Read Chimborazo Highland Quichua 1 TIMOTEO 3 Bible Online

1 TIMOTEO 3 - Chimborazo Highland Quichua bible

1 TIMOTEO 3

¹Cai shimica cashnatajmi: “Maijanpish obispo casha nishpaca, allita ruranatami munan”.

²Ashtahuanpish obispoca mana juchachipaj cashnataj cachun, shuj huarmipajlla cusa, alli yuyaiyuj, yachaj, alli nishca, puzachij, yachachinapajtaj caj,

³mana machaj, macanacuita mana munaj, cullquita munashcamanta ima mana allita mana ruraj, ashtahuanpish c'uyaj, mana p'iñarij, mana mitsa,

⁴paipaj huasipipish alli mandaj, paipaj huahuacunapish cazujcuna, alli nishcacuna canata yachachij cachun.

⁵(Maijanpish paipaj quiquin huasipi mana mandai tucuj cashpaca, Taita Diospaj tandanacushca crijcunatacarin ¿ima shinataj cuidangari?)

⁶Cunanlla crijca ama cachun. Ñataj jatun tucushpa, diablo urmashca shina urmanman.

⁷Canllaman cajcunapish alli nishca cachun. Mana alli nishca tucushpa, diablopaj urmachinapi ñataj urmanman.

⁸Diaconocunapish cashnami cana. Alli nishcacuna, imatapish pajtachijcuna, mana machajcuna, cullquita munashcamanta ima mana allita mana rurajcuna,

⁹pi mana yachashca crinatapish chuya yuyaihuan alli cuidajcuna cachun.

¹⁰Shinallataj paicunataca ima shina cashcata ricushcaraj cachun. Chai q'uipa mana juchachipaj cashpami, diácono cai tucun.

¹¹Huarmicunapish alli nishcacuna, yanga juchachishpa mana parlarijcuna, ashtahuanpish alli yuyaiyuj, tucuipi pajtachijcuna cachun.

¹²Diaconocunaca shuj huarmipajlla cusa cachun. Huahuacunatapish, huasipi cajcunatapish alli mandaj cachun.

¹³Chashna cashpami, diaconopaj rurana cashcataca alli rurashpa, alli nishca cangacuna. Cristo Jesuspi crinatapish mana manchashpami huillangacuna.

¹⁴Canta ricunaman ñalla shamuna yuyailla cashpapish, caitami quillcani.

¹⁵Ima shinamanta ñuca mana utca shamujpica, causaj Diospaj huasi caj tandanacushca crijcunata ima shina pushanata yachachunmi caita quillcani. Paicunaca pilar shina, mana llullata sinchita cuidajcunami.

¹⁶Ñucanchij crishcaca pi mana yachashca, yallitaj jatunmari. Chaitaca mana chashnachu nishpa, pi mana ni tucunchu: Taita Diosca, aichayuj tucushpami ricurishca. Espiritupish cashcata rurajmi nircami. Angelcunaca ricurcacunami. Mana judiocunamanpish paimantaca huillarcacunami. Cai pachapica, crircacunami. Sumaj jahua pachapica chasquishcami carca.