Read Chimborazo Highland Quichua JOSUÉ 6 Bible Online

JOSUÉ 6 - Chimborazo Highland Quichua bible

JOSUÉ 6

¹Jericopi causajcunaca israelcunata manchashcamantami, chai puebloman yaicuna pungucunataca allitaj huichcarishcacuna carca. Chaimantami chai pueblopi causajcunaca pi mana yaicui tucurcacuna, mana llujshi tucurcacuna.

²Shina cajpipish Mandaj Diosca, Josuetaca cashnami nirca: “Jericopi causajcunataca paicunapaj jatun mandajtapish, paipaj soldadocunatapish cambaj maquipimi churani.

³Chaimanta cancunapaj soldadocunaca, sujta punllacama punllanta shuj cutin chai pueblo pirca huashata muyuchun.

⁴Canchis curacunaca carneropaj canchis gachu bocinacunahuan ñuca arcata apajcunata ñaupachuncuna. Canchis punllapica, canchis cutin chai pueblota muyunguichij. Curacunaca chai gachucunapi tocashpa ñaupachuncuna.

⁵Carneropaj gachu bocinacunapi sinchita tocashca uyarijpica, tucui cancuna sinchita caparinguichij. Chashna rurajpica, chai pueblo muyundij pircacunaca urmangallami. Ña urmajpica, tucui cancuna ricushca derechota chai pueblopi causajcunata llaquichingapaj yaicunguichij” nirca.

⁶Chaimi Nunpaj churi Josueca, curacunata cayashpaca: “Cancunaca Dioshuan ari ninacushca quillcata huaquichina arcata apaichij. Cancunapuramanta canchis curacunaca carneropaj gachu bocinacunata apashpa, chai arcata apashcacunata ñaupashpa ringuichij” nirca.

⁷Israelcunatapish cashnami nirca: “Cancunaca pueblo muyundijta muyuichij. Macanacungapaj allichirishca runacunaca Mandaj Diospaj arcata ñaupashpa richij” nircami.

⁸Josué chashna nincami, canchis curacunaca carnerocunapaj canchis gachu bocinacunata apashca, Diospaj arcata apacujcunapaj ñaupajman tucushpa, chai bocinacunapi tocashpa rircacuna. Dioshuan ari ninacushca quillcata huaquichina arcata apacujcunaca catishpami rircacuna.

⁹Macanacungapaj allichirishca runacunaca, tocashpa ricuj curacunata ñaupashpami rircacuna. Shuj mirgaca Diospaj arcata apacujcunata cuidashpami catishpa rircacuna. Bocinacunapi tocashpa ricuj curacunaca mana samarishpami tocashpa rircacuna.

¹⁰Tucui israelcunatami Josueca: “Cancunaca ama caparinguichij, cancunapajca rimashcallapish ama uyarichun, cancunaca ama shuj shimillapish llujshinguichijchu. Ñuca capari nishca punllapi caparinguichij” nirca.

¹¹Chai punllaca Josueca Mandaj Diospaj arcahuan chai pueblota shuj muyuillata muyushpami, paicunapaj carpa huasicunallamantaj tigrashpa tutaca chaipi pacarircacuna.

¹²Cayandij tutamantaca Josueca utcatami jatarirca. Curacunapish Mandaj Diospaj arcatami aparcacuna.

¹³Carnerocunapaj gachu bocinacunahuan caj curacunapish Mandaj Diospaj arcata apacujcunata ñaupashcami, chai bocinacunapi tocanatapish, purinatapish mana samarishpa ñaupashpa rircacuna. Macanacungapaj allichirishca runacunaca chai tocaj curacunata ñaupashpami rircacuna. Macanacungapaj allichirishca caj shuj mirgaca Mandaj Diospaj arca huashata cuidashpami rircacuna. Bocinacunapi tocashcapish mana pararishpami uyaricurcalla.

¹⁴Cayandij punllapish chai shinallatajmi chai pueblota muyurcacuna. Chai q'uipaca paicunapaj carpa huasiman tigrarcallacunami. Sujta punllacamami chashnallataj muyurcacuna.

¹⁵Canchis punlla tucujpica, manaraj alli pacarijpi jatarishpami, ñaupa punllacunaman shinallataj muyurcacuna. Chai punllapica canchis cutinmi muyurcacuna. Chai punllallami chashna canchis cutinca muyurca.

¹⁶Canchis cutin muyuipi curacuna bocinapi tocajpica, Josueca israelcunataca: “Sinchita caparichij, cai pueblotaca Mandaj Diosca ñucanchijmanmi curca.

¹⁷Chai pueblopi causajcunataca, tucui chaipi imalla tiyajcunandij tucuita chingachinapaj ch'icanchishcami. Chaimanta tucui chai pueblotaca chingachinguichij nishpami, Mandaj Diosca mandarca. Chaimanta cunanca purij shinalla ricushpa tigrachun ñucanchij cachashcacunata ama imata rurachun pacaj huainayashcahuan causaj Rahab huarmillatami mana huañuchina canchij. Paipaj huasipi miticushpa tiyacujcunatapish mana huañuchinachu canchij.

¹⁸Chaimanta cai pueblopi tucui chingachinapaj cajcunata japishpa mapayarinamantaca huaquichirichij. Chaicunaca chingachinapaj cashcamanta ama japinguichijchu, ama tuparinguichijllapishchu. Chaicunapi tuparishpa mapayajpica israelcunapaj carpa huasicunapish ñataj chingachinapaj tucunman.

¹⁹Chaipaj randica cullquimanta, curimanta, broncemanta, fierromanta rurashca imalla charinacunata japishpaca, Mandaj Diospajlla ch'icanchishpa paipajlla cachun huaquichinapi churanguichij” nircami.

²⁰Curacuna bocinapi tocajpica, tucui israelcunaca sinchitami caparircacuna. Paicuna tocashcacunapish, sinchita caparishcacunapish uyarijpica, chai pueblo muyundij pircacunaca urmarcallami. Chai pircacuna urmajpica, tucui israelcuna paicuna ricushca derechota huichiyashpami llaquichingapaj yaicurcacuna.

²¹Ña yaicushpaca c'aricunatapish, huarmicunatapish, q'uipa huiñaicunatapish, yuyajcunatapish, huagracunatapish, ovejacunatapish, burrocunatapish tucuitami espadacunahuan huañuchircacuna. Chashnami tucuita chingachircacuna.

²²Josueca chai pueblota purij shinalla ricushpa tigranaman ñaupaman shamuj runacunataca: “Cancunata ama huañuchichun pacaj huainayashcahuan causaj huarmipaj huasiman richij. Cancuna ari nishca shinallataj chai huarmipaj huasi ucupuracunataca paipaj huasimanta llujshichigrichij” nirca.

²³Chai runacunapish chai Rahab huarmipaj huasiman yaicushpaca paitapish, paipaj yaya mamatapish, turicunatapish, paipaj tucui huasi ucupuracunatapish tucuicunatami pushamurcacuna. Paicunataca israelcunapaj carpa huasimanta carupimi churarcacuna.

²⁴Chai q'uipaca israelcunaca, chai pueblotaca tucui chaipi imalla tiyajcunandijmi, tucuita rupachircacuna. Cullquita, curita, broncemanta, fierromanta rurashca ima charinacunallatami llujshichishpa Diospajlla cajcunata huaquichinapi huaquichingapaj aparcacuna.

²⁵Rahab huarmica Jericó pueblota purij shinalla ricushpa tigrachun, Josué cachashcacunatami ama huañuchichun pacarca. Chaimantami Josueca Rahab huarmitaca, paipaj huasi ucupuracunandijllata mana huañuchirca. Rahab huarmica, cunan punllacunacamami israelcunapurapi causacun.

²⁶Jericó pueblota tucui chingachishca q'uipaca Josueca Diospaj shutipimi cashnataj cachun nini nirca: “Cai pueblota cutin shayachij runataca Mandaj Dios jatunta llaquichishca cachun. Cai pueblota shayachi callarijpica, paipaj punta churi huañushca cachun. Cai puebloman yaicuna pungucunata churacujpica, q'uipa churi huañushca cachun” nircami.

²⁷Mandaj Diosca Josuehuanmi carca. Chaimantami Josué tucui rurashcacunaca tucui llajtapi huashan huashan yacharirca.