Read Chimborazo Highland Quichua SANTIAGO 4 Bible Online

SANTIAGO 4 - Chimborazo Highland Quichua bible

SANTIAGO 4

¹¿Maimantataj cancunapurapica macanacuicuna, c'aminacuicunaca shamun? ¿Manachu cancunapaj cuerpollapitaj mana alli yuyaicuna tiyashcamanta chaita rurachicun?

²Charinata munashpapish mana charinguichijchu. Shujtajcunapaj charishcacunata cambaj cachun yuyashpa huañuchishpapish, imayuj mana tucunguichijchu. Imata charinata munashpa macanacushpapish, p'iñanacushpapish Diosta mana mañashcamantaca imata mana japinguichijchu.

³Mañashpapish mana chasquinguichijchu. Cancuna munashcapi cushicushpa tucuchingapajlla mana alli yuyaihuan mañashcamantami mana chasquinguichij.

⁴¡Cai pachahuan huainayajcuna! ¿Manachu cai pachahuan apanacunaca, Diosta p'iñachij cashcataca yachanguichij? Maijanpish cai pachapaj amigo tucushpaca, Diosta p'iñajmi tucun.

⁵“Ñucanchijpi causachun pai churashca Espirituca, paipajlla causachunmi ñucanchijtaca munan” nishpa Quillcachishcapi nishcataca ¿manachu yachanguichij?.

⁶Ashtahuanpish Diosca, mana c'uyaipajta c'uyaj canatami achcata cun. Chaimantami: “Diosca valishca tucujcunataca mana ricunachin. Mana jatun tucujcunamanmi mana c'uyaipajta c'uyaj canata cun” ninmi.

⁷Chaimanta Diosta cazuichij, diablotaca ama ricunachichijchu. Chashna rurajpica paica miticungallami.

⁸Diosman c'uchuyaichij, paipish cancunapajman c'uchuyangami. Juchayujcuna, maquicunata p'icharichij. Ishqui yuyaiyujcunapish, cancunapaj shungucunata chuyayachichij.

⁹Llaquirichij, aij nichij, huacaichij. Asinapaj randica, huacaichij. Cushicunapaj randica, llaquirichij.

¹⁰Jatun Diospaj ñaupajpica, ama jatun tucuichijchu. Paimi cancunataca jatunyachinga.

¹¹Huauquicuna, caishuj chaishuj ama huashalla rimaichijchu. Maijanpish huauquita huashalla rimaj, paipaj huauquita juchachijca, Mandashcatami huashalla riman, Mandashcatami juchachin. Mandashcata can juchachij cashpaca, Mandashcata mana ruraj, paita juchachijmi cangui.

¹²Mandashcata cujca shujllamari. Paimi quishpichi tucun, llaquimanpish cachai tucun. Ashtahuanpish canca ¿pitaj cangui shujtajta juchachingapajca?

¹³“Cunan cashpa, caya cashpapish cai puebloman, chai puebloman rishunchij. Chaipi shuj huatata cangapaj. Randishpa, c'atushpa cullquita mirachingapaj” nijcuna ¡uyaichij!

¹⁴Caya punlla ima tucuna cashcata mana yachashpami chashna ninguichij. ¿Cancunapaj causaica imataj? P'uyu ashacama ricurishpa, ñapish chingarij shinallami.

¹⁵Chashna ninapaj randica: “Jatun Dios munajpica causashunmi, caitapish chaitapish rurashunmi” ninami canguichij.

¹⁶Ashtahuanpish cunanca, cancuna charishcahuanmi jatun tucunguichij. Chashna jatun tucunaca mana allichu.

¹⁷Maijanpish allita ruranata yachashpapish, mana rurajca juchayujmi tucun.