Read Chimborazo Highland Quichua JOSUÉ 13 Bible Online

JOSUÉ 13 - Chimborazo Highland Quichua bible

JOSUÉ 13

¹Josueca uni huatacunata causashpa ña yuyaj cajpimi, Mandaj Diosca paitaca cashna nirca: “Canca achca huatacunayuj ña yuyajmi cangui. Shina cajpipish, israelcunapaj cachun japinaca achca llajtacuna tiyanrajmi.

²Cai llajtacunatami israelcunaca, paicunapaj cachun japinaraj can: Filisteocuna, gesureocuna causan tucui llajtacunata,

³Egiptomanta inti llujshin ladoman caj Sihor jatun yacumanta janaj lado Ecrón puebloman tupanacuncamami japina tiyanraj. Chai llajtacunaca cananeocunapajrajmi. Chai llajtacunataca Gaza, Asdod, Ascalón, Gat, Ecrón llajtacunata pichca jatun mandaj filisteocunami mandacun. Ura ladoman caj Aveocunapaj llajtatapish japinarajmi.

⁴Cananeocuna causan tucui llajtatapish, sidoniocuna causan Mehara pueblomantaca, Afec pueblohuan tupanacuj llajtacunacamami israelcuna japinaraj tiyan.

⁵Giblitacunapaj llajtatapish, inti llujshin ladoman caj tucui Líbano llajtatapish, Baal-gat llajtamanta callarishpa Hermón urcu chaquita catishpa, Hamat puebloman yaicunacamami japina tiyanraj.

⁶Libanopi causajcunamanta callarishpaca, Misrefot-maimpi causajcunacamami sidoniocunatapish, urcucunapi causajcunatapish tucuicunata israelcunapaj ñaupajmanta anchuchisha. Canca ñuca ima shina mandashca shinallataj cada aillupaj sorteajpica, maipimi urman chaipi paicuna japina cashcataca cunguilla.

⁷Tucui cai allpacunataca iscun aillu israelcunaman, Manasespaj chaupi aillumanpish chaupishpa cungui” nircami.

⁸Rubenpaj, Gadpaj aillucunahuan, Manasespaj chaupi ailluhuanca ñami Jordán yacumanta inti llujshin ladoman caj llajtacunata Mandaj Diospajta ruraj Moisesllataj cujpi chasquircacuna.

⁹Paicunaca: Arnón yacu uripi caj Aroer pueblomantaca, pugru pamba chaupipi caj pueblotapish, Medeba tucui pambatapish Diboncamami chasquircacuna.

¹⁰Amorreocunata jatun mandaj Sehón mandacushca tucui pueblocunatapish amonitacunapaj llajtahuan tupanacuncamami chasquircacuna. Sehón shuti jatun mandajca, Hesbón pueblopimi mandashpa causarca.

¹¹Galaad llajtatapish, gesureocuna, maacateocuna causan llajtacunatapish, tucui Hermón urcutapish, tucui Basán llajtatapish Salca pueblocamami paicunaman curca.

¹²Og shuti jatun mandaj mandacun Basán llajtatapishmi curca. Chai jatun mandajca Astarot pueblopi, Edrei pueblopimi causaj carca. Paica refaitacunamanta saquirishcami carca. Chaicunataca Moisesmi mishashpa ña llujshichishpa cachashca carca.

¹³Israelcunaca gesureocunata, maacateocunataca paicuna causacushca llajtamantaca mana llujshichishpa cacharcacunachu. Paicunaca cunan punllacamami israelcuna causacunllapitaj causacuncuna.

¹⁴Ashtahuanpish Levipaj huahua huahuacunamanca allpacunataca mana curcachu. Mandaj Dios mandashca shinallataj paicunaca israelcuna Mandaj Diosman cushpa rupachingapaj apamushcacunatami paicuna japina cashcataca japina carca.

¹⁵Moisesca Rubenpaj aillumanca mashnacunapura cajta ricushpa, causana pajtatami allpacunataca curca.

¹⁶Rubenpaj huahua huahuacunapaj allpacunaca caicunami: Arnón yacu uripi caj Aroermantaca pugru pamba chaupipi caj pueblocunandij, tucui Medeba pambacamami curca.

¹⁷Hesbón pueblotapish, chai muyundij pambacunapi caj cai tucui pueblocunandijmi curca: Dibón, Bamot-baal, Bet-baal-meón,

¹⁸Jahaza, Cademot, Mefaat,

¹⁹urcucunapi caj pugru pambacunapi tiyaj Quiriataim, Sibma, Zaret-sahar shuti pueblocunatapishmi paicunaman curca.

²⁰Bet-peor, Bet-jesimot pueblocunatapish Pisga urcu quinricunandijmi curca.

²¹Chai llajtacunami amorreocunata mandashpa jatun mandaj Sehón mandana llajtacuna. Paica Hesbón pueblopi causashpami mandarca. Chai mandaj mandacun llajtacunatami Moisesca japirca. Chai jatun mandaj churashca Madianita cai jatun mandajcunatapish Evi, Requem, Zur, Hur, Reba shuti mandajcunatami misharca.

²²Israelcunaca chaicunata huañuchicushpaca, Beor shuti runapaj churi Balaam shuti adivino runatapishmi huañuchircacuna.

²³Jordán jatun yacu huichica, Rubenpaj aillupaj lindemi carca. Rubenpaj huahua huahuacunamanca mashna cashcapaj causana pajtatami allpacunataca curca. Chai allpacunataca pueblocunandij, pueblo muyundij llajtacunandijmi curca.

²⁴Gadpaj aillumanpish Moisesca, mashna huasi ucupura tandanacushcata ricushpa, paicuna causana pajtatami allpacunataca chaupishpa curca.

²⁵Paicunapaj allpacunaca Jazer pueblondij, Galaad llajtapi caj tucui pueblocunandij, amonitacunapaj chaupi llajtatapish Rabá pueblo ch'imbapurapi caj Aroercamami carca.

²⁶Hesbonmantaca Ramat-mizpa pueblocama, Betonim pueblocamapishmi carca. Mahanaimmantaca, Debir llajtahuan tupanacuncamami carca.

²⁷Pugru pambapi caj Bet-aram, Bet-nimra, Sucot, Zafón pueblocunapishmi carca. Chai pueblocunaca Hesbonpi causaj jatun mandaj Sehón mandacushca pueblocunami carca. Jordán yacumanta inti llujshin ladoman caj llajtacunaca Cineret cuchacamami carca.

²⁸Chashnami Gadpaj aillumanca, paicuna japina cashcataca chai tucui pueblocuna muyundij llajtacunandij curca. Mashna familiacuna cashcata ricushpa, causana pajtatami curca.

²⁹Moisesca, Manasespaj chaupi aillumanpishmi paicuna japina cashca allpataca ña curca. Paicunamanpish mashna familiacuna cashcata ricushpa, causana pajtatami curca.

³⁰Paicunapaj llajtacunaca Mahanaimmantaca, Og shuti jatun mandaj mandacushca tucui Basán llajtapish, Basán llajtallapitaj caj Jair runapaj sujta chunga pueblocunandijmi paicunapaj carca.

³¹Basán llajtapi caj chaupi Galaad llajtandij, Astarot pueblondij, Edrei pueblondijmi jatun mandaj Og mandaj carca. Chai llajtacunataca Manasespaj churi Maquirpaj huahua huahuapuramanmi mashna familia cashcata ricushpa causana pajtata curca.

³²Jordán yacu ch'imbapurapi tiyaj Moab jatun pambacunata Moisés israelcunapaj cachun chaupishpa cushca allpacunaca chai llajtacunami. Chai llajtacunaca Jericomanta inti llujshin ladomanmi.

³³Mandaj Diosca, Levipaj aillupajca ñucami herencia cani nishca shinallatajmi, Moisesca paicunamanca allpacunataca mana curca.