Read Chimborazo Highland Quichua HEBREOS 10 Bible Online

HEBREOS 10 - Chimborazo Highland Quichua bible

HEBREOS 10

¹Mandashcaca, q'uipata shamuna allicunata ricuchij llandu shinallami. Mana chai shamuna cashca shinatajchu. Mandashcapi nishca shina huatanta chai shinallataj sacrificiocunata Diosman cungapaj c'uchuyajcunataca manataj ima juchachina illajllataca rurai tucunchu.

²Chai Mandashcapi nishcacuna juchamanta chuyayachi tucujpica, ña mana juchayuj cashcata yuyanmanchu. Shinallataj sacrificiocunatapish ña mana ashtahuan cunmanchu.

³Ashtahuanpish cai sacrificiocunaca, juchayujcuna cashcata huatanta yuyachingapajllami.

⁴Malta torocunapaj, c'ari chivocunapaj yahuarca juchacunata mana anchuchi tucunchu.

⁵Chaimantami Cristoca cai pachaman shamushpaca, Diostaca cashna nirca: “Sacrificiota, ofrendataca mana munarcanguichu. Chaipaj randica, ñucatami aichayujta rurarcangui.

⁶Canman cushca animalcunata tucui rupachishcapish juchacunata anchuchichun imallata cushcacunapish can munashca shinaca manataj carcachu.

⁷Chaimantami: Ñuca Dioslla, can quillcachishca libropi ñucamanta nishca shinallataj can munashcata rurangapajmi shamuni nirca” nishcami.

⁸Ñaupaman nishca shinaca: (Mandashcapi nishca shina cushca) “Sacrificiopish, ofrendapish, Diosman cushpa tucui rupachishcapish, juchacunata anchuchichun cushcacunapish can munashca shinaca manataj carcachu. Manataj cushichircapishchu” ninmi.

⁹Chai q'uipaca: “Ñuca Dioslla, ñucaca can munashcata rurangapajmi shamurcani” ninmi. Chashna nishpaca, ñaupaman imalla ruracushcata anchuchishpami shujtaj mushujta churarca.

¹⁰Jesucristoca Diospaj munaita rurashpa shuj cutinlla huiñaipaj paipaj aichata ofrendata shina Diosman cujpimi, ñucanchijca jucha illajta rurashcacuna canchij.

¹¹Curacunaca tucuicunallatajmi punllanta Diospajta rurashpaca, chai shinallataj sacrificiocunata cutin cutin cuncuna. Chai cushcacunaca juchacunataca manataj anchuchi tucunchu.

¹²Ashtahuanpish Cristoca, juchacunamantaca shuj cutinllami sacrificarirca. Chai q'uipaca Diospaj alli ladopimi tiyarirca.

¹³Chaipica, paita p'iñajcunata paipaj chaqui ucupi churangacamami shuyacun.

¹⁴Chashnami shuj cutinlla Diosman cushcahuan, jucha illajta rurashpa allicunata rurajta rurarca.

¹⁵Shinallatajmi Jucha illaj Espiritupish ñucanchijmanca cashna nin:

¹⁶“Chai punllacuna q'uipaca, paicunaman cusha nishpa ari nishcaca cashnami canga: Ñuca mandashcacunataca, paicunapaj shungucunapimi churasha. Paicunapaj yuyaicunapimi quillcasha” ninmi Jatun Diosca.

¹⁷Cashnapishmi nin: “Paicunapaj juchacunata, mandashcata p'aquishcacunatapish manataj ashtahuan yuyarishachu” ninmi.

¹⁸Juchacunata chashna perdonashcacunapica, juchamanta ashtahuan Diosman cunaca ña mana tiyanchu.

¹⁹Chashna cashcamanta huauquicuna, Jesucristopaj yahuarmantami Diospajlla ashtahuan ch'icanchishca Ucumanca, pi mana jarcashca yaicui tucunchij.

²⁰Jarcachishca linsota pascashpami, causaiman pushaj mushuj ñanta ñucanchijpaj rurarca. Chai linsota nishpaca, paipaj aichatami nisha nin.

²¹Diospaj huasipica, shuj jatun curatami charinchij.

²²Ñucanchijtaca paimi mana alli yuyaicunamanta shungucunatapish chuyayachishpa, cuerpocunatapish chuya yacuhuan armachirca. Chaimanta Diospajmanca mana nij tucushcalla shunguhuan alli crijtaj c'uchuyashunchij.

²³Ñucanchijman cusha nijca pajtachijtajmi. Chaimanta ñucanchij crishpa caticushcataca, ama caita chaita yuyashpa sinchi catishunchij.

²⁴Shinallataj caishujmanta chaishujmanta ayudanacushpa, allicunata rurangapaj c'uyaihuan yuyachinacushunchij.

²⁵Ñucanchij tandanacuiman rina cashcallamanta puricujcuna, ña mana rij shinaca ama rurashunchijchu. Chaipaj randica, Jesucristo shamuna punlla ñalla chayamucushcata yachashcamantacarin, ashtahuan yuyachinacushunchij.

²⁶Mana llulla shimita yachashpa chasquishca jahua quiquin munaimanta juchallijpica, chai juchallijcunamanta pi shujtaj huañujca ña mana tiyanchu.

²⁷Ashtahuanpish chaicunataca paita p'iñaj cashcamantaca Diosmi ima shina cashcata ricuchishpa rupacuj ninapi shitajpi chai ninaca millpunga. Chaica jatunta mancharishpa ricunami canga.

²⁸Moisés Mandashcata maijan mana cazujtaca ishqui cashpa, quimsa cashpa ricushcata huillajpica, mana llaquishpami huañuchin.

²⁹Maijanpish cunan Diospaj Churita sarujcunaca Dios cusha nishpa ari nishca yahuarhuanmi jucha illajta rurashcacuna carca. Chai yahuartapish paicunaca yanganchinmi. Mana c'uyaipajta c'uyaj Espiritutapish c'amincunami. Chashnacunaca ¿mashna jatun llaquita apana cashcatataj yuyangui?

³⁰Jatun Diosca cashnami nin: “Ñucami paitapish llaquichisha, pai japina cashcatapish ñucami cusha” ninmi. Shinallataj cutinmi: “Jatun Diospaj cajcunataca paillatajmi imalla rurashcacunataca ricuchinga” ninmi.

³¹¡Causaj Diospaj maquipi urmanaca, mancharina jatun llaquimari!

³²Ñaupa punllacunapi cancunapaj yuyaita Dios achijyachijpi, ima tucushcata yuyarichij. Chai punllacunapica, jatun llaquicunataca alli macanacucuj shinamari aparcanguichij.

³³Maijancunaca c'amishcacuna tucuicunapaj ñaupajpi llaquichishcacunapishmi carcanguichij. Shinallataj maijancunaca, chashna llaquichishcacunahuan tucushpa llaquita apajcunami tucurcanguichij:

³⁴Cancunaca prezu cajcunatapish, llaquijcunami carcanguichij. Cancunapaj imalla charishcacunata quichujpipish, jahua pachapi mana tucurij charinacunata charishcamantaca cushicurcanguichijmi.

³⁵Chaimanta cancunaca, chai yuyailla canataca amataj chingachichijchu. Chaimi cancunapaj cashca jatun japinataca japinguichij.

³⁶Diospaj munaita ruraj cangapajca, mana p'iñarijmi cana. Chashna cashpami Dios cusha nishcataca japinguichij.

³⁷“Chai shamuna cajca ñallami shamunga, mana uniyangachu.

³⁸Cashcata rurajca, crishcamantami causanga. Ashtahuanpish huashaman tigrarijca, mana ñuca munashcachu” ninmi.

³⁹Ashtahuanpish ñucanchijca huashaman tigrarij, chingarijcunapuraca mana canchijchu. Chaipaj randica, crishcamantaca quishpichishcaman chayangacama catijcunami canchij.