Read Chimborazo Highland Quichua HEBREOS 6 Bible Online

HEBREOS 6 - Chimborazo Highland Quichua bible

HEBREOS 6

¹Callaripi Cristomanta chaillatataj chaillatataj yachacushcata saquishpa, ashtahuan sinchiyangapaj ñaupajman rishunchij. Huañunaman pushaj millaita ruranataca saquishpa, Diosman cutirinatapish, ima shina crinatapish,

²bautizarinapaj yachachinatapish, crijcunapaj jahuapi maquita churanatapish, huañushcacuna causarinatapish, huiñaita jatun llaquiman cachanatapish, chaicunallamanta yachanataca ama yuyashunchij.

³Dios munajpica ashtahuan yachashpa catishunmi.

⁴Maijancunaca Dios achijyachijpimi jahua pachamanta Dios cushca ima shina cashcataca yacharcacuna. Paicunaca Diospaj Jucha Illaj Espíritu cushcatapish chasquircacunami.

⁵Diospaj sumaj Shimitapish shamuj punllapi Diosca tucuita rurai tucushcahuan imallata rurana cashcatapish yacharcacunami.

⁶Chashna cai tucuita yachashca jahua, ña mana catishachu nishpa saquirishpaca, cutin alli tucungapajca Diospajmanca, ña mana cutinca tigrari tucunchu. Chashna tucushpaca, paicunallatajmari Diospaj Churitaca, tucuicunapaj ñaupajpi pugllashpa cutin chacatacuj shina rurancuna.

⁷Cutin cutin tamyajpi yacuta tsupaj allpaca alli granotami p'ucuchin. Chaimantami chagrajcunaca Dios cushca allicunata japincuna.

⁸Ashtahuanpish maijan allpaca cashacunata, abrojo cashacunata p'ucushpaca, mana alli cashcatami ricuchin. Chashna cajpica mana allichu cangui nishca cana ñami chayamucun, tucuripicarin rupachishcami canga.

⁹Ashtahuanpish c'uyashca crijcuna chashna rimashpapish quishpichishcacuna cashcamantaca, allicunata ricuchina cashcatami cancunataca shuyacunchij.

¹⁰Diosca cashcata ruraj cashcamantaca, cancunapaj rurashcacunata paipaj shutipi c'uyaihuan trabajashpa ricuchishcata, jucha illajcunapajta rurashpa cunancamapish ruracushcamantaca manataj cungaringachu.

¹¹Chaimanta cancuna shuyacushca pajtangacama ima shinalla ruracushcataca, chai shinallataj rurashpa tucuringacama ricuchichunmi munanchij.

¹²Chashna ruranataca ama q'uillanguichijchu. Chaipaj randica crishcamanta mana p'iñarishpalla Dios cusha nishcata japijcuna ima shina cashcata ricushpa allita ruraichij.

¹³Diosca Abrahamman cushami nishpaca, paita yalli shujtaj jatun mana tiyajpimi, paipaj shutillapitaj,

¹⁴cashna nirca: “Canmanca ima allitapish yallijtami cusha, canmantaca achcatami mirachisha” nircami.

¹⁵Abrahamca Dios cusha nishcataca, mana p'iñarishpalla shuyashpami chasquirca.

¹⁶Gentecunaca mana llullanichu ningapajca, paicunata yalli jatunpaj shutitami rimarin. Paicunaca chashnataj rurangapaj rimarishcamantaca, ña mana imata ninacucunachu can.

¹⁷Shinallatajmi Diospish pai cusha nishcata japijcunamanca yallitaj cuj cashcatapish, pai cusha nishcata mana shujtajyachina cashcatapish ricuchingapajca, paipaj quiquin shutillapitajmi cushatajmi nirca.

¹⁸Diosca mana llulla cashcata ricuchingapajca ima shina mana shujtajyachipajta nishcaca ishquimi tiyan. Ñucanchij mashcajcunaca, pai cusha nishpa ñucanchij ñaupajpi churashcata japina yuyaita charishcamantaca jatunta cushicushunchijlla.

¹⁹Chai yuyaica barcota charicuj fierro shinami ñucanchij almataca sinchita charicun. Diospaj carpa huasi ucupi linsohuan jarcachishca huasha ucucamami chayachin.

²⁰Chai ucumanca Jesusmi ñucanchij yaicuna ñanta pascashpa yaicushca. Chashnami Melquisedec cura cashca shinallataj curacunata jatun pushaj huiñaipaj cura tucushca.