Read Chimborazo Highland Quichua JOSUÉ 3 Bible Online

JOSUÉ 3 - Chimborazo Highland Quichua bible

JOSUÉ 3

¹Cayandij tutamanta utca jatarishpami, Josueca Sitim pambamanta tucui israelcunandij Jordán yacu c'uchuman rircacuna. Chai yacuta manaraj ch'imbashpami chaillapi samarircacuna.

²Quimsa punllata chaipi cashca q'uipaca, israelcunata mandajcunaca tucui carpa huasicunata rishpami,

³cashna nishpa mandarcacuna: “Levita curacunami Mandaj Dioshuan ari ninacushca quillcata huaquichina arcata apashpa ñaupangacuna. Chaita ricushpaca tucuicuna paicunata catishpa ringuichij.

⁴Cancunaca maijanpish manaraj cai ñantaca purijcunachu canguichij. Chaimanta paicuna ñaupashpa rijpi maita rina cashcata yachanguichij. Diospaj arcata apacujcunapajmanca ama c'uchuyanguichijchu. 900 metro shina carupi catishpa ringuichij” nishpami mandarcacuna.

⁵Josuepish israelcunataca: “Tucuicuna allichirishpa ima mapa illajlla tucuichij. Cayami Mandaj Diosca, pi mana ruraipajta rurashpa cancunaman ricuchinga” nircami.

⁶Chai q'uipaca curacunatami Josueca: “Dioshuan ari ninacushca quillcata huaquichina arcata apashpa, israelcunata ñaupashpa richij” nijpi curacunaca chai arcata apashpa israelcunata ñaupashpa rircacuna.

⁷Chaipimi Mandaj Diosca Josuetaca: “Cunan punllamantami cantaca, tucui israelcunapaj ñaupajpi jatun cashcata ricuchigrini. Moiseshuan shinallataj ñucaca canhuanpish cashcata paicuna yachachunmi chashna rurasha.

⁸Ñucahuan ari ninacushca quillcata huaquichina arcata apaj curacunataca Jordán yacu uriman chayashpaca, yacupi yaicushpa shayarichun mandai” nircami.

⁹Shina nijpimi Josueca, israelcunataca cashna mandarca: “Shamuichij, cancunata Mandaj Dios imallata rimashcata uyanguichij” nirca.

¹⁰Josueca cashnapish nircami: “Cancunaca caita ricushpami causaj Dios cancunahuan cashpa, chai Canaán llajtapi causacuj heteocunata, heveocunata, ferezeocunata, gergeseocunata, amorreocunata, jebuseocunata cancunapaj ñaupajmanta llujshichishpa cachanataj cashcata yachanguichij.

¹¹Tucui cai pachata mandaj Jatun Dioshuan ari ninacushca quillcata huaquichina arcaca tucui cancunata ñaupashpami Jordán yacu chaupiman ringa.

¹²Cunanca, chunga ishqui aillucunamanta cada aillumanta shuj shuj runacunata agllaichij.

¹³Tucui cai pachata Mandaj Jatun Dioshuan ari ninacushca quillcata huaquichina arcata apacuj curacunapaj chaquicuna Jordán yacuman yaicujpica, chai yacuca chaupirishpa pata shina tucungallami. Chaimi janajmanta shamucuj yacuca jarcarishpa, mana ashtahuan shamunga” nircami.

¹⁴Shina nijpimi israelcunaca, Jordán yacuta ch'imbangapaj paicunapaj carpa huasicunamanta rircacuna. Dioshuan ari ninacushca quillcata huaquichina arcata apaj curacunaca paicunata ñaupashpami rircacuna.

¹⁵Jordán jatun yacuca cozicha punllacunapica, tucui chai punllacunapimi yallitaj yacu mirarishpa, lado pambacunacama jundaj carca. Chaimantami Dioshuan ari ninacushca quillcata huaquichina arcata apacuj curacuna Jordán yacu uriman chayajpica, paicunapaj chaquicunataca shutujyachirca.

¹⁶Chaimi janajmanta shamucuj yacuca Saretán pueblo c'uchupi caj Adam shuti pueblomanta carupi jarcarirca. Israelcuna ch'imbacushcamanta uriman ricuj yacupish, Arabá shuti pambapi caj Cachisapa Cuchacamami chaquirca. Chai yacu chashna chaquijpimi, tucui israelcuna Jericó pueblo derechota ch'imbarcacuna.

¹⁷Tucui israelcuna ch'imbangacamami curacunaca, Dioshuan ari ninacushca quillcata huaquichina arcahuan, Jordán yacu chaquirishca chaupipi imata mana manchashpa shayacurcallacuna. Israelcunaca tucuicunami chaquishca allpata ch'imbarcacuna.