Read Chimborazo Highland Quichua HEBREOS 13 Bible Online

HEBREOS 13 - Chimborazo Highland Quichua bible

HEBREOS 13

¹Quiquin huauquindij shina caishuj chaishujhuan c'uyanacunataca amataj saquichijchu.

²Cancunaca puzachinataca, amataj cungaringuichijchu. Chashna puzachijcuna cashcamantami maijancunaca pi cashcata mana yachashpapish angelcunata puzachircacuna.

³Prezu cajcunataca cancunapish paicunahuan tandalla prezu cashcata yuyashpa yuyaringuichij. Shinallataj llaquichishcacunatapish cancunapaj aichapi llaquita apacushca shinata yuyanguichij.

⁴Cazaranaca tucuicuna alli nishca cachun. Paicuna chayarinacunapish chuya cachun. Ashtahuanpish apanacushpa causajcunata, huainayajcunataca Diosmi paicuna ima shina cashcataca ricuchinga.

⁵Cancunaca quiquinpajlla ashtahuan charij canataca ama munaichijchu. Cunan imata charishcacunallahuan cushi caichij. Chashnacunatami Diosca: “Cantaca manataj shitashachu, manataj cungarishachu” nin.

⁶Chashna cajpimi, imata mana manchashpa: “Jatun Diosca ñucata ayudajmi. Pipish ñucata imata ruranataca, mana manchanichu” ninchij.

⁷Cancunata michijcunata yuyarichij. Paicunami cancunaman Diospaj Shimita yachachin. Paicuna crishpa ima shina caticushca shina cancunapish catichij.

⁸Jesucristoca cainapish, cunanpish, huiñai huiñaipajpish paillatajmi.

⁹Cancunaca shujtaj shujtaj yachanata yachachichunca ama saquichijchu. Caitaca micunami, chaitaca mana micunachu nishcata yuyacunapaj randica, Diospaj mana c'uyaipajta c'uyashcapi shunguta sinchiyachinami alli. Imallata micunami nishpa yachachijcunata catijcunaca, ima allita mana japishcacunachu.

¹⁰Ñucanchijca shuj altartami charinchij. Chai altarmantaca Diospaj carpa huasillapitaj servijcunaca mana micui tucuncunachu.

¹¹Juchacunamanta cushca animalcunapaj yahuartaca curacunata jatun pushajllami Diospajlla ashtahuan ch'icanchishca ucuman apan. Ashtahuanpish aichataca, pueblomanta llujshichishpa canllamanmi rupachincuna.

¹²Chashnallatajmi Jesuspish paipaj quiquin yahuarhuan paipaj cajcunata jucha illajta rurangapaj, pueblomanta llujshichishca canllaman llaquita apashpa huañurca.

¹³Ñucanchijpish pueblomanta llujshishpa Jesuspajman jacuchij. Mana alli nishpa rimashcata pai apashca shinallataj apashunchijlla.

¹⁴Cai pachapica huiñaita mana chingarij pueblotaca mana charinchijchu. Ashtahuanpish q'uipa punllapi huiñaipaj tiyana pueblotami mashcacunchij.

¹⁵Chaimantami Taita Diosmanca Jesucristota cantashcata cuna canchij. Alabana sacrificioca, shimihuan paipaj shutita huillana nisha ninmi.

¹⁶Shinallataj allita ruranatapish, caishuj chaishujman ayudanatapish amataj cungaringuichijchu. Chashna sacrificiocunatami Diosca munan.

¹⁷Cancunata michijcunata cazuichij. Paicuna mandashcatapish uyaichij. Diosman imalla rurashcata ricuchina cashcamantami, paicunaca cancunapaj almataca ricuracun. Imalla rurana cashcata cushicuihuan ama llaquirishpa rurachunmi chashna cazuna canguichij. Paicuna llaquirishca rurajpica ima allita mana japinguichijchu.

¹⁸Tucui imapish alli llujshichun allita pushana yuyaillami canchij. Ñucanchijmanta Diosta mañapanguichij.

¹⁹Ñucaca cancunahuan cangapaj utca tigranata Diosta mañachunmi ashtahuanca rogani.

²⁰Sumaj causaita cuj Taita Diosmi, ñucanchijta Mandaj Jesucristotaca huañushcacunapaj chaupimanta causachirca. Ovejacunata jatun michijca, Dios cushami nishpa mushujta ari nishcatami paipaj yahuarta jichashpa huiñaipaj pajtachirca.

²¹Tucui imatapish pai munashca shina allita rurajcuna cachunca, Diosllataj cancunataca yachachichun. Jesucristomantami tucui cancunataca paillataj pai munashca shinata rurachicun. Pai Jesucristotaca huiñai huiñaita jatunyachishca cachun. Chashna cachun.

²²Cancunata cunashpaca ashallatami quillcani. Chaitaca huauquicuna, ama p'iñarishpa uyachunmi rogani.

²³Ñucanchij huauqui Timoteota, prezumanta cacharishca cashcata yachachunmi munani. Pai utca shamujpica paihuanmi cancunata ricunamanca shamusha.

²⁴Cancunapaj michijcunata, jucha illaj tucuicunatapish alli cashca cachun ninmi nipaichij. Italiapi causajcunapish alli cashca cachun ninmi.

²⁵Mana c'uyaipajta c'uyaj canaca tucui cancunahuan cashca cachun. Chashna cachun.