Read Chimborazo Highland Quichua JOSUÉ 14 Bible Online

JOSUÉ 14 - Chimborazo Highland Quichua bible

JOSUÉ 14

¹Israelcunaca Canaán llajta allpacunataca caicunatami paicuna japina cashcataca japircacuna. Chai allpacunataca Eleazar curapish, Nunpaj churi Josuepish, israelcunapaj cada ñaupa yayacunapaj aillucunata pushaj yuyajcunapishmi chaupishpa curcacuna.

²Chai allpacunataca Mandaj Dios Moisesta ima shina mandashca shinallatajmi, iscun aillu israelcunamanpish, Manasespaj chaupi aillumanpish sorteashpa paicuna japina cashcataca curcacuna.

³Rubenpaj, Gadpaj aillucunamanpish, Manasespaj chaupi aillumanpish Jordán yacumanta inti llujshin ladoman tiyaj allpacunatami paicuna japina cashcataca Moisesca, ñaupaman cushca carca. Levipaj huahuacunamanca paicunapurapica, allpataca mana curcachu.

⁴Josepaj ailluca Manasés aillu, Efraín aillu ishqui aillumi tucurca. Levipaj huahua huahuacunamanca tarpuna allpacunataca mana curcacunachu. Paicunamanca causanapaj pueblocunata, huagracunata, ovejacunata michina chai muyundij asha allpacunallatami curcacuna.

⁵Mandaj Dios Moisesta mandashca shinallatajmi israelcunaca allpacunataca chaupircacuna.

⁶Judapaj huahua huahuacuna Josuehuan rimangapaj, Gilgalman rishpaca, Cenezeocunapuramanta caj Jefone runapaj churi Caleb runami Josuetaca cashna nirca: “Cades-barnea pueblopi Mandaj Dios paipajta ruraj Moisesman, canmantapish ñucamantapish imallata nishcataca canllataj yachanguimi.

⁷Taita Diospajta ruraj Moisés Cades-barneapi cashpa, Canaanta purij shinalla ricushpa tigrachun cachai punllacunaca chuscu chunga huatacunayujmi carcani. Chai llajtata ricushpa tigrashpaca, ñuca shungupi ima shinalla yuyashcatami chaitataj huillarcani.

⁸Ñucahuan rij huauquicunami israelcunamanca mancharinata parlashpa mana shamuna yuyaita curca. Shina cajpipish, ñucata Mandaj Dios ñucanchijhuantaj cashcata tucui shunguhuan crishpa, pai nishcata rurarcanillami.

⁹Chaipimi Moisesca: “Mandaj Dios tucuita rurana cashcata crishpa sinchi cashcamantaca cambaj chaqui sarushca allpaca huiñaitami cambajpish, cambaj huahuacunapajpish canga. Chaica chashnatajmi canga” nirca.

¹⁰Mandaj Diosca pai causaita cusha nishca shinallataj causaita cujpimi, caicama causani. Israelcuna shitashca pambata puricujpi, Mandaj Dios Moisesman chai shimicunata nishcaca ñami chuscu chunga pichca huata tucun. Tucuimantaca ñami pusaj chunga pichca huatayuj cani.

¹¹Shina cashpapish, cai llajtacunata Moisés ricunaman cachai punllacunapi cashca shinallataj fuerzasapa runamari cani. Macanacuiman llujshinapish, tigranapish chai punllacunapi shinallataj ñucapajca jahuallamari.

¹²Chai punllacunapi Mandaj Dios ñucaman cusha nishca shinallataj chai urcupi caj llajtacunataca ñucaman cuilla. Canllataj allimi yachangui. Chai llajtacunapica, Anac shuti runapaj huahua huahuacunami causan. Paicuna causacun pueblocunapish, muyundijta alli pircacunayuj jatun pueblocunami. Mandaj Dios ñucahuan cashcamantaca, chai runacunataca llujshichishpa cachashallami” nircami.

¹³Chaimi Josueca, Jefonepaj churi Calebtaca can nishcataca Dios alli nichun nishpa, pai japina cashca Hebrón llajtataca paipajpish, paipaj huahuacunapajpish cachun curca.

¹⁴Hebrón puebloca chashnami cenezeocunapura caj Jefone runapaj churi Calebpaj tucurca. Caleb runaca israelcunata Mandaj Diosta tucui shunguhuan cazuj cashpami, chaita japirca. Cunan punllacama chai llajtaca paipajllatajmi.

¹⁵Hebronpica ñaupaca Anacpaj huahua huahuacunapura yaya Arba shuti jatun runami causarca. Chaimantami ñaupamanca chai puebloca Quiriat-arba shuti carca. Chaicunata mishajpimi, chai llajtapica mana macanacui tiyarca.