Read Chimborazo Highland Quichua 1 PEDRO 4 Bible Online

1 PEDRO 4 - Chimborazo Highland Quichua bible

1 PEDRO 4

¹Cristoca ñucanchijmantami paipaj aichapi llaquita aparca. Cancunapish llaquita apana yuyailla allichirichij. Maijanpish aichapi llaquita apajca, juchamantami tucui anchurishca.

²Tucui paipaj crij causaipica, mana runacunapaj munaita rurangapaj ashtahuanpish Diospaj munaita rurangapajmi chashna anchurishca.

³Diosta mana rijsijcuna munashcata ruranataca, ñami sarunman yallitaj rurarcanguichij. Aicha munashcata rurashpa, aichata cushichishpa, machashpa, maipish cachun fiestacunata rurashpa, mana alli yuyaicunallahuan cushicushpa, millanayaj rurashcalla dioscunata adorashpami purircanguichij.

⁴Cancuna paicunahuan ima millaitapish ruranaman cacharishca shina ña mana rijpimi, imamanta ña mana chashna rurashcata mana yachashpa cancunataca maipish cachun c'amincuna.

⁵Paicunaca causajcunapish, huañushcacunapish, imalla rurashcata ricuchingapaj allichishca tiyacujmanmi, paicunallataj huillangacuna.

⁶Shujtajcunata shinallataj llaquichishca cashpapish Dios causacuj shinallataj espirituca causachun huañushcacunamanpish alli huillaitaca huillashcami.

⁷Tucui imalla tiyajcuna tucurinaca chayamucunmi. Chaimanta alli yuyaiyujcuna caichij. Diosta mañashpa chaparaichij.

⁸Tucuimanta yallica, cancunapurapi tucui shunguhuan c'uyaj caichij. C'uyaica, achca juchacunatapish perdonachijmi.

⁹Caishuj chaishuj puzachinacuichijlla. Ama huashalla parlanacunguichijchu.

¹⁰Tucuicunami Diosmantaca ch'ican ch'ican rurai tucunata chasquircanguichij. Chai rurai tucunahuanca caishuj chaishujpaj allita ruraichij. Chashna cashpami, Diospaj mana c'uyaipajta c'uyashpa cushca tucui laya ruraicunataca alli apanguichij.

¹¹Maijan huillacushpaca, Diospaj shimi nishca shinalla huillachun. Maijan allita rurajca, Dios cushca poderhuan allita rurachun. Jesucristomanta Diostaca, tucuipi jatunyachishca cachun chashna ruraichij. Huiñai huiñaita jatunyachishca canapish, tucuita mandanapish paipajmi. Chashna cachun.

¹²C'uyashcacuna, cancuna crijtaj cashcata ricuchij llaquicuna nina shina cancunapajman shamujpica, ima mana ricushcata shinaca ama mancharichijchu.

¹³Chaipaj randica, Cristo apashca shinallataj llaquicunata apacushcata yuyarishpa cushicuichigari. Chashna llaquita apashcamantaca pai achij nicuj sumaj shamujpica, cancunaca jatuntami cushicunguichij.

¹⁴Cristopaj shutimanta c'amishca cashpaca cushichishcami canguichij. Cancunapica Diospaj sumaj Espiritumari causacun. Paicunaca paitami c'amin. Ashtahuanpish cancunaca paitaca jatunyachinguichijmi.

¹⁵Chaimanta cancunaca huañuchij cashcamanta, shuhua cashcamanta, millaita ruraj cashcamanta, shujtajcunapajpi satirij cashcamanta shujllapish amalla llaquichishca cachun.

¹⁶Cristota catij cashcamanta llaquita apacushpaca, ama pingarichun. Ashtahuanpish Cristota catij cashcamantaca Diosta jatunyachichij.

¹⁷Llaquichina punllaca, Diospaj familiapimari ña callarishca. Ñucanchijtaraj chashna llaquichi callarijpica, Diospaj alli huillaita mana chasquijcunacarin ¿imachari tucunga?

¹⁸“Cashcata rurajpish llaquicunahuan quishpirijpica, Diosta mana manchaj juchayujcarin ¿imachari tucunga?”

¹⁹Dios munashca shina llaquita apajcunaca, paicunata ruraj imatapish pajtachij Diospaj maquipi paicunapaj causaita mingashpa allita ruracuchunlla.