Read Chimborazo Highland Quichua JOSUÉ 11 Bible Online

JOSUÉ 11 - Chimborazo Highland Quichua bible

JOSUÉ 11

¹Hazor pueblota jatun mandaj Jabín tucui chaicunata yachaj chayashpaca, Madón pueblota jatun mandaj Jobabman, Simrón pueblota jatun mandajman, Acsaf pueblota jatun mandajman,

²shinallataj janaj ladoman caj jahua urcu llajtacunapi causajcunata jatun mandajcunaman, Cineret cucha ura lado Arabá llajtacunapi causajcunata jatun mandajcunaman, Dor pueblohuan inti huashicun ladohuan chaupi pambacunapi causajcunata jatun mandajcunaman,

³inti llujshin ladoman, inti huashicun ladoman causaj cananeocunata jatun mandajcunaman, urcucunapi causaj amorreocunata, heteocunata, ferezeocunata, jebuseocunata jatun mandajcunaman, Mizpa llajtapi caj Hermón urcu chaquipi causaj heveocunata jatun mandajmanpishmi tucuicuna tandanacushunchij nishpa huillaj cacharca.

⁴Tucui chai mandajcunaca paicunapaj soldadocunandij, achca caballocunandij, macanacuna carrocunandijmi achcacuna tucushpa rircacuna. Chai tucui llajtacunamanta tandanacushcacunaca, mama cucha uripi tiyaj t'iyu allpa shina pi mana yupaipaj achcacunami carca.

⁵Tucui chai llajtacunata jatun mandajcuna tandanacushpa shamushpaca, israelcunahuan macanacungapajmi, Merom yacu c'uchupi carpa huasicunata shayachishpa tiyarircacuna.

⁶Chashna tandanacujpimi Mandaj Diosca Josuetaca: “Ama manchaichu. Caya cai horasllataj paicunataca, ñuca cancunapaj maquipi churajpi tucuicunatami huañuchicunguichij. Caballocunatapish chaquicunata p'itishpa, macanacuna carrocunatapish tucuitami rupachicunguichij” nirca.

⁷Chaimi Josueca, macanacunata yachaj runacunahuan Merom yacu c'uchuman chayashpa, chaipi cajcunataca cungaimanta japishpa llaquichi callarirca.

⁸Mandaj Dios israelcunapaj maquipi churajpimi, israelcunaca paicunata huañuchishpa, maijancunataca Sidón jatun pueblocama, Misrefot-maim pueblocama, inti llujshin ladoman caj Mizpa pugru pambacama catishpa shujllatapish mana saquishpa tucuicunata huañuchircacuna.

⁹Josueca Mandaj Dios mandashca shinallatajmi, paicunata p'iñajcunapaj caballocunataca chaquicunata p'itishpa, carrocunatapish tucuita rupachirca.

¹⁰Chai q'uipa tigrashpaca Josueca, Hazor pueblota japishpami chai llajtapaj jatun mandajtapish espadahuan huañuchirca. Hazor pueblota jatun mandajca, tucui caishuj pueblocunapajca uma shinami cashca carca.

¹¹Chai pueblopi caj causaiyujcunataca tucuicunatami espadacunahuan huañuchirca. Causaiyuj cachun shujllatapish mana saquishpami tucuita chingachirca. Chai Hazor pueblotaca ninahuanmi rupachirca.

¹²Hazor pueblota jatun mandajhuan tandanacushca jatun mandajcunapaj llajtacunatapish pai japishpami mandajcunatapish tucuicunata espadacunahuan huañuchirca. Taita Diospajta ruraj Moisés paicunata mandashca shinallatajmi tucuicunata chingachirca.

¹³Lomacunapi caj pueblocunataca, israelcunaca mana rupachircacunachu. Hazor pueblollatami rupachircacuna.

¹⁴Israelcunaca chai pueblopi imalla tiyajcunatapish, animalcunatapish paicunapaj cachunmi japirca. Gentecunataca causaiyujtaca shujllatapish mana saquishpami espadacunahuan tucuicunata huañuchircacuna.

¹⁵Mandaj Dios paipajta ruraj Moisesta ima shina mandashca shinallatajmi, Moisespish Josuetaca mandarca. Chaimi Josueca Moisesta Mandaj Dios ima shina mandashca shinallataj shuj shimillatapish mana saquishpa tucuita pajtachirca.

¹⁶Josueca tucui cai llajtacunatami japirca: Urcupi caj llajtacunata, Neguevpi caj llajtacunata, Gosenpi caj llajtacunata, Arabapi caj llano pamba llajtacunata, israelcuna causacun urcucunatapish pugru pambacunatapishmi tucuita japirca.

¹⁷Seir llajtaman huichi rina Halac urcumanta callarishpaca, Líbano pambapi caj Baal-gad llajtacama, Hermón urcu c'uchucamami chai tucui llajtacunata japirca. Chai llajtacunata jatun mandajcunatapish japishpami tucuicunata chugrichishpa huañuchirca.

¹⁸Chai llajtacunata jatun mandajcunahuanca, Josueca uni huatacunatami macanacurca.

¹⁹Gabaonpi causaj heveocunallami, israelcunahuan mana macanacushun nishpa ama llaquichichun ari nichircacuna. Shujtaj pueblocunapi causajcunaca tucuicuna macanacushun nishpa jatarijpipish israelcunaca tucuicunatami mishashpa chai llajtacunataca japircacuna.

²⁰Mandaj Dios Moisesta mandashca shinallataj chai llajtapi causajcunataca mana llaquishpa sapimanta aisashpa shitaj shina israelcuna tucuita chingachichunmi, Mandaj Diosllataj chai llajtapi causajcunataca rumi shunguta rurajpi, israelcunahuan macanacunata c'ariyarcacuna.

²¹Josueca Hebrón urcucunapi causaj anaceocunata, Debir urcucunapi causajcunata, Anab urcucunapi causajcunata, Judacuna cunan causacun urcucunapi tucui causajcunata, israelcuna cunan causacun urcucunapi tucui causajcunatapish chai punllacunallatajmi paicunapaj pueblocunandij tucuita chingachirca.

²²Anaceocunaca, israelcuna japin llajtapica shujllapish mana saquirircachu. Chaicunaca israelcuna japishca llajtapica Gaza, Gat, Asdod pueblocunallapimi saquirircacuna.

²³Mandaj Dios Moisesta mandashca shinallatajmi, Josueca tucui chai llajtacunataca israelcunapaj cachun japirca. Chai llajtacunataca, tucui israelcunamanmi cada ailluman mashnacunapura cajpipish, pajtanata ricushpa chaupishpa curca. Macanacuipish chai llajtapica ña mana tiyarcachu.