaj mandanaman Taita Diosca cayashcamantaca, paipaj huahuacuna shinataj causachunmi yachachircanchij.

¹³Taita Diospaj Shimita cancunaman ñucanchij huillajpi uyashpaca, mana runacunapaj shimita shinallachu chasquircanguichij. Ashtahuanpish Taita Diospaj Shimitaj cashcatami chasquircanguichij. Chaimi crij cancunapica rurachicun. Chaimantami ñucanchijca mana samashpa, Taita Diostaca pagui nicunchijlla.

¹⁴Cristo Jesuspi caj, Diospaj tandanacushca judío crijcunataca judiocunallatajmi llaquichircacuna. Cancunatapish cancunapaj quiquin llajtapi causajcuna llaquichijpica, paicuna shinallataj llaquita apajcunami tucushcanguichij.

¹⁵Chaicunallatajmi Mandaj Jesustapish, paicunapaj quiquin profetacunatapish huañuchircacuna. Ñucanchijtapish llujshichishpami cacharcacuna. Taita Diostaca mana cushichincunachu, tucui runacunatapish jarcancunami.

¹⁶Mana judiocuna quishpirichun huillajtapishmi ñucanchijtaca jarcancuna. Chashna rurashpami paicunapaj juchacunataca, yallijta jundachincuna. Chaimi Taita Diospaj p'iñaica, yallitaj paicunapaj jahuaman shamurca.

¹⁷Ñucanchijca huauquicuna, cancunamanta ashacama carupi cashpapish, shungupica mana carupichu canchij. Ashtahuanpish cancunapaj ñahuitaca ricunaihuanmi canchij.

¹⁸Chaimantami cancunapajman rishun nicurcanchij. Ashtahuanca ñucallapish shamusha nicurcanimi. Shina cajpipish Satanasmi ñucanchijtaca jarcarca.

¹⁹Shina cajpica ¿imataj ñucanchij shuyanaca cushicunachu, mana cashpaca ñucata sumajyachij coronachu? Ñucanchijta Mandaj Jesucristo shamuipi, paipaj ñaupajpica cancunamari chaicunamanta yalli canguichij.

²⁰Cancunamari ñucanchij alli ricurina, cushicunapish canguichij.