Read Chimborazo Highland Quichua HEBREOS 4 Bible Online

HEBREOS 4 - Chimborazo Highland Quichua bible

HEBREOS 4

¹Chaimanta ñucahuan samarinaman yaicuna tiyanmi nicujpiraj, mana yaicusha nicunguichijman. Cancunamanta maijancunaca manaraj yaicushcachu yuyachinguichij. Chaimanta alli yuyarishunchij.

²Alli huillaitaca paicunaman shinallatajmi ñucanchijmanpish huillarca. Uyashpapish mana crishcamantami, chai uyashca shimica paicunapajca yangalla tucurca.

³Paicuna chashna cajpipish ñucanchijca crishcamantami samarinapica yaicurcanchij. Chaimantami: “Mana crijcunahuanca jatunta p'iñarishpa, ñucahuan samarinamanca manataj yaicungacunachu nishpa Dios nishcaca pajtarca” ninmi. Chashna cajpipish, Diosca tucui imalla tiyajta rurashca pachamantami pai rurana cashcataca ña tucuchishca.

⁴Quillcachishca maipitajshica canchis punllamantaca cashnami nishca: “Diosca, paipaj ruranata ña tucuita tucuchishpaca, canchis punllapica samarircami” ninmi.

⁵Ña nishca shinallataj: “Ñucahuan samarinamanca, manataj yaicungacunachu” ninmi.

⁶Chashna cajpipish maijancunaca samarinamanca manaraj yaicuncunachu. Alli huillaita ñaupaman uyajcunapish mana cazushcamantami mana yaicushcacuna.

⁷Chaimantami Diosca samarinataca shujtaj punllapaj nishpa saquirca. Chai punllaca cunan punllamari. Ñaupaman huillachishcamanta achca huatacuna q'uipami Davidca: “Dios rimashcata cunan uyashpaca, cancunapaj shungucunataca ama sinchiyachichijchu” nirca.

⁸Israelcunaman chai samarinata Josué cushca cajpica, cutinca Diosca q'uipa punllapimi samarinata cusha mana ninmanchu carca.

⁹Chaimantami Diospaj huahuacunapajca, samarinaca tiyanraj.

¹⁰Diosca pai imalla ruracushcata tucuchishpa samarishca shinallatajmi, Dioshuan samaringapaj yaicujpish pai imalla ruracushcata saquishpa samaringa.

¹¹Chaimanta ñucanchijpish paipaj samarinaman yaicuna yuyailla cashunchij. Chai mana cazujcuna urmashca shinaca, maijanpish amataj urmashunchijchu.

¹²Diospaj Shimica causajmi, tucuita rurai tucujmi. Ishqui filoyuj tucui espadacunatapish yalli cashcamanta: Almatapish, espiritutapish, mucucunatapish, tullu ñutcutapish, chaupirijta yaicujmi. Shungu imalla yuyashcata, munashcatapish ricuchijmi.

¹³Imalla rurashcacunapish Diospaj ñaupajpica ima mana pacallachu. Ashtahuanpish tucui imapish paipaj ñahuipica lluchulla, pascashca ricunallami tiyacun. Ñucanchijca paimanmi tucui imalla rurashcataca ricuchishun.

¹⁴Ñucanchijca jahua pachacunata pasashpa rij, curacunata jatun pushaj curatami charinchij. Paica Diospaj Churi Jesusmi. Chaimanta ñucanchij crishpa caticushcataca alli catishunchij.

¹⁵Ñucanchijca imata mana rurai tucuj irqui cashpapish, curacunata jatun pushaj llaquij curatami charinchij. Paitapish ñucanchijta shinallatajmi mana alli yuyaicuna pandachisha nirca. Chashna cajpipish paica manataj juchallircachu.

¹⁶Ima llaquipi cajpi llaquishpa, mana c'uyaipajta c'uyaihuan ayudashca cangapajca, mana c'uyaipajta c'uyaj Dios tiyacunman mana manchashpa c'uchuyashunchij.