Read Chimborazo Highland Quichua 2 TIMOTEO 2 Bible Online

2 TIMOTEO 2 - Chimborazo Highland Quichua bible

2 TIMOTEO 2

¹Ñuca huahua Timoteo, Cristo Jesushuan shujlla cashcamanta mana c'uyaipajta c'uyaj canahuan sinchiyai.

²Achcacunapaj ñaupajpi ñuca yachachishcata uyashcataca, shujtajcunata yachachi tucuipaj, alli pajtachijcunaman mingai.

³Canca Jesucristopaj alli soldado cashcamanta llaquicunata apailla.

⁴Maijanpish soldado tucushpaca, paita mandajpaj munashcata rurana yuyaillami. Paipaj munaita ruranataca mana yuyanchu.

⁵Callpashpa mishanacujcunapish callpana cashca shina mana callpashpaca, coronataca mana japinchu.

⁶Chagrajca granota japingapajca allpatarajmi allichin.

⁷Ñuca ima nishcataca yuyaringui. Chaicunataca Mandaj Jesusllatajmi tucuita entendichinga.

⁸Davidpaj huahua huahuamanta caj Jesucristo huañushcacunapaj chaupimanta causarishcata yuyari. Ñucaca chai alli huillaitami huillani.

⁹Chaimantami llaquicunata apacuni, millaita ruraj shina prezushcapish cani. Ashtahuanpish Diospaj shimica mana prezuchu.

¹⁰Dios agllashcacuna Cristo Jesushuan shujlla tucushpa quishpichishca cachun, sumaj huiñai causaita charichunmi, paicunata c'uyashcamanta tucui llaquita apacuni.

¹¹Cai huillashcacunaca chashnatajmi: Paihuan huañushca cashpaca, paillahuantajmi causashun.

¹²Llaquicunatapish apashpaca, paihuanmi mandashun. Paita mana rijsinchijchu nijpica, paipish ñucanchijtaca mana rijsinichu ningami.

¹³Ñucanchij mana pajtachij cajpipish, paica pajtachicungallami, pai pajtachij cashcataca maitataj yangapi churangari.

¹⁴Imata nisha nishca shimicunamanta rimanacucujcunataca cai ñuca yachachishcacunata yuyachishpa, Mandaj Jesuspaj ñaupajpi cunangui. Chashna rimanacunaca imapaj mana allichu, ashtahuanpish uyajcunata llaquichinapajllami.

¹⁵Diospaj ñaupajpi paipajta rurajtaj cashca ricuringapajca, allita rurana yuyailla rurangui. Chashna cashpami imata mana pingaringui, mana llulla shimitapish alli yachashpa, ima shina cashcatataj alli yachachingui.

¹⁶Ashtahuanpish yanga mapa parlocunataca amataj uyangui. Caicunaca millaillamanmi ashtahuan ashtahuan chayachin.

¹⁷Chai parloca, cáncer shinami tucuchinga. Himeneohuan, Filetohuanmi chashna tucurca.

¹⁸Paicunaca mana llullamanta anchurishpami, ñami causarircanchij nishpa puricuncuna. Chashnami maijancunapaj crishcata muspachircacuna.

¹⁹Ashtahuanpish Taita Dios sinchita callarichishpa sellashcacunaca mana cuyuchipaj sinchimari: “Mandaj Jesusca paipaj cajcunataca rijsinmi”. Chashnallataj, “Maijanpish Cristopaj shutita huillajcunaca tucui millaimanta anchurichun” ninmi.

²⁰Shuj jatun huasipica, curimanta, cullquimanta rurashcacunallaca mana tiyanchu. Ashtahuanpish caspimanta, allpamanta rurashcacunapishmi tiyan. Maijan chaicunaca allita ruranapajlla charinami, caishujcunaca yangata ruranapajlla charinami.

²¹Shinallataj maijanpish chai mana allicunamanta maillarijca, Mandaj Jesuspaj allipaj vaso, paipajta ruranapaj chuyayachishca, imapipish Mandaj Jesuspajta ruranallami canga.

²²Q'uipa huiñaicunapaj millai munaita ruranamanta anchuri. Mandaj Jesusta chuya shunguhuan mañajcunahuan tandanacushpa, cashcata ruranata, alli crinata, c'uyaj canata, sumajta causanata catirai.

²³Ashtahuanpish ch'ahuancunapaj, yuyai illajcunapaj rurashcacunaca, p'iñanacuillapi churaj cashcata yachashcamanta chaicunamantaca anchuringui.

²⁴Mandaj Jesuspajta rurajca mana p'iñanacujchu cana. Ashtahuanpish tucuicunahuan c'uyanacuj, yachachinapajtaj caj, llaquita apajmi cana.

²⁵Can huillashcata mana allichu nijcunapish, mana llullata rijsingapaj Diosman cutirichun Dios yuyaita cuna cashca yuyaihuan manso shunguhuan yuyachingui.

²⁶Diablo paipaj munaita rurachishpa, paipaj linchipi prezu charicujmanta llujshichun chashna yuyachingui.