Read Chimborazo Highland Quichua 2 TIMOTEO 4 Bible Online

2 TIMOTEO 4 - Chimborazo Highland Quichua bible

2 TIMOTEO 4

¹Mandaj Jesucristo mandanapaj shamushpaca, huañushcacunaman causajcunamanpish paicuna imalla rurashcatami ricuchinga. Chai Mandaj Jesucristopaj, Taita Diospaj ñaupajpimi canmanca mingani.

²Diospaj Shimitaca huillana horaspipish mana huillana horaspipish huillacuilla. Ima shina cashcatataj rimacuilla, sinchita cunacuilla, yuyachishpa rimaicuilla, ama p'iñarishpa yachachicuilla.

³Alli yachachinata mana uyasha nina punllacuna shamungami. Chaicunaca paicuna millaita rurashca shinallataj yachachichunmi yachachijcunataca jundachingacuna.

⁴Mana llullata uyanamantapish anchurishpami, yanga parlocunallata uyanachingacuna.

⁵Ashtahuanpish canca, tucuipi alli yuyaiyuj cai. Llaquicunatapish apai, alli huillaita huillashpa can rurana cashcataca pajtachi.

⁶Ñucaca Taita Diosman cushpa rupachinapaj animal shina ña huañunallami cani. Ñuca rina punllapish c'uchullapimi.

⁷Macanacuipica allimi mishashcani, callpashpa mishanacuitapish tucuchishcanimi, crishcatapish allimi cuidashcani.

⁸Chaimantami, cashcata ruraj cashcata ricuchij corona ñucapajca ch'icanchishca tiyacun. Chaitaca cashcata ruraj Mandaj Jesusmi shamuj punllapi cunga. Mana ñucallamanchu cunga, ashtahuanpish pai shamunata tucui c'uyajcunamanpishmi cunga.

⁹Ima shinapish ñucata ricunaman utca shamupai.

¹⁰Demas shuti runaca cai pachapi tiyajcunata munashcamantami, ñucallata saquishpa Tesalonicaman rirca. Crescenteca Galaciaman, Titoca Dalmaciamanmi rirca.

¹¹Lucasllami ñucahuan caipi. Marcosta mashcashpa canhuan pushamui. Paica ñucahuan Diospajta ruranapajca allimi.

¹²Tiquicotaca, Efesomanmi cacharcani.

¹³Can shamushpaca, Troaspi caj Carpopaj huasipi saquimushca churanata, librocunata, ashtahuantajca quillcana caracunata apamungui.

¹⁴Fierromanta imatapish ruraj Alejandroca, ñucataca achcatami llaquichirca. Chaimantaca Mandaj Jesusmi, pai rurashca shinallataj cunga.

¹⁵Paica ñucanchij huillashcacunata ama uyachun ima shinapish jarcajmi carca. Canpish paimanta huaquichiringui.

¹⁶Mandajcunapaj ñaupajpi ñuca ima shina cashcata punta rimacujpica, pi mana ñucahuan carcachu. Ashtahuanpish tucuicunami ñucallata saquircacuna. Paicuna chashna rurashcataca Diosca ama yuyarishca cachun.

¹⁷Paicuna chashnajpipish, Mandaj Jesusca ñucahuanmi carca. Pai ñucaman fuerzata cujpimi, tucui mana judiocuna uyachun huillana cashca alli huillaitaca huillarcani. Paimi ñucataca leonpaj shimimanta quishpichirca.

¹⁸Mandaj Jesusmi tucui millaimanta quishpichinga. Chashna rurashpaca, jahua pacha paipaj mandacunpi cangacamami ñucataca huaquichinga. Paitaca huiñai huiñaita jatunyachishca cachun. Chashna cachun.

¹⁹Aquilata paipaj huarmi Priscilata, Onesiforopaj huasipi cajcunatapish, alli cashca canguichij ninmi nipai.

²⁰Erastoca, Corintopimi saquirirca. Shinallataj Trofimotaca, ungushcatami Militopi saquimurcani.

²¹Ima shinapish manaraj tamya punllacuna tucujpi shamui. Eubulo, Pudente, Lino, Claudia, tucui huauquicunapishmi cancunataca alli cashca cachun nincuna.

²²Mandaj Jesucristoca cambaj espirituhuan cachun. Mana c'uyaipajta c'uyaj canapish cancunahuan cachun. Chashna cachun.