Read Chimborazo Highland Quichua SANTIAGO 3 Bible Online

SANTIAGO 3 - Chimborazo Highland Quichua bible

SANTIAGO 3

¹Ñuca huauquicunalla, imalla rurashcataca shujtajcunata yalli ashtahuan Dios ricuchina cashcata yachashcamanta, cancunapuramantaca ama achcacuna yachachijcuna tucuichijchu.

²Tucuicunami achca cutin pandarinchij. Maijan imata rimashpapish mana pandarijca alli runami. Tucui cuerpotapish jarcari tucujmi.

³Riquichij, ñucanchijta cazuchunca caballocunapaj shimipica, frenotami churachinchij. Chaihuanmi paipaj tucui cuerpota cazuchinchij.

⁴Barcocunatapish ricuichij: Yallitaj jatuncuna cajpipish sinchi huairaca apanllami. Chashna rurajpipish, barcota pushajca uchilla timonllahuanmi pai maiman pushasha nishcaman pushan.

⁵Shinallataj cuerpopipish c'alluca uchillami. Shina cashpapish, ima imatapish yallihuan rimarinllami. Chashnallatajmi ¡uchilla ninapish, jatun sachata rupachin!

⁶Chai shinallatajmi c'allupish nina shina, cai pachapaj millaicunata rimanlla. C'allutaca ñucanchij cuerpopi caj miembrocunapurapi churashcami. Chaimi Dios rurashca cuerpotaca tucui causaipi mapayachin, rupachin. C'alluca ucu pacha nina rupacuj shinami.

⁷Tucui laya sacha animalcunata, pajarocunata, culebracunata, mama cuchapi causajcunatapish runaca mansoyachi tucunmi. Chaicunataca mansoyachishcami.

⁸Ashtahuanpish c'allutaca, pi runa mana mansoyachi tucunchu. C'alluca mana jarcaipaj millaimi, huañuchij venenohuan jundami.

⁹Chai c'alluhuanmi Dios Yayataca, allimari cangui ninchij. Chaillahuantajmi Diosman rijchajta rurashca gentecunatapish, llaqui tucushca canman ninchij.

¹⁰Chai shimillamantatajmi alli nishcapish, mana alli nishcapish llujshin. Ñuca huauquicunalla, chashna canaca mana allichu.

¹¹¿Shuj pugyullamantaca mishqui yacupish, jayaj yacupish llujshinchari?

¹²Ñuca huauquicunalla, higo yurapish aceitunata, uva yurapish higocunataca ¿p'ucunchari? Shinallataj maijan pugyupish cachi yacuta, mishqui yacutaca mana cui tucunchu.

¹³¿Maijantaj cancunapuramantaca yachaisapa, yuyaisapa canguichij? Yachaj, manso shungu cashcataca, alli causashpa, allicunata rurashpa ricuchingui.

¹⁴Ashtahuanpish huañurishpa p'iñarinata, cambaj shungupi shujtajcuna shina canatapish charishpaca, ama jatun tucunguichij. Manapish chashna cashcataca ama llullanguichij.

¹⁵Chashna yuyaica, jahua pachamantaca mana shamunchu. Chaica cai pachamanta, gentecunamanta, diablomantami shamun.

¹⁶Huañurinacuna shujtajcuna shina cana tiyanpica, pandarinacuna, mana alli ruraicunallami chaipica tiyan.

¹⁷Jahua pachamanta yachaj canaca ashtahuanca chuya cana, chai q'uipaca sumajta causana, c'uyaj cana, mana p'iñarij cana, llaquij cana, allita rurashca granoshcahuan junda canami shamun. Chashna cashpaca nij tucuj cana, mishqui shimi jayaj shungu cana illajllami.

¹⁸Shujtajcunahuan sumajta causanata mashcajcunamanca Diosmi sumaj causaita, cashcata ruraj canata cunga.