Read Chimborazo Highland Quichua JOSUÉ 7 Bible Online

JOSUÉ 7 - Chimborazo Highland Quichua bible

JOSUÉ 7

¹Chashna cajpipish israelcunaca Mandaj Dios ama rurangui nishcata rurashpami Diospaj ñaupajpi mana alli ricurircacuna. Judapaj aillumanta caj Acanmi chai pueblopi caj chingachinapaj cajcunata apashpa Mandaj Diosta mana cazushca carca. Chaimantami Mandaj Diosca israelcunahuanca yallita p'iñarirca. Acán runaca Carmí runapaj churimi carca. Carmica Zabdi runapaj churimi carca. Zabdi runaca Zera runapaj churimi carca.

²Chai q'uipami Josueca Jericomanta Hai puebloman maijan runacunata cacharca. Chai puebloca, Bet-el pueblomanta inti llujshin ladoman caj Bet-avén pueblo c'uchullapimi carca. Paicunataca cashna nishpami cacharca: “Hai puebloman huichiyashpa chai pueblo ima shinalla cashcata ricumugrichij” nijpi, paicuna Hai puebloman huichiyashpaca ima shinalla cashcatami ricurcacuna.

³Paicuna tigrashpaca Josuemanca: “Hai pueblopi causajcunaca ashacunallami cashca. Ama tucuicunata cachashpa shaicuchichu. Ishqui huarangata, mana cashpaca quimsa huarangallata cachai. Paicunallataj jahualla mishangallacunami” nircacuna.

⁴Hai pueblopi causajcunahuanca quimsa huaranga shina runacunallami macanacunaman huichiyarcacuna. Chai pueblopi causajcuna mishajpimi paicunaca callpashpa tigrarcacuna.

⁵Hai pueblopi causajcunaca quimsa chunga sujta israelcunatami huañuchircacuna. Caishujcunatapish chai pueblo pungumantaca, Sebarim pambacama catishpa rishpami chaimanta rina uripi macarcacuna. Chashna rurajpimi tucui israelcunapaj shunguca yacuyaj shina tucushpa paicunaca mana macanacushun nircacuna.

⁶Chaimantami Josuepish, israelcunata cunaj yuyajcunapish llaquirishpa paicunapaj churanacunata lliquirishpa, uma jahuapi allpahuan shitarircacuna. Mandaj Diospaj arca ñaupajpimi chishiyangacama pambaman tupajta cumurishca carcacuna.

⁷Chaipimi Josueca: — ¡Aij, Mandaj Jatun Dioslla! ¿Imapajtaj Jordán yacutaca ch'imbachircanguiyari? Amorreocuna ñucanchijta chingachichun, paicunapaj maquipi churangapajllamari ch'imbachishcangui. Jordán yacuta mana ch'imbashca cashpachari alli canchijman carca.

⁸¡Aij, Jatun Dioslla! Israelcunaca paicunata p'iñajcuna mishajpimari callpashpa tigramushcacuna. ¿Cunanca imatataj nishari?

⁹Cai Canaán llajtapi causajcunapish, tucui llajtapi causajcunapish yachashpaca, tucuicuna tandanacushpa muyunchishpamari ñucanchijtaca chingachingacuna. Cambaj jatun shuti ama yanganchishca cachunca ¿imatataj ruranguiyari? — nircami.

¹⁰Mandaj Diosca Josuetaca: — ¿Ima nishpataj pambapi cumuriyacungui? Jatari.

¹¹Israelcunamari juchallin. Paicunaca mandashcacunata pajtachishunllami nishpa ñucahuan ari ninacushca jahuamari, mana cazushpa p'aquin. Chingachinapajmi nishcatamari japishca. Apanaca mana alli cashcata yachashca jahuamari shuhuashpa, paipaj cashcacunahuan huaquichishpa charicun. Chashnamari llullashpa puricun.

¹²Paicunapish chingachinapajlla cajcuna tucushcamantami, paicunata p'iñajcunahuanca mana ch'imbapura shayari tucuncuna. Cancunapaj chaupimanta chai chingarinapaj tucushcata mana anchuchijpica, ña mana ashtahuan cancunahuan cashachu.

¹³Jatari, israelcunata chuyayachi. Paicunataca cashna ni: Cayapajlla chuyayaichij. Israelcunata Mandaj Diosca cashnami nin ni: Cancunapurapica chingarinapaj tucushca runami tiyan. Cancunapuramanta chai runata mana anchuchishpaca, cancunata p'iñajcunahuanca mana ch'imbapura shayari tucunguichijchu.

¹⁴Tucui aillucuna caya tandanacunguichij. Maijan ailluta ñuca cayajpica, chai aillumantaca cada ñaupa yayapaj huahua huahuapura shamunguichij. Maijan yayapaj huahua huahuapurata ñuca cayajpica, chai huahua huahuapuramantaca cada huasi ucupuracuna shamunguichij. Chaicunapuramanta ñuca cayajpica, chai huasi ucupuracunata cada yayata cayanguichij.

¹⁵Chaicunapurapi chingachinapaj tucushca runa japi tucujpica, paipaj huasi ucupuracunandij, tucui imallata charishcacunandij rupachishpa tucuita chingachinguichij. Mandaj Dioshuan ari ninacushcata p'aquishpa, israelcunata jatunta pingachishcamantaca chashnami rurana canguichij — nircami.

¹⁶Chaimi Josueca, cayandij tutamanta utcata jatarishpa tucui israelcunata tandachishpaca, tucui aillucunata huashan huashan cayarca. Mandaj Diosca, mana allita rurajca Judá aillupi cashcatami ricuchirca.

¹⁷Judá ailluta c'uchuyachishpaca, Zera shuti runapaj huahua huahuacunapuratami ricuchirca. Chaicunata c'uchuyachishpaca, Zabdi shuti runapaj huasi ucupuracunatami ricuchirca.

¹⁸Zabdi runapaj huasi ucupuracunapi caj c'aricunataca, shuj shujlla c'uchuyachishpaca, Carmi runapaj churi Acantami ricuchirca. Carmi runaca, Zabdi runapaj churimi carca. Zabdica, Zera runapaj churimi carca. Paica Judá aillumantami carca.

¹⁹Chaipimi Josueca Acán runataca: — Ñuca huahualla, israelcunata Mandaj Diostaca sumajmari cangui, allimari cangui nishpa, can imallata mana allita rurashcataca ama pacashpa huillai — nirca.

²⁰Chaimi Acanca Josuemanca: — Mana pacai tucunichu. Israelcunata Mandaj Diosta p'iñachishpami juchallishcani. Cashnamari rurarcani:

²¹Jericó pueblo runacunata quichushcacunapimari Babilonia llajtapi rurashca sumaj churanatapish, 200 siclo cullquitapish, pichca chunga siclota pizaj mirga curitapish ricushpa chaicunata achcata munashpa pacalla japishpa apamurcani. Chaicunataca ñuca carpa huasi ucupimi pambashpa churarcani. Cullquitapish chaicuna ucullapitajmi churarcani — nirca.

²²Shina nincami Josueca, maijancunata Acanpaj carpa huasiman cacharca. Paicuna rishpaca Acanpaj carpa huasipica tucui chaicunatami pambashpa pacashcata japircacuna. Cullquitapish chaicuna ucupi cajtami japircacuna.

²³Carpa huasi ucu chaupi pambapi pambashcata japishpaca, Josuepaj israelcunapaj ñaupajman apashpami, Mandaj Diospaj ñaupajpi churarcacuna.

²⁴Chai q'uipami Josueca, israelcunandij tucushpa Zerapaj churi Acantaca: Pai shuhuashca cullquindij, churanandij, mirga curindij, paipaj churicunandij, ushushicunandij, huagracunandij, ovejacunandij, burrocunandij, carpa huasindij, tucui imalla charishcacunandij Acor pugru pambaman aparcacuna.

²⁵Chaipimi Josueca Acantaca: — ¿Ima nishpataj ñucanchijta cashna llaquichircanguiyari? Cunan cantapish Mandaj Diosmi llaquichigrin — nijpica, tucui israelcunami Acantapish, tucui paipaj cajcunatapish rumicunahuan shitarcacuna. Rumicunahuan shitashca q'uipaca rupachircacunami.

²⁶Chai jahuapica, cunancama tiyacuj jatun montón rumicunatami montonarcacuna. Chaipimi Mandaj Diosca israelcunahuan yallitaj p'iñarishca cashcamantaca alli tucurca. Acanta huañuchishca pambataca cunancamami, Acor pamba nincuna.