Read Chimborazo Highland Quichua 2 TIMOTEO 1 Bible Online

2 TIMOTEO 1 - Chimborazo Highland Quichua bible

2 TIMOTEO 1

¹Taita Dios munashcamanta Jesucristopaj apóstol Pablomi cani. Cristo Jesusmanta huiñai causaita cusha nishcata huillajmi cani.

²Timoteo canca ñuca c'uyashca huahuami cangui. Dios Yayapaj, ñucanchijta Mandaj Jesucristopaj mana c'uyaipajta c'uyaj canapish, llaquij canapish, sumaj causaipish canhuan cashca cachun ninimi.

³Ñaupa yayacuna shinallatajmi ñuca Diostaca chuya yuyaihuan paipajta ruracuni. Tutapish punllapish paita mañacushpa canta yuyarishpaca, Diostaca pagui nicunillami.

⁴Can huacashcata yuyarishpaca, achcata cushicungapajmi canta ricuna munaihuan cani.

⁵Canca mana nij tucushcalla crijtaj cashcatami yuyarini. Cambaj abuela Loida, cambaj mama Eunicerajmi alli crij carca. Canpish chashnallataj cana cashcatami yachani.

⁶Canpi ñuca maquita churajpi, rurai tucunata Dios cushcataca, ninata causachij shinami causachichun cunani.

⁷Diosca ñucanchijmanca, manchana yuyaita cuj espiritutaca mana cushcachu. Ashtahuanpish poderta cuj, c'uyaita cuj, quiquinllataj jarcarij canata cuj espiritutami cushca.

⁸Chaimanta, ñucanchijta Mandaj Jesusmanta huillanatapish, ñucapish paimanta huillacushcamanta prezu cashcata huillanataca ama pingaringui. Ashtahuanpish alli huillaita huillacushcamanta llaquichijpipish Dios llaquita apai tucunata cushcahuanca canpish ñuca shinallataj llaquita apailla.

⁹Diosmi ñucanchijta jucha illaj cachun cayashpa quishpichirca. Mana ñucanchij imata rurashcamantachu chashna rurarca. Ashtahuanpish pai munashca shinami mana c'uyaipajta c'uyashpa Cristo Jesushuan shujllata rurashpa chashna rurarca. Chaitaca huiñai, huiñaimantami Diosca chashna rurasha nishca.

¹⁰Chaitaca ñucanchijta Quishpichij Jesucristota cachashpami ricuchirca. Paimi huañuitaca anchuchirca. Alli huillaimantaca mana ismuj causaiyujta rurashpami achijman llujshichirca.

¹¹Cai alli huillaita mana judiocunaman huillachun, apóstol cachun, yachachij cachun churashcami cani.

¹²Chaimantami llaquita apacuni. Chashna cashpapish, pita crishcataca yachanimi. Chaimanta ñucaca mana pingarinichu. Paica huaquichingapaj poderyuj cashcamantaca ñuca mingashcataca shamuj punllacama huaquichinataj cashcatami yachani.

¹³Crinatapish, c'uyaitapish Cristo Jesusmanta cashca alli yachachinacunata ñuca yachachishcataca, ama saquishpa catirangui.

¹⁴Alli yachachinata Dios mingashcataca, ñucanchijpi causacuj jucha illaj Espirituhuan alli cuidangui.

¹⁵Asiamanta tucui cajcuna, ñucata shitashpa rishcataca ñami yachangui. Paicunapurapica Figelo, Hermogenespishmi carca.

¹⁶Cadenacunahuan huatashca cajpipish Onesiforoca mana pingashpami, achca cutin ñucataca cushichirca. Chaimanta Mandaj Jesusca paipaj huasipi cajcunataca llaquishca cachun.

¹⁷Shinallataj Romaman chayashpaca mana samarishpami, japingacama mashcarca.

¹⁸Efesopipish, ñucanchijtaca achcatami ayudarca. Chaitaca allimi yachangui. Chaimanta Mandaj Jesusca, paitaca shamuj punllapi llaquishca cachun.