Read Chimborazo Highland Quichua JOSUÉ 5 Bible Online

JOSUÉ 5 - Chimborazo Highland Quichua bible

JOSUÉ 5

¹Jordán jatun yacumanta inti huashicun ladoman causaj amorreocunata jatun mandajcunapish, mama cucha c'uchuman causaj cananeocunata jatun mandajcunapish, Jordán jatun yacuta israelcuna tucui ch'imbangacama Mandaj Dios chaquichishpa ch'imbachishcatami yachaj chayarcacuna. Chaimi yallitaj manchashpa israelcunahuan, macanacunataca manataj yuyarcacuna.

²Israelcuna chaipi cajpimi, Mandaj Diosca Josuetaca cashna mandarca: “Rumimanta filojlla cuchillacunata rurashpa, cai punllapi causaj israelcunata circuncisionta ruragri” nirca.

³Chaimi Josueca, filojlla cuchillocunata rurashpa, Aralot lomapi tucui israelcunata circuncisionta rurarca.

⁴Josueca caimantami circuncisiontaca rurarca: Egiptomanta llujshimuj circuncisionta rurashca macanacunata yachaj tucui Israel c'aricuna shitashca pambata shamucushpami tucuicuna huañushca carca.

⁵Egiptomanta llujshimujcunaca tucuicunami circuncisionta ña rurashcacuna carca. Egiptomanta llujshimushca q'uipa, shitashca pambata shamucujpi huacharishcacunami circuncisiontaca manaraj rurashcacuna carca.

⁶Egiptomanta llujshimuj macanacunata alli yachaj c'aricuna tucui huañungacamami israelcunaca shitashca pambapi chuscu chunga huatacunata purircacuna. Paicunallataj Mandaj Dios mandashcata mana cazujpimi, Mandaj Diosca: “Cancunapaj ñaupa yayacunaman lechepish, sacha chuspipaj mishquipish yacu shina tiyaj llajtata cusha nishcamanca cancunaca mana yaicunguichijchu. Chaica chashnatajmi canga” nishca carca.

⁷Ñaupa yayacunapaj randi Mandaj Dios pushamushcacunatami Josueca circuncisionta rurarca. Paicunaca ñanta shamucujpi huacharishcacuna cashcamantami circuncisionta mana rurashcacuna carca.

⁸Tucui israelcunata circuncisionta ña rurajpica, paicuna carpa huasihuan maipi cashcallapitajmi tucuicuna alliyangacama tiyacurcacuna.

⁹Chaipimi Mandaj Diosca Josuetaca: “Cancunata circuncisionta rurashpami, Egiptopi pingachishca causashcataca cunan anchuchini” nirca. Chaimantami chai lomataca cunancama Gilgal nincuna.

¹⁰Israelcunaca Jericó c'uchulla pamba Gilgalpi carpa huasicunata shayachishpa tiyacushpami, chai quillapaj chunga chuscu punllapaj chishipi Pascuata rurashpa Diosta yuyarircacuna.

¹¹Chai cayandij punllami punta p'ucushca granocunatapish, levadura illajlla tandatapish, llullu trigo camchatapish micurcacuna.

¹²Allpapi punta p'ucushca granota micui callari cayandij punllamantami maná shuti micunaca ña mana tiyarca. Chaimanta pachami israelcunaca maná shuti micunataca, ña mana charircacuna. Chai huatamantami Canaanpi p'ucushca granocunata micushpa causarcacuna.

¹³Shuj punllami Josueca Jericó pueblo c'uchu pamballapitaj puricurca. Chaipimi ñapish pai ricunapajca huaquichinamanta llujshichishpa, espadata aisashca shuj runa shayacuj paipaj ñaupajpi ricurirca. Josué c'uchuyashpaca: — ¿Canca ñucanchijpurachu cangui? ¿Mana cashpaca ñucanchijta p'iñajcunapuramantachu cangui? — nirca.

¹⁴Chaimi chai runaca: — Ñucaca maijanpurapish mana canichu. Mandaj Diospaj soldadocunata mandajmi cani — nijpi Josueca cungurishpa, pambacama cumurishpa adorashpaca: — Ñuca amito, cambajta ruraj ñucataca ¿imatataj mandahuangui? — nirca.

¹⁵Mandaj Diospaj soldadocunata mandajca Josuetaca: — Can shayacun allpaca, Diospajlla ch'icanchishcami. Chaimanta cambaj pargateta llujshichi — nijpimi Josueca pai nishca shina rurarca.