Read Chimborazo Highland Quichua JOSUÉ 1 Bible Online

JOSUÉ 1 - Chimborazo Highland Quichua bible

JOSUÉ 1

¹Mandaj Diosca paipajta ruraj Moisés ña huañujpica Moisesta ayudaj, Josué, Nunpaj churitami cashna nirca:

²“Ñucapajta ruraj Moisesca ñami huañun. Cunanca israelcunaman ñuca cusha nishca allpata japingapajca, canmi paipaj randi shayarishpa tucui israelcunandij cai Jordán jatun yacuta ch'imbana cangui.

³Ñucaca cancunamanca Moisesman nishca shinallatajmi, cancunapaj chaqui maillata sarushca allpataca tucuita cuni.

⁴Shitashca pambamantaca Líbano urcundij, Éufrates Jatun yacucamami cuni. Heteocuna causan tucui llajtatami inti huashicun ladoman caj mama cuchacama cuni. Tucui chai llajtacunaca cancunapajmi.

⁵Moiseshuan cashca shinallatajmi canhuanpish casha. Cantaca manataj saquishachu, canmantaca manataj anchurishachu. Chaimanta tucui cambaj causaipi canhuanca pi mana ch'imbapura shayari tucungachu.

⁶Cancunapaj ñaupa yayacunaman ñuca cusha nishca allpata japinataca, c'ari c'ari tucushpa, ama manchaichu. Chai allpataca, tucui israelcunaman canmi chaupishpa cungui.

⁷Ashtahuanca ñucaca caitami mandani: Ñucapajta ruraj Moisesman ñuca cushca mandashcata pai canman cushcataca chaitataj pajtachingapaj c'ari c'ari cangui. Alli ladomanpish, lluqui ladomanpish ama anchuringuichu. Chai mandashcacunapi nishca shinataj rurashpaca, tucui imapipish allimi cangui.

⁸Cai libropi quillcashca tiyacuj ñuca mandashcataca tutapish punllapish rezanataca amataj saquingui. Chashna cashpa yuyaipi charishpami, imalla mandashcataca chaitataj pajtachingui. Chashna rurajpica, tucui can rurashcacunami alli llujshinga.

⁹Riqui, ñucaca cantaca c'ari c'ari cai, ama manchaichu nishpami mandani. Ama manchanguichu, shaicurishpa ama saquiringuichu. Ñuca canta Mandaj Diosca can maita rijpipish canhuanmi casha” nircami.

¹⁰Chaimi Josueca paita ayudashpa israelcunata pushajcunataca cashna nishpa mandarca:

¹¹“Tucui israelcuna causacun carpa huasicunaman rishpa, tucuicunata cashna mandaichij: Micunacunata allichichij. Ñucanchijta Mandaj Dios ñucanchijman cusha nishca llajtata japigringapajca cunanmanta quimsa punllapimi Jordán jatun yacuta ch'imbashun nigrichij” nircami.

¹²Josueca Rubenpaj aillutapish, Gadpaj aillutapish, Manasespaj chaupi aillutapish cashnami nirca:

¹³— Mandaj Diospajta ruraj Moisés nishcata yuyarichij. Paica cashnami nirca: “Cancunata Mandaj Diosca cancuna samarichunca cai allpatami curca.

¹⁴Cancunapaj huarmicuna, cancunapaj uchilla huahuacuna, cancunapaj animalcunaca Jordán yacumanta inti llujshin ladoman Moisés cushca allpapi saquirichun. Ashtahuanpish macanacuipaj caj tucui c'ari c'aricunaca macanacunacunata apashpa, cancunapaj huauquicunata ayudanaman ch'imbanguichij.

¹⁵Samarichun cancunaman cushca shinallataj paicunamanpish allpacunata Mandaj Dios cungacama ayudanguichij. Mandaj Dios cusha nishca allpata japingacama ayudashpaca, Jordán yacumanta inti llujshin ladoman Taita Diospajta ruraj Moisés cancunaman cushca cancunapaj allpallamantaj tigranguichijllami” — nircami.

¹⁶Josué shina nijpimi, paicunaca cashna nircacuna: — Can tucui imalla nishcataca rurashunllami. Can maiman ri nijpipish rishunllami.

¹⁷Moisesta ima shinami tucuipi cazuj carcanchij, chashnallatajmi cantapish cazushun. Mandaj Diosca Moiseshuan cashca shinallataj, canhuanpish cachunmi munanchij.

¹⁸Can imalla mandashcacunata maijanpish mana cazushpa mana rurajtaca, huañuchishca cachun. Chaimanta canca imapipish ama manchashpa, c'ari c'ari cailla — nircacunami.