Read Chimborazo Highland Quichua HEBREOS 5 Bible Online

HEBREOS 5 - Chimborazo Highland Quichua bible

HEBREOS 5

¹Diospaj ñaupajpi tucuicunapaj randi ricurichunca curacunata jatun pushaj curataca gentecunapurallamantatajmi Diosca agllarca. Paicunataca gentecuna imalla cushcacunata, juchacunamanta animalcunata huañuchishpa paiman cuchunpishmi churarca.

²Paipish imata mana rurai tucuj runallataj cashpami mana yachajcunamanpish, chingarishcacunamanpish mana p'iñarij cashcata ricuchi tucun.

³Chashna cashpami, animalcunata Diosman cushpa rupachinataca paipaj juchacunamanta, shujtajcunapaj juchacunamantapish cunata charin.

⁴Maijanpish paipaj munaimantaca curacunata jatun pushaj curaca mana cai tucunchu. Ashtahuanpish Diosmari Aaronta shinallataj agllashpa churan.

⁵Chashnallatajmi Cristopish paipaj quiquin munaimanta ñucaca curacunata jatun pushaj curami cani nishpa mana jatun tucushca. Ashtahuanpish Diosmari: “Canca ñuca Churimi cangui. Ñucaca cambaj yayami tucurcani” nirca.

⁶Shinallataj Quillcachishca shujtajpica: “Melquisedec cura cashca shinallataj, canca huiñaipaj jatun curami cangui” nircami.

⁷Cristoca cai pachapi causacushpaca jatunta caparishpa, huacashpa, rogashpami huañuimanta cacharichij Diosta mañarca. Chashna manchaihuan cazuj cajpimi pai mañashcataca Diosca uyarca.

⁸Chashnami Churi cashpapish, llaquicunata apashpa Diosta ima shina cazuna cashcata yacharca.

⁹Chashna tucuita pajtachij cashpami, paita tucui cazujcunapajca huiñaipaj Quishpichij tucurca.

¹⁰Chashna cajpimi Melquisedec cura cashca shinallataj, curacunata jatun pushaj curami cangui nishpa Diosca churarca.

¹¹Cai yachanataca achcata yachachisha nicushpapish, cancuna mana uyasha nishcamantami mana jahualla yachaipaj cajpi mana yachachi tucunchij.

¹²Achca huatacunapica, ña yachachijcuna canapaj randica, Dios imallata nishca shimicunataca punta yachachishcallatataj cutin cutin yachachicunallamari tucushcanguichij. Sinchi micuita micunapaj randica, lechallata ubyacuj llullu huahuacuna shinamari tucushcanguichij.

¹³Lechellata ubyacuj shinaca, chuchucuj huahuacuna shinallami. Chaimantami cashcata ruranamanta yachachishcataca mana yachai tucuncuna.

¹⁴Sinchi micuica sinchiyashcacunapajllami. Shinallataj ima alli cashcata, ima mana alli cashcatapish agllana yuyaita charijcunapajllami.