Read Chimborazo Highland Quichua 1 PEDRO 1 Bible Online

1 PEDRO 1 - Chimborazo Highland Quichua bible

1 PEDRO 1

¹Jesucristopaj apóstol Pedromi, quiquin llajtamanta llujshishpa caita chaita rishpa Pontopi, Galaciapi, Capadociapi, Asiapi, Bitiniapi causacujcunaman quillcani.

²Dios Yayaca paipaj yachaihuan ñaupaman yuyarishca shina agllashcami canguichij. Paita cazuchunmi, Jesucristopaj yahuarhuan maillashpa paipaj Espirituhuan jucha illajta rurashcacuna canguichij. Mana c'uyaipajta c'uyaj canata, sumaj causaitapish ashtahuan mirachishca cachun ninimi.

³Ñucanchijta Mandaj Jesucristopaj Dios Yayataca, alli nishca cachun. Paica, ñucanchijta jatunta llaquij cashcamantami huañushcacunapaj chaupimanta Jesucristota causachishpa, huiñaita causagrina yuyailla cachun, ñucanchijtaca cutin huacharichirca.

⁴Mana ismuj, mana mapayaj, mana chingarij herenciata jahua pachapi huaquichishcata cancuna japij cachunmi chashna rurarca.

⁵Cancunaca crishcamantami Diospaj maquipi huaquichishca canguichij. Pai quishpichishcata tucuri punllapi ricuchingacamami chashna huaquichishca canguichij.

⁶Chaimanta cunanca, crijtaj cashcata ricuna ch'ican ch'ican llaquicunahuan ashacama llaquichishca cashpapish, cancunaca achcatami cushicucunguichij.

⁷Cancunata crijtaj cashcata ricushcaca, sumaj curitapish ashtahuan yallimari. (Chingarijlla curitapish ninapi rupachishpami, alli cashcata mana alli cashcataca ricuna) Llaquita apashpaca, shamuj punllapi Jesucristo ricurijpica alabashca, alli nishca, sumajyachishcami canguichij.

⁸Cancunaca mana ricushpapish, Jesucristotaca c'uyanguichijmi. Cunan mana ricushpapish paipi crishcamantami, mana huillai tucuipaj jatun sumaj cushicuihuan cancunaca cushicucunguichij.

⁹Crishcamanta cancunapaj alma quishpichishca cashcamantami, chashna cushicucunguichij.

¹⁰Mana c'uyaipajta c'uyashpalla cancunata quishpichina punlla shamunataca Profetacunami huillarcacuna. Chashna huillacushpapish Dios ima shina quishpichinata rurashcataca callarishpa tapushpami yachashun yuyacurcallacuna.

¹¹Cristo ima shina llaquita apanata, pai llaquita apashca q'uipa jatunyachishca canatapish paicunapi caj Cristopaj Espiritumi ñaupaman manaraj chashna tucujpi, profetacunamanca yachana yuyaita cushca. Chashna yachana yuyaita cujpimi ¿pitaj chai Cristoca canga? ¿ima punllataj chashnaca tucunga? nishpa yuyacushcallacuna.

¹²Profetacuna chashna yuyacujpipish Diosllatajmi paicuna yachashun nicushcaca mana paicunapaj cashcata, ashtahuanpish ñucanchijpaj cashcata ricuchishca. Chai profetacuna huillacushcataca jahua pachamanta cachashca Jucha Illaj Espíritu huillachijpimi, alli huillaita cancunaman cunan huillacuncuna. Caicunataca jahua pacha angelcunapishmi yachaiman yuyacuncuna.

¹³Chaimanta alli yuyaihuan chumbillirishca shina caichij, alli yachaj caichij. Jesucristo shamujpi mana c'uyaipajta c'uyashcata chasquishcaman chayana yuyailla caichij.

¹⁴Alli cazuj huahuacuna shina caichij. Ñaupa manaraj yachashpa ruracushca mapa munaicunataca ama ruraichijchu.

¹⁵Ashtahuanpish cancunata agllajca, ima jucha illajllami. Shinallataj cancunapish tucui causaipi ima jucha illajlla caichij.

¹⁶Quillcachishcapica: “Ñucaca ima jucha illajmi cani, cancunapish ima jucha illajlla caichij” ninmi.

¹⁷Tucui imalla rurashcata, mana ñahuita ricushpalla ricuchij Diosta Yaya nishpa mañajcuna cashpaca, cai pachapi pasacujlla shina causashcacamaca tucuipi paita manchashpa causaichigari.

¹⁸(Cancunapaj ñaupa yayacunamanta chasquishca yangalla causaimantaca Diosmari cancunataca llujshichirca) Mana ismuj curihuan, cullquihuanchu llujshichirca, chaitaca yachanguichijmi.

¹⁹Ashtahuanpish ima mapa illajlla, chuya malta oveja shina, Cristopaj sumaj yahuarhuanmi llujshichishcacuna canguichij.

²⁰Paitaca manaraj cai pachata rurashpami, huañunami nishca carca. Chaitaca cancunata c'uyashcamantami, cai punllacunapi ricuchishca.

²¹Huañushcacunapaj chaupimanta causachishpa jatunyachij Diostaca Jesucristomantami crircanguichij. Cancuna Diosta crishpa pai yuyailla cachunmi chashna rurarca.

²²Espíritu yuyaita cujpimi, mana llullata huillashcataca cazushcanguichij. Ama nij tucushpalla huauquindijcuna shina c'uyanacunapajmi cancunapaj almataca chuyayachishcacuna canguichij. Chaimanta caishuj chaishuj tucui shunguhuan mapa yuyai illajlla c'uyanacuichij.

²³Cancunaca huañujlla yayamantaca, mana cutin huacharishcanguichijchu. Ashtahuanpish huiñaita causaj, mana tucurij Diospaj Shimita uyashcamantaca, mana huañuj yayamantami huacharishcanguichij.

²⁴Quillcachishcapica: “Tucui gentecunaca, q'uihua shinallami. Paicuna sumaj cashcapish, q'uihua sisa shinallami. Quihua chaquirijpica, sisapish urmanllami.

²⁵Ashtahuanpish Jatun Diospaj shimipi nishcaca huiñaita pajtacungallami” ninmi. Chai Shimimantami alli huillaitaca cancunaman huillacun.