Read Chimborazo Highland Quichua 1 TIMOTEO 5 Bible Online

1 TIMOTEO 5 - Chimborazo Highland Quichua bible

1 TIMOTEO 5

¹Yuyajcunataca ama sinchita rimangui, ashtahuanpish quiquin yayata shina yuyachishpa rimangui. Q'uipa huiñaicunatapish quiquin huauquicunata shina yuyachishpa rimangui.

²Yuyaj huarmicunataca, quiquin mamata shina, q'uipa huiñai huarmicunatapish, quiquin panicunata shina chuya yuyaihuan rimangui.

³Viudacunataca sapalla cajpitaj, ayudangui.

⁴Ashtahuanpish maijan viuda huahuacunata, nietocunata charijpica, paicunaraj quiquinpura cashcamanta, ayudanata yachachun. Paicunata huiñachishcamanta yaya mamaman tigrachij cachun yachachingui. Chashna rurachunmi Taita Diosca munan.

⁵Ashtahuanpish sapalla caj viudaca, tutapish, punllapish Diosta rogana, mañana yuyaillami causan.

⁶Maijan viudaca aichata cushichina yuyailla puricushpaca, huañushca shinallatajmi.

⁷Ama pi juchachishca cachun, caitapish mandangui.

⁸Maijanpish quiquinpurapaj, ashtahuantajca paipaj huasi familiapaj imallata rurana cashcata mana rurajca, crishcata saquishpa mana crijtapish yallimi tucushca.

⁹Viudacunapaj shutita churanapica sujta chunga yalli huatata charijllapi, shujlla cusapaj huarmi cashca cajllapi,

¹⁰allicunata rurashpa ricuchij cashca cajllapi, huahuacunatapish alli huiñachij cashca cajllapi, puzachij cashca cajllapi, jucha illajcunapaj chaquicunata maillaj cashca cajllapi, llaquihuan cajcunata ayudaj cashca cajllapi, tucui imatapish allicunata ruraj cashca cajllapimi churana.

¹¹Viudacunapaj shuticunata churanapica, q'uipa huiñai viudacunapaj shuticunata churachunca ama saquingui. Paicunaca cazarana munaicuna atijpi Cristota p'iñashpa cazarasha ninllacunami.

¹²Chashna rurashpaca paicuna nishcata mana pajtachishcamantaca llaquimi tucuncuna.

¹³Shinallataj huasin huasin purishpami, q'uilla tucuncuna. Mana q'uillallapish tucuncunachu, ashtahuanpish parlaricujcuna, maipipish satirijllacuna, mana rimana cashcata rimajcunapishmi tucuncuna.

¹⁴Ashtahuanpish q'uipa huiñai viudacunaca cazarashpa, huahuacunata alli huiñachishpa, paipaj huasi familiata mandachunmi munani. P'iñajcuna juchachishpa cushicuna ama tucuchunmi chashnaca nini.

¹⁵Maijancunaca crishcata saquishpami, Satanasta ña caticuncuna.

¹⁶Maijan crij huauqui cashpa, pani cashpapish viudacunata charishpaca paicunallataj ima illashcata cuchun. Chashna rurajpimi, tandanacushca crijcunaca familiata mana charij viudacunapaj pajtata charingacuna.

¹⁷Tandanacushca crijcunata alli mandaj ancianocunaca, ishquiman cuna cashcata japichun. Ashtahuantajca huillana yuyailla, yachachina yuyailla cajcuna chashna japichun.

¹⁸Chaitami Quillcachishcapica: “Trillaj huagrataca, ama shimita huatangui” nin. Taita Diospajta rurajpish pai rurashcamantaca japinatajmi can.

¹⁹Shuj ancianota juchachijpi, ishqui cashpa, quimsa cashpa huillajcuna mana tiyajpica, ama chasquingui.

²⁰Juchata rurashpa caticujllacunataca, caishujcunapish manchachun tucuicunapaj ñaupajpi sinchita rimai.

²¹Taita Diospaj, Mandaj Jesucristopaj, pai agllashca angelcunapaj ñaupajpimi, c'uyaihuan cantaca mingani. Pita ama llaquichishpa, shujllaman ama tucushpa caicunapi nishca shina rurangui.

²²Manaraj alli ricushpaca, maijanpaj jahuapipish maquicunata ama utca churangui. Ñataj shujtajcunapaj juchacunapi chagruringuiman. Ashtahuanpish chuya catingui.

²³Canca huijsa nanaihuan ungushcalla cashcamanta, yacullataca ama ubyangui, ashtahuanpish asha vinotapish ubyangui.

²⁴Maijancunapaj juchacunaca, pi manaraj tapujpimi ricurin. Ashtahuanpish shujtajcunapajca, q'uipatami yacharin.

²⁵Shinallatajmi allita rurashcacunapish ricurin. Shujtaj shina rurashcacunapish, mana pacalla saquiri tucunchu.