Read Chimborazo Highland Quichua 2 PEDRO 1 Bible Online

2 PEDRO 1 - Chimborazo Highland Quichua bible

2 PEDRO 1

¹Jesucristopaj apóstol, paipajta ruraj Simón Pedromi cani. Cashcata ruraj ñucanchij Dios, Quishpichij Jesucristomantami cancunapish ñucanchij shinallataj alli sumaj crinata japircanguichij.

²Taita Diostapish, ñucanchijta Mandaj Jesustapish rijsishcamantaca, mana c'uyaipajta c'uyaj canata, sumaj causaitapish ashtahuan mirachishca cachun ninimi.

³Diosca jatun mancharinacunata ruraj cashpami, ñucanchijta agllashpa alli sumaj Jesucristota rijsichishpaca, pai tucuita rurai tucuj cashcahuan ñucanchij causaipaj tucui ima illashcata pai yuyailla alli causanatapish cushca.

⁴Chashnami tucuita yalli valij, jatun cushami nishcacunataca ñucanchijman cushca. Chaicunahuanca cai pachapi ismuchicuj millai munaicunamanta anchushpa, Dios ima shina caj shinallataj cachunmi chashna rurashca.

⁵Chashna cajpica, crijtaj cashcata ricuchina yuyailla alli causaichij. Chashna causashpa alli yachajcuna caichij.

⁶Alli yachajcuna cashpaca, quiquinllataj jarcarij caichij. Quiquinllataj jarcarij cashpaca, mana p'iñarij caichij. Mana p'iñarij cashpaca, Diosta alli yuyarij caichij.

⁷Diosta alli yuyarij cashpaca, quiquin huauquindij shina c'uyanacuj caichij. Quiquin huauquindij shina c'uyanacuj cashpaca, tucuicunata c'uyaj caichij.

⁸Cancunapi chai yuyaicuna yallitaj tiyashpaca q'uillacuna cachun, ñucanchijta Mandaj Jesucristomanta yachashcatapish grano mana p'ucushca shina chushaj cachunca mana saquingachu.

⁹Ashtahuanpish chaicunata maijan mana charijca, caruta mana ricui tucuj shina, mana cashpaca ñahui mana ricuj shinami. Paipaj ñaupa juchacunata maillashca cashcata cungarishcamantami chashna tucushca.

¹⁰Chaimanta huauquicuna, cancunata cayashpa agllashcapica ashtahuan sinchiyarina yuyailla caichij. Chaicunata rurashpaca manataj urmanguichijchu.

¹¹Chashna cajpimi, cancunataca pi mana jarcaipaj cajpi, ñucanchijta Quishpichij Jesucristo huiñaita mandacunmanca yaicuchingalla.

¹²Chaimantami cancunataca caicunata ña yachashca cajpipish, mana llullata cunan yachashpa sinchiyashca cajpipish, caicunata yuyachinataca ñucaca manataj saquishachu.

¹³Caicunataca ñuca causaicama cancunata yuyachinataj cajpimi, rijchachishpa cunacushalla nini.

¹⁴Ñucanchijta Mandaj Jesucristo huillashca shinallataj, cai cuerpota ñalla shitashpa rina cashcata yachashcamantami chashnaca nini.

¹⁵Ñuca huañushca q'uipa caicunata cancuna tucuipi yuyarichunmi, caicunataca huillana yuyailla huillacuni.

¹⁶Ñucanchijta Mandaj Jesucristo shamuna cashcatapish, paica tucuita rurai tucuj cashcatapish cancunata yachachishpaca, quiquin yuyaimanta surcushca yanga parlocunataca mana yachachircanchijchu. Ashtahuanpish paitaca jatun mandajtaj cashcata, ñucanchij quiquin ñahuihuan ricushcatami huillarcanchij.

¹⁷Alli nishca canata, jatunyachishca canata, Dios Yayamanta pai chasquicuipica jahua pacha sumaj achij nicujmantaca cashna nishcami uyarirca: “Caica ñuca c'uyashca Churimi, paipimi cushicuita charini” nircami.

¹⁸Ñucanchijca Diospajlla urcupi Jesushuan cashpami, jahua pachamanta chashna rimashcataca uyarcanchij.

¹⁹Chaicunataca profetacunaman Quillcachishcacunami chashnataj cashcata huillan. Chaicunataca amsata nina sindi achijyachijta alli ricuraj shina ricurashpaca, allitami ruranguichij. Pacari luzero punllayachij shina cancunapaj shunguta achijyachingacamami chashna rurana canguichij.

²⁰Chashna cajpipish tucuimanta yallica, caitami yachaj cana canguichij. Profetacuna Quillcashcaca, maijan Quillca mana paicunapaj yuyaillamanta Quillcashcachu.

²¹Profetacunaca paicunapaj yuyaillamantaca manataj huillashcacunachu. Ashtahuanpish Diospajlla caj runacunami, Diospaj jucha illaj Espíritu huillachijpi huillashcacuna.