Read Chimborazo Highland Quichua JOSUÉ 18 Bible Online

JOSUÉ 18 - Chimborazo Highland Quichua bible

JOSUÉ 18

¹Israelcunaca tucuicunata mishashpa llajtata japishca q'uipaca, Silo pueblopi tucuicuna tandanacushpami, Mandaj Dioshuan tupangapaj tandanacuna carpa huasita shayachircacuna.

²Shina cashpapish, Israelpaj huahua huahuacunapuramanta canchis aillucunamanca, paicuna japina cashca allpacunataca manaraj chaupircachu.

³Chaipimi Josueca israelcunataca: “Cancunapaj ñaupa yayacunaman Dios cusha nishca allpacunataca ¿maicamataj manaraj japishpa shuyacunguichijlla?

⁴Manaraj chaupishca tucui llajtacunata rishpa quillcashpa ñucapajman apamuchun cachangapaj, cada aillumanta quimsa runacunata nombraichij. Ima shina chaupina cashcata ricungapaj.

⁵Chai manaraj chaupishca allpacunataca, canchis aillupaj chaupichuncuna. Judapaj huahua huahuacunapajca, ura ladollamantaj saquishpa, Josepaj huahuacunamanpish janaj ladollamantaj saquichunlla.

⁶Chai allpata canchispi chaupishpaca, maillata lindecuna cashcata quillcashpa ñucapajman apamunguichij. Chaita ñuca caipi ricushpami, ñucanchijta Mandaj Diospaj ñaupajpi cada aillupaj sorteasha.

⁷Levipaj huahua huahuacunaca, cancunapurapica allpacunataca ashallatapish mana japingacunachu. Paicunaca Mandaj Diospajlla cura canatami japingacuna. Rubenpaj, Gadpaj aillucunapish, Manasespaj chaupi aillupish Jordán yacumanta inti llujshin ladoman caj llajtacunatami ña japircacuna. Paicunamanca Taita Diospajta ruraj Moisesmi curca” nircami.

⁸Chai allpacunata chaupijcuna Josué nishca shina ña rigrijpimi Josueca: “Chai llajtacunaman rishpaca tucui allpacunata chaupinguichij. Ña tucui chaupishpaca, maillata cashcata quillcashpa caiman tigramunguichij. Chaita ricushpa cai Silo pueblopi, Mandaj Diospaj ñaupajpi sorteashpa, maijanpajlla maillapi urmashcata yachangapaj” nircami.

⁹Chashna mandajpi chai runacuna tucui llajtacunata rishpa chaupishpaca, canchis llajtacunatami rurarca. Mashna pueblocuna cashcatapish quillcashpami, Silo pueblopi caj carpa huasicunaman Josuepajman tigrarcacuna.

¹⁰Chaipimi Josueca Mandaj Diospaj ñaupajpi sorteashpa maijanlla aillupaj urmashcata ricushpa chaupishpa curca.

¹¹Ña sorteajpica, Benjaminpaj huahua huahuacunapaj mashna aillu tiyashcapajmi urmarca. Paicunaman cushca llajtaca Judapaj huahua huahuacunapaj llajtahuan, Josepaj huahuacunapaj llajtahuan chaupipimi urmarca.

¹²Paicunapaj llajtapaj lindeca caicunami: Janaj ladotaca Jordán yacumanta callarishpa, Jericó janaj ladota huichi rishpaca, inti huashicun ladoman caj urcucuna tiyan llajtata pasashpa, Bet-avén shitashca pambaman llujshijtami.

¹³Chaimanta ura ladotaca Luz nishca Bet-eltami rin. Chaimantaca Bet-horonmanta ura ladoman caj Atarot-adar ura ladotami.

¹⁴Inti huashicun ura ladotaca, Bet-horón ch'imbapurapi caj urcuta muyushpami, inti huashicun ura ladoman caj Quiriat-baalman llujshin. Chai pueblollatajmi, Quiriat-jearim shutipish. Chai puebloca Judapaj llajtapimi. Inti huashicun lado lindecunaca tucui chaitami.

¹⁵Ura ladotaca, Quiriat-jearim pueblo c'uchumanta callarishpa, inti huashicun ladomanca Neftoa pugyumanmi llujshin.

¹⁶Chai lindeca Hinompaj churipaj pugru pamba c'uchupi caj urcu c'uchumanmi uriyan. Chai pambaca Refaim pugru pambamantaca, janaj ladomanmi. Chaimantaca Hinompaj pugru pambamanmi uriyan. Ura ladotaca Jebuseocunapaj llajtata pasashpami Rogel pugyuman uriyan.

¹⁷Rogelmantaca ashata janaj ladoman tigrashpami, En-semesman llujshin. En-semesmantaca Adumín huichi ch'imbapurapi caj Gelilotta pasashpami, Rubenpaj churi Bohanpaj rumicama uriyan.

¹⁸Chai rumimantaca Arabá quinri ch'imbapurata pasashpami, Arabá pambaman uriyan.

¹⁹Janaj lado lindeca Bet-hoglata pasashpami, Cachisapa Cuchaman tupashpa Jordán yacu c'uchupi tucurin. Ura lado lindecunaca chaicunami.

²⁰Inti llujshin lado lindeca, Jordán yacu uritami. Benjaminpaj huahua huahuacunapaj mashna familia cashcacunapajca paicuna japina cashca allpacunapaj muyundij lindecunaca tucui chaicunami.

²¹Benjamín aillupaj huahua huahuacunapaj familiacunapaj pueblocunaca caicunami: Jericó, Bet-hogla, Casis pugru pamba,

²²Bet-arabá, Zemaraim, Bet-el,

²³Avim, Pará, Ofra,

²⁴Quefar-haamoni, Ofni, Geba shuti pueblocunami. Chai chunga ishqui pueblocunatami, tucui muyundij llajtacunandij japircacuna.

²⁵Gabaón, Ramá, Beerot,

²⁶Mizpa, Cafira, Mozah,

²⁷Requem, Irpeel, Tarala,

²⁸Zela, Elef, Jebús nishca Jerusalén, Gabaa, Quiriat shuti pueblocunapishmi. Chai chunga chuscu pueblocunatapish, tucui muyundij llajtacunandijmi japircacuna. Benjamin aillupaj mashna familiacuna cashcapaj japishca allpacunaca tucui chaicunami.