Read Chimborazo Highland Quichua 2 TESALONICENSES 3 Bible Online

2 TESALONICENSES 3 - Chimborazo Highland Quichua bible

2 TESALONICENSES 3

¹Chaimanta huauquicuna, Mandaj Jesuspaj shimica cancunapurapi ima shina tucushca shinallataj shujtaj llajtacunapipish utca yachaj chayachijpi, alli nishca cachun ñucanchijmanta Taita Diosta mañaichij.

²Millai gentecunamanta Taita Dios huaquichichunpish ñucanchijmanta mañaichij. Crinataca mana tucuicuna crishun nincunachu.

³Ashtahuanpish Mandaj Jesusca tucui imatapish pajtachijmi. Paillatajmi cancunataca sinchiyachinga, millaimantapish huaquichinga.

⁴Ñucanchij mandashcataca cancunaca ruracunguichijmi, ashtahuan ruranguichijmi. Chaitaca Mandaj Jesús rurachicuna yuyaillami canchij.

⁵Cancunata Mandaj Jesusllataj cancunapaj shungucunataca Taita Diospaj c'uyaipi pushachun. Cristo shinallataj mana p'iñarij canatapish cuchun.

⁶Ashtahuanpish huauquicuna, ñucanchijta Mandaj Jesucristopaj shutipimi cancunataca cashna mandanchij. Ñucanchij yachachishcata chasquishca shina mana purishpa, maipish cachun purij huauquicunamanta anchurichij.

⁷Ñucanchij ima shina yachachishcata, ima shina causashcata ricushpa causanataca ñami yachanguichij. Ñucanchijca cancunapurapica mana maipish cachun puricurcanchijchu.

⁸Ñucanchijca pipaj micunata yangamanta mana micurcanchijchu. Chaipaj randica, maijan cancunata ama p'iñachingapajmi punllapish tutapish chai yuyai, mana shaicushpa trabajarcanchij.

⁹Ñucanchijca chasquinatataj charishca cashpapish, cancuna ñucanchijta ricushpa chai shina catichunmi pita mana p'iñachircanchij.

¹⁰Ñucanchij cancunahuan cashpaca: Maijanpish mana trabajasha nijca ama micuchun nishpami mandarcanchij.

¹¹Cancunapuramanta maijancunaca imapi mana trabajashpa, maipish cachun purishpa shujtajcunapajpi satiricuncuna nijtami cunanca uyanchij.

¹²Chashnacunataca ñucanchijta Mandaj Jesucristopaj shutipimi mandashpa, yuyachishpa rimanchij. Quiquin maquihuan trabajashcallata micuchun.

¹³Ashtahuanpish huauquicuna, cancunaca allita ruranataca ama shaicuichijchu.

¹⁴Cancunaman caita quillcashpa yachachishcacunata maijan mana cazujpaj shutitaca ricunallata charinguichij. Pai pingarichunca paihuanca ama tandanacunguichij.

¹⁵Ashtahuanpish paitaca ama p'iñanguichij. Chaipaj randica huauquita shina cunanguichij.

¹⁶Sumaj causaita cuj Mandaj Jesusllataj cancunamanca, tucuipi sumaj causaita cushpa caticuchunlla. Mandaj Jesusca tucui cancunahuan cachun.

¹⁷Cai tucui quillcataca Pablomi alli cashca cachun nishpa, rijsinallata ñuca quiquin maquihuan cashna quillcani.

¹⁸Ñucanchijta Mandaj Jesucristopaj mana c'uyaipajta c'uyaj canaca tucui cancunahuan cashca cachun. Chashna cachun.