Read Chimborazo Highland Quichua JOSUÉ 4 Bible Online

JOSUÉ 4 - Chimborazo Highland Quichua bible

JOSUÉ 4

¹Tucui israelcuna Jordán yacuta ña tucui ch'imbajpica, Mandaj Diosca Josuetaca cashna nishpami mandarca:

²“Chunga ishqui Israel aillucunamantaca, cada aillumanta shuj shuj runacunata agllashpa,

³cashna mandai: Jordán yacu chaquirishca chaupipi shayacuj curacunapaj c'uchumanta chunga ishqui rumicunata japichij. Chai rumicunataca cunan tuta cancuna maipi samarinapi churanguichij nishpa mandai” nircami.

⁴Chaimi Josueca, chunga ishqui Israel aillupuramanta cada aillumanta shuj shuj agllashca runacunata cayashpaca:

⁵“Cancunata Mandaj Diospaj arcata apashpa Jordán yacu chaquirishca chaupipi shayacuj curacunapaj ñaupajman richij. Chaimantaca yaya Israelpaj chunga ishqui churicunapaj aillucuna cashca shinallataj chunga ishqui rumicunata shuj, shuj rigra jahuapi apaichij.

⁶Chai rumicunaca cancunapurapi yuyarinapajmi canga. Caya mincha cancunapaj huahuacuna cancunata: ¿Cai rumicunaca imatataj ricuchisha nin? nijpica,

⁷cashna huillanguichij: Mandaj Dioshuan ari ninacushca quillcata huaquichina arcata apashca Jordán yacuta ch'imbacujpimari chai yacuca p'itirishpa chaquirirca ninguichij. Chai rumicunami caya mincha cancunapaj tucui huahua huahua israelcunapaj yuyarina canga” nircami.

⁸Josué mandashca shinallatajmi israelcunaca chunga ishqui aillu cashcata yuyachij chunga ishqui rumicunata Jordán yacu rina chaupimanta aparcacuna. Chai rumicunataca Mandaj Dios Josueta mandashca shinallatajmi paicuna samaringapaj carpa huasicunata shayachina pambacama apashpa chaipi pircarcacuna.

⁹Shinallataj Josuepish, Dioshuan ari ninacushca quillcata huaquichina arcata apashca curacuna Jordán yacu chaquirishca chaupipi shayacushcapimi, chunga ishqui rumicunata pircachirca. Chai rumicunaca cunancama chaillapitajmi.

¹⁰Diospaj arcata apacuj curacunaca, Mandaj Dios Josueta imallata mandashca shina israelcuna chai tucuita rurangacamami yacu purina chaupipi shayacurcallacuna. Josueta Moisés imallata mandashca shinallatajmi tucuita rurarcacuna. Tucui israelcunami chai Jordán yacutaca utca ch'imbarcacuna.

¹¹Tucui israelcuna Jordán jatun yacuta ña ch'imbajpica, Mandaj Diospaj arcata apaj curacunapish ch'imbashpami, tucui israelcunata ñaupangapaj paicunapaj ñaupajman shayarircacuna.

¹²Jordán yacutaca Rubenpaj, Gadpaj aillupish, Manasespaj chaupi aillupishmi Moisés mandashca shinallataj macanacunacunata aparishca, tucui israelcunata ñaupashpa ch'imbarcacuna.

¹³Macanacunahuan caj runacunaca, 40.000 shina runacunami paicunapaj macanacunacunandij, Jericó pueblo pambamanca, Mandaj Diospaj ñaupajta ch'imbarcacuna.

¹⁴Chai punllapimi Mandaj Diosca, Josuetaca tucui israelcunapaj ñaupajpi jatun cashcata ricuchirca. Chaita ricushpaca, chaimantapachami tucui israelcuna Josuetaca Moisesta cazushca shinallataj, tucui paipaj causaipi cazurcacuna.

¹⁵Israelcuna Jordanta ña ch'imbashca q'uipami Mandaj Diosca, Josuetaca cashna nirca:

¹⁶“Ñucahuan ari ninacushcata ricuchij quillcata huaquichina arcata apacuj curacunataca, Jordán yacu rina chaupimanta llujshichun mandai” nirca.

¹⁷Chaimi Josueca curacunataca: “Jordanmanta llujshimuichijlla” nirca.

¹⁸Shina nijpimi Mandaj Dioshuan ari ninacushca quillcata huaquichina arcata apacuj curacunaca, Jordán yacu rina chaupimanta llujshircacuna. Paicuna chaimanta chaquishca allpaman llujshincami, chai yacuca ñaupaman ima shina cashca shinallataj, lado uricunacama jundashpa rirca.

¹⁹Israelcunaca punta quillapaj chunga punllapimi, chai Jordán yacumanta rishpaca, Gilgal shuti pambapi carpa huasicunata shayachishpa tiyarircacuna. Gilgalca Jericomantaca inti llujshin ladomanmi.

²⁰Chaipimi Josueca Jordán yacumanta apashca chunga ishqui rumicunataca pircarca.

²¹Josueca, israelcunataca cashnami nirca: “Caya mincha cancunapaj huahua huahuacuna cancunata: ¿Cai rumicunaca imatataj ricuchin? nishpa tapujpica:

²²Jordán jatun yacu chaupirijpi, tucui israelcuna chaquishca allpata ch'imbashcata ricuchijmi nishpa huillanguichij nircami.

²³Cancunata Mandaj Diosca cancuna ch'imbangacama, cai Jordán yacuta chaquichijtaca cancunallatajmi ricunguichij. Ñaupapish ñucanchij ricucujpimi Mandaj Diosca cunan cancuna ch'imbaj shinallataj ch'imbangacama, Puca Cuchata chaquichirca.

²⁴Cai tucuita yachashpaca, tucui cai pachapi causajcunami Mandaj Diosca tucuita rurai tucuj cashcata yachangacuna. Shinallataj cancunapish cancunata Mandaj Diostaca, cancunapaj tucui causaipi manchashpa causachunmi chashna rurarca” nircami.