Read Chimborazo Highland Quichua HEBREOS 12 Bible Online

HEBREOS 12 - Chimborazo Highland Quichua bible

HEBREOS 12

¹Chashna cajpica, crijtaj cashcata ricuchijcunataca achca p'uyuta shinami achcacunata ñucanchij muyundijpica charinchij. Chaimanta ñucanchijpish llashacuj shinatapish, urmachisha nij juchatapish tucui saquishpa, chayana cashcamanca mana p'iñarishpa ñaupajman catishunchijlla.

²Crij canata callarichij, alli crijta ruraj Jesusta ricurashpa catishunchijlla. Paica huañushca q'uipaca, cushicuna cashcata yachashpami paita asicujpipish mana pingarishpa chacatashca huañurca. Chaimantaca Dios mandashpa tiyana alli ladopimi tiyarirca.

³Jesusca juchayujcuna paita p'iñashpa llaquichijpipish, cancuna ama shaicurichun, ama ña mana catisha nichun chashna llaquita apashcataca yuyarichigari.

⁴Cancunaca juchata mana rurangapaj macanacucushpapish huañuchishca cangacamaca llaquitaca manaraj apashcanguichijchu.

⁵Diosca paipaj huahuacunataj cashcamanta yuyachishpa rimashcataca ñamari cungarishcanguichij. Chaimantami Quillcashcapica cashna nin: “Ñuca huahualla, alli tucuchun Jatun Dios llaquichijpipish ama mana uyasha ningui. Pai sinchita rimajpipish, ama mana catisha ningui.

⁶Jatun Diosca, pai c'uyashcacunatami ima shinapish llaquichin. Paipaj huahua cachuntaj, tucui chasquishcacunatami azotin” ninmi.

⁷Cancuna alli tucunapajllatajmi llaquichishcataca apacunguichij. Diosca paipaj huahuataj cajpimi llaquichin. ¿Maijan huahuataj paipaj yaya mana llaquichishca causan?

⁸Cancuna mana allita rurajpi Dios ima shinapish mana llaquichishpa saquijpica, mana paipaj huahuacunatajchu canguichij. Huainapaj huahuacunallami canguichij.

⁹Ñucanchij mana allita rurajpi ñucanchij yayacuna ima shinapish llaquichijpica, paicunataca allimi cazurcanchij. Shina cajpica, causaita cuj jahua pachapi caj Yayatacarin chaita yallitamari cazuna canchij. Chashna cashpami, causaita charishun.

¹⁰Ñucanchij yayacunaca ashacamallami paicunapi alli cana cashcata yuyashca shina ñucanchijtaca ima shinapish llaquichij carca. Dioscarin ñucanchij allipajllatajmi, pai shina ima jucha illaj cachun ima shinapish llaquichin.

¹¹Llaquichishcacunaca mana cushicunapaj shinami, ashtahuanpish p'iñashpa llaquichicushca shinami yuyachin. Alli tucushpa cashcata ruraj ña tucushca q'uipami llaquichishcaca allipaj cashca ricurin.

¹²Chaimanta irquiyashca maquicunata, mana cuyuri tucuj cunguricunata jatarichichij.

¹³Shinallataj cojopish ñanmanta ama llujshichun, ashtahuanpish alliyachun cancunapaj huishtu ñancunata derechaichij.

¹⁴Tucuicunahuan sumajta causanata mashcaichij, jucha illaj canapi catichij. Mana chashna cajca, Mandaj Jesustaca pipish manataj ricungachu.

¹⁵Alli ricuraichij, ñataj maijancunaca Diospaj mana c'uyaipajta c'uyaj canata chingachinguichijman. Shinallataj jayaj q'uihua huiñaj shina cancunata muspachij yuyaicuna shamujpi, chaita rurashpa shujtajcunatapish pandachinguichijman.

¹⁶Ñataj cancunapurapica maijan huainayaj tiyanman, mana cashpaca, imapish Diospajlla cashcata Esaú shina yanganchijcuna tiyanman. Paica asha micunallapimi punta churi cana cashcataca c'aturca.

¹⁷Chai q'uipaca, allicunata japinata yayaman mañashpapish, ñaupaman mana nishcamantaca mana japircachu. Esauca huacashpa mañashpapish mana imata rurai tucushcataca yachanguichijmi.

¹⁸Israelcunaca nina rupacuj, amsa, yallitaj amsa p'uyu, huairandij tamya, tuparipajlla urcullamanpish mana chayarcacunachu. Cancunacarin mana tuparipaj urcumanmi chayashcanguichij.

¹⁹Paicunaca trompetapi tocashcata, Dios rimashcatapish mana uyai tucushpami: “Ama ashtahuan rimapaichu” nishpa rogarircacuna.

²⁰Ima animal cashpapish, chai urcuman chayajpica, rumihuan cashpa, lanzahuan cashpa huañuchishcami canga nishpa mandashcata mana uyai tucushpami chashna rogarircacuna.

²¹Paicuna ricucushcaca, yallitaj mancharina cajpimi, Moisespish: “Manchaihuan chujchucunimari” nirca.

²²Ashtahuanpish cancunaca Sión urcuman, causaj Diospaj jahua pacha Jerusalenman, huaranga huaranga angelcuna tandanacushpa Diosta alabacunmanmi c'uchuyarcanguichij.

²³Diospaj punta churi Israelcuna tandanacushca crijcunapaj shuticuna jahua pacha libropi quillcashca tiyacunmanpishmi chayashcanguichij. Tucuicuna imalla rurashcata ricuchij Diospajman, cashcata rurajcunami nishpa alli nishca espiritucunapajmanpishmi chayashcanguichij.

²⁴Mushuj ari nishcapi gentecunamanta Dioshuan rimaj Jesuspajman, pai jichashca yahuarmanpishmi c'uchuyashcanguichij. Chai yahuarca Abelpaj yahuarta yalli allimi.

²⁵Riquichij, cancunata rimajtaca ama yanganchichijchu. Dios rimachishcata cai pachapi yanganchijcunaca llaquichishcatajmi carcacuna. Ñucanchijcarin jahua pachamanta rimajta yanganchishpaca llaquichishcatajmi cashun.

²⁶Chai punllacunapi Dios rimashpaca, pambapish chujchujtami rimarca. Cunancarin Diosca: “Shuj cutinhuan rimashpaca, mana cai pachallatachu chujchuchisha, ashtahuanpish jahua pachandijmi chujchuchisha” nircami.

²⁷Chashna: “Shuj cutinhuan chujchuchishami” nishcaca, Dios rurashca cuyuchipajcunata anchuchina cashcatami nisha nin. Chaipimi, mana cuyuchinapaj cashcacunalla saquiringa.

²⁸Chashna cajpica Dios maipi Mandacun mana cuyuchipajta ñucanchij japishcamantaca, pagui nishunchij. Pai munashca shina manchaihuan tucui shunguhuan servishunchij.

²⁹Ñucanchij Diosca rupachishpa tucuchij nina shinamari.